Esta actividade, organizada polo Arquivo da Emigración Galega, desenvolverase no Consello da Cultura Galega os vindeiros días 7 e o 8 de xuño, enmarcado nunha liña de actividades que o AEG segue desde o 99 para tentar achegar investigadores de distintas procedencias, facendo posible un intercambio de ideas e propostas de investigación en torno ó fenómeno da migración a Arxentina.

Durante a presentación das xornadas, que tivo lugar nunha rolda de prensa celebrada esta mañá no CCG, o coordinador das xornadas, Alejandro Vázquez, destacou que "o que pretendemos é estudiar estes fenómenos desde un punto de vista angular, facendo unha análise comparativa que nos permita ver as diverxencias e as similitudes nas sociedades creadas polos diferentes grupos étnicos que emigraron a Arxentina".

Neste sentido, este profesor da Universidade de Vigo destacou como novidade nestas xornadas o feito de que "ata o de agora abundaban os estudios de caso e os feitos nun nivel 'macro'" pero o que se propón nestes encontros é facer unha análise interrexional, é dicir, " a través do estudio das rexións, analizando, por exemplo, a competencia que se daba entre estes grupos no mercado laboral".