A mostra permitirá descubrir unha faciana pouco coñecida da personalidade de Xaquín Lorenzo, a do ensaio sobre a fotografía. O mestre da Etnografía galega, a quen este ano se lle dedicou o Día das Letras Galegas, foi un home polifacético e un espírito inquedo, atento a todo o que podía facilitarlle as posibilidades de estudo e coñecemento da realidade de Galicia, no mellor ronsel da Xeración Nós e do Seminario de Estudos Galegos.

No acto inaugural intervirán tamén o director do Museo Arqueolóxico Provincial e coordinador da Sección de Antropoloxía Cultural do CCG, Francisco Fariña Busto, e o presidente do Liceo, José Carlos Martínez Pedrayo.

A exposición, organizada polo Museo e o CCG e comisariada por Tomás Vega Pato, poderá visitarse até o vindeiro 6 de novembro.