Coma en anos anteriores, o Arquivo de Planificación e Normalización Lingüística aborda nestas xornadas o labor dos técnicos de normalización, neste caso como persoal da administración pública, e a política da UE respecto á protección das linguas minoritarias.

O presidente do Oficina Europea para as Linguas Minorizadas, Bojan Brezigar, disertará sobre os retos que supón a ampliación europea cara ás comunidades do leste e o conseguinte debate sobre a oficialización das súas linguas, que en diversos casos non superan en número de falantes a moitos idiomas non oficiais da actual Unión. Henrique Costas expoñerá o actual status de normalidade destas linguas non oficiais.

Cambiando de ámbito xeográfico, os VI Encontros tamén lle prestarán atención na última mesa de traballo á situación do galego estremeiro. O profesor da Universidade de Santiago de Compostela, Francisco Fernández Rei, e representantes dos colectivos que loitan pola normalización do galego nos concellos do Eo-Navia, Zamora e O Bierzo debaterán a situación dunha lingua que comeza a contar co respaldo institucional pero que aínda debe conquistar o apoio dos respectivos gobernos autonómicos.