Pola mañá interviron Rafael Cabarcos (consultor do Institute for Media Development), que falou da “adaptación dos perfís profesionais aos novos modelos do ecosistema dixital” ou de qué maneira facer máis e mellor con menos profesionais peor pagados. “É complicado replantexar profesión, servizo á cidadanía e cambio do modelo de negocio, pero hai que intentalo”, dixo.
Ramón Alonso (director de “Kiosko y Más”) e Julio Miravalls (director adxunto de “El Mundo en Orbyt), referíronse ás súas particulares experiencias, que van abrindo camiño, aínda que, en boa medida, os ingresos das edicións impresas seguen aportando máis do oitenta por cento da facturación.

Pola tarde falaron Juan Triviño, editor e especialista en edición dixital, sobre “a industria do libro en transformación” e o escritor, xornalista e editor Víctor F. Freixanes moderou unha mesa redonda sobre “os desafíos dixitais dos editores e dos xornais de Galicia”, na que falaron Manuel Bragado, director de Edicións Xerais, e os responsables das edicións dixitais de “La Voz de Galicia”, “El Correo Gallego” e “El Progreso”, Tomás García Morán, Xavier Cea e Juan Méndez, respectivamente.

A xornada foi organizada polo Consello da Cultura Galega e coordinada por Francisco Campos, Victor F. Freixanes e Manuel Goyanes.