O concerto estivo presidido por Francisco Díaz-Fierros, vicepresidente do CCG, Anxo Lorenzo, secretario xeral de Cultura, e Luis Aragunde, alcalde de Cambados que incidiron no valor cultural e didáctico desta iniciativa que xuntou trescentos cincuenta nenos e nenas dos sete conservatorios profesionais de música de Galicia (A Coruña, Ferrol, Lugo, Ourense, Pontevedra, Santiago de Compostela e Vigo) e da Escola Municipal de Música de Cambados. O acto estivo conducido pola escritora Rosa Aneiros, quen lembrou a importancia que tiña para Cabanillas o público infantil do que lembrou, que foi o autor da primeira publicación en galego para nenos. Este programa centrouse no poeta cambadés cando se cumpren cen anos da edición dunha das súa obras máis destacadas, Vento Mareiro (1915). O programa estaba conformado polos poemas “Pregaria”, “Fala unha laverca”, “Era un piniño novo”, “Aureana do Sil” e mais o poema de Rosalía de Castro “Maio longo”, que foron musicados por diferentes compositores recoñecidos da música culta galega, como son José Baldomir ou Eduardo Rodríguez-Losada, así como a versión que fixo o coñecido compositor catalán Frederic Mompou do poema “Aureana do Sil”, en homenaxe ás mulleres que buscaban ouro nos ríos galegos. Un dos momentos máis destacados do día foi a estrea absoluta de “Fala unha laverca”, sacado do poemario Da terra asoballada, no que ofrece unha dignificación mítica da terra, que o CCG lle encargou á compositora Margarita Soto Viso.

O recoñecido pianista e director Maximino Zumalave repetiu como responsable artístico, igual que o grupo de metais Hércules Brass, un quinteto de diferentes instrumentos (trompeta, trompa, trombón e tuba), ao que se incorporou un músico para conformar un sexteto.

Unha intensa xornada cultural
Alén do concerto, o programa de No bico un cantar ten un carácter cultural moi destacado que arrincou pola mañá cunha serie de visitas culturais por Cambados e se completou por un paseo en barco pola ría.

No bico un cantar
Unha frase dun poema de Curros Enríquez a Rosalía, No bico un cantar, deulle nome a un proxecto do Consello da Cultura Galega e a Consellería de Cultura e Educación que naceu en 2013 co obxectivo de dar a coñecer poetas recoñecidos da nosa terra pero desde un punto de vista musical. Nese ano, cando se cumpría o 150 aniversario do nacemento de Rosalía de Castro, a poeta de Padrón foi a protagonista deste concerto, que se desenvolveu en San Domingos de Bonaval. A segunda edición trasladouse a Celanova, por ser o lugar de nacemento de Curros Enríquez. Nesa ocasión estrouse a versión musical do poema de Curros “Nouturnio” que o CCG lle encargou a Xabier Comesanha.

Neste ano 2015, o programa deseñado polo Consello da Cultura Galega e a Consellería de Cultura e Educación conta coa colaboración do Concello de Cambados e o apoio de Vegalsa-Eroski.


Repertorio para coros
O Consello da Cultura Galega fixo diferentes encargas a compositores galegos actuais de obras para coro sobre textos clásicos da literatura galega. Entre os máis recentes destaca a de Xavier de Paz (A Coruña, 1963) que lle puxo música a dúas cantigas que Filgueira Valverde escribiu como contestación a Ángeles de Compostela, versos que lle dedicou ao pontevedrés o poeta, músico e mestre Gerardo Diego, e que se estreou no Concerto das Letras Galegas que tivo lugar o 16 de maio en Pontevedra. Esta iniciativa supón a elaboración continuada dun repertorio para coros que está dispoñible para todos os usuarios desde o web da institución.