A Secretaría Xeral de Política Lingüística e o Concello de Santiago celebran este domingo 31 de maio ás 12:00 da mañá unha homenaxe a Ramón Piñeiro. No transcurso deste acto procederase a descubrir unha placa conmemorativa no número 15 da rúa de Xelmírez, fronte á que foi a casa de Piñeiro. Alí estará presente Francisco Díaz-Fierros, vicepresidente do Consello da Cultura Galega canda persoeiros do mundo da política e da cultura.

Ademais, aproveitando a efeméride, o Consello da Cultura Galega pon a disposición do público, a través do seu web, as cartas que intercambiou con Luís Seoane, como un exemplo da intensa correspondencia coa intelectualidade galega e política do seu tempo.