<em>Santiago de Compostela, 4 de febreiro de 2008</em>.- O Consello da Cultura Galega expresou hoxe o seu pesar polo finamento de D. Manuel Cecilio Díaz y Díaz, catedrático de Latín da Universidade de Santiago e membro do Plenario e da Sección de Patrimonio Histórico do Consello desde 1991, onde representou ó Instituto de Estudos Xacobeos.
O CCG lembrou os valiosos servizos que D. Manuel Cecilio Díaz y Díaz prestou a Galicia e á súa cultura e salientou e agradeceu "os longos anos de convivio humano e de colaboración coa nosa institución".
O Presidente do CCG, Ramón Villares, acudirá mañá ao funeral que se celebrará ás 12´30 horas na igrexa de San Domingos de Bonaval, en Santiago de Compostela.

<!--more-->

LATINISTA E MEDIEVALISTA

Manuel C. Díaz y Díaz, especialista en lingua e literatura latinas e en numerosos aspectos do mundo medieval (literatura, cristianismo, codicoloxía ou paleografía entre outros), licenciouse en Filoloxía Clásica na Universidade de Madrid no ano 1945. A súa carreira docente principia en 1949 como catedrático de instituto, para logo ser catedrático de Filoloxía Latina nas universidades de Valencia (1953-1956), Salamanca (1956-1968) e finalmente na Universidade de Santiago dende 1968. Xunto este labor académico e investigador, Manuel Díaz y Díaz desempeñou outros importantes cargos relacionados coa xestión universitaria como a de primeiro presidente da Axencia para a Calidade do Sistema Universitario en Galicia (ACSUG).

O profesor Díaz y Díaz recibiu en 1979 a Medalla ao Mérito Docente da Orde Alfonso X O Sabio, tras cumprir 25 anos como catedrático. Foi doutor honoris causa pola Universidade Clásica de Lisboa (1980), pola Universidade de Salamanca (1993) e pola Universidade de Coimbra (2002). En 1991 recibiu a medalla de Prata de Galicia da Xunta de Galicia, e en 1994 o concello de Santiago concedeulle a Medalla de Ouro da cidade ao merito cultural. O Grupo Compostela de Universidades outorgoulle en 2003 o VII Premio Internacional Compostela-Xunta de Galicia.

Entre os numerosos libros e traballos publicados polo profesor Díaz compre saleintar Index scriptorum latinorum medii aeui hispanorum (1959), obra de consulta xa clásica; Antología del latín vulgar, obra que se emprega como libro de texto en numerosos países de Lationamérica; Libros y librerías en la Rioja Altomedioeval, obra premiada polo Padroado do Milenario da lingua castelá, converteuse en pauta para estudios similares; e Visiones del Más Allá en Galicia durante la Alta Edad Media (1985).