Santiago de Compostela, 27 de xuño de 2007.- O antropólogo social e sociólogo mexicano, Héctor Díaz Polanco, intervirá o día 28 de xuño no seminario “Os Sentidos das Culturas”, organizado polo Consello da Cultura Galega, co relatorio “Tese sobre diversidade, identidade e globalización”. Díaz Polanco é profesor-investigador do Centro de Investigaciones y Estudios Superiores en Antropología Social (CIESAS) de México. Autor de numerosas publicacións, é considerado un dos principais especialistas en temas étnicos e autonómicos de América Latina.
O seminario “Os Sentidos das Culturas”, coordinado polo profesor Ramón Máiz, contou ata o momento coas intervencións de Féliz Duque, Slavoj Zizek, Alberto Ruiz de Samaniego e Darío Villanueva.
A conferencia de Héctor Díaz Polanco terá lugar ás 17 horas na Biblioteca do Consello da Cultura Galega. O texto da conferencia pode ser consultado e descargado en: http://www.consellodacultura.org/sentidos/
CURRÍCULO DE HÉCTOR DÍAZ POLANCO
O antropólogo social (UNAM) e sociólogo (El Colegio de México), Héctor Díaz Polanco, ten 30 anos de experiencia como docente e investigador. Publicou 200 traballos científicos, incluíndo 10 libros como autor único e 50 libros en coautoría. Entre as súas obras atópanse: Formación regional y burguesía agraria en México (Editorial ERA, 1982); Etnia, nación y política (Juan Pablos Editor, 1987); La cuestión étnico-nacional (Fontamara, 1988); Autonomía regional. La autodeterminación de los pueblos indios (Siglo XXI Editores, 1991); El fuego de
la inobediencia. Autonomía y rebelión india en el Obispado de Oaxaca (CIESAS, 1992); con Noam Chomsky e outros, Chiapas insurgentes (Txalaparta, 1995); Indigenous Peoples in Latin America. The quest for self-determination (Westview Press/Harper Collins
Publishers, 1997); La rebelión zapatista y la autonomía (Siglo XXI Editores, 1997); con Consuelo Sánchez, México diverso. El debate por la autonomía (Siglo XXI Editores, 2002) e con Sergio Bagú, Identidad continental/Indigenismo y diversidad cultural (Universidad de
la Ciudad de México, 2003).Participou en máis de 200 eventos científicos (en América Latina, Estados Unidos e Europa). Coordinou varios programas de posgrao en México. É editor da revista do Instituto Panamericano de Geografía e Historia (Boletín de Antropología Americana) e director de Memoria. Revista mensual de política e cultura (publicada en México). Ademais é membro do Consello Editorial das revistas: Latin American Perspectives (California), Desacatos. Revista de Antropología Social (México) e Dialéctica (México).Foi asesor da Comisión Nacional de Autonomía (Managua, 1985-1987), que deseñou o réxime de autonomía da Costa Atlántica de Nicaragua; e do Exército Zapatista de Liberación Nacional (EZLN) para as negociacións co Goberno mexicano sobre “Derechos y cultura indígena”, das que resultaron os Acuerdos de San Andrés. Ademais, foi membro da Presidencia da Convención Nacional Democrática, promovida polo EZLN entre agosto e outubro de 1994. É membro da Comisión Mexicana de Promoción y Defensa de los Derechos Humanos.Foi xurado de premios nacionais e internacionais, como o “Fray Bernardino de Sahagún de Antropología Social”, do Instituto Nacional de Antropología e Historia (México), e o “Casa de las Américas” (A Habana, Cuba). Foi consultor sobre temas indíxenas da Organización das Nacións Unidas para a Agricultura e a Alimentación (FAO) e asesor da Comisión de Asuntos Indígenas do Senado da República (México). É integrante do Consejo de Consulta y Participación Indígena, do Goberno do Distrito Federal. Na actualidade posúe o máximo nivel (III) como “Investigador Nacional” do Sistema Nacional de Investigadores de México.
http://www.paginasprodigy.com/diazp
