A Galipedia celebra este mes de marzo de 2018 os seus quince anos de difusión en Internet do coñecemento en galego. Desde aquela primeira entrada coa definición lexicográfica do termo “grupo”, editada o 8 de marzo de 2003, centos de persoas contribuíron de xeito desinteresado a que hoxe teñamos ao noso dispor máis de 145.000 entradas sobre todo tipo de temas. Para conmemorar este aniversario, o vindeiro 10 de marzo, a comunidade de administradores e editores realizará en Ourense o “Primeiro wikimaratón do Día Internacional da Muller”, co ánimo de ampliar e mellorar os artigos biográficos de mulleres destacadas. Podes ler unha reportaxe sobre o proxecto no portal Gciencia.
