Xa podes participar na elección da palabra do ano 2019
3/12/2019
O Portal das Palabras, proxecto da Real Academia Galega e a Fundación Barrié, organiza unha nova edición da iniciativa Palabra do ano, co obxectivo de que a sociedade tome conciencia de que o idioma nos representa como pobo e a través das súas palabras podemos definir colectiva e simbolicamente o ano que remata. Todas as persoas interesadas poden enviar as súas propostas ata o vindeiro 15 de decembro. Tras seleccionar os termos máis repetidos ou que representen unha temática compartida por diferentes participantes, abrirase un novo período de votación entre o 16 e o 25 de decembro para seleccionar a palabra do ano 2019.
