O representante da Dirección Xeral de Patrimonio Cultural, Antonio Díaz, e o Fiscal do Tribunal Supeiror de Xustiza de Galicia salientaron a importancia e a oportunidade das Xornadas, que para Ramón Villares supoñen “unha pertinente chamada á reflexión sobre un asunto transversal no que pasamos de ter pouca conciencia á idea de que case todo é patrimonio, feito que explica a necesidade dun certo pragmatismo”. Por parte da Fiscalía trátase de “previr para preservar, aplicando o dereito en acción sobre bens difusos como o medio ambiente, o urbanismo e o patrimonio histórico”. Pola súa parte Iago Seara, coordinador das Xornadas xunto con María García Alén, advertiu que o patrimonio “require unha continuada reflexión teórica e crítica para levar adiante o proceso de divulgación e a súa conservación crítica para poder ser legado”. Lembrou asemade que o obxectivo destas sesións é “tratar de determinar que niveis de autenticidade se dan no traballo de conservación e protección do Patrimonio na Galicia actual”.

Nas sesións da mañán de hoxe falaron tres profesores da Universidade de Santiago de Compostela. Marcial Gondar (Patrimonio para que? Bens culturais e cambio social na Galicia de hoxe) referiuse á necesidade de contextualizar axeitadamente os recursos patrimoniais nun mundo marcado pola fragmentación. Pegerto Saavedra (Historia e patrimonio) reclamou unha maior atención e coñecemento, e respecto, do pasado histórico. Alfredo Vigo Trasancos (Historia, lugar e identidade. Unha reflexión sobre o patrimonio artístico) aludiu ao patrimonio artístico como imaxe da nosa historia e esixiu critrerios e comportamentos coherentes á hora de actuar, transformar e preservar. Neasa liña criticou o que considerou “falta de criterio na recente rehabilitación dalgunhas vidreiras da catedral de Santiago de Compostela”.

Pola tarde interviron Concha Varela Orol, da Universidade da Coruña, (Museos, arquivos e bibliotecas, patrimonio común) e Manuel Vilar Álvarez, do Instituto de Estudo das Identidades-Museo do Pobo Galego, (Patrimonio antropolóxico e memoria cultural). A primeira reclamou unha revisión da lexislación cara unha definición máis exhaustiva do patrimonio das institucións da memoria, o impulso de políticas transversais e a potenciación do Portal do Patrimonio actualmente existente.
Manuel Vilar Álvarez propuxo, entre outras achegas, a creación do Museo Etnográfico Virtual de Galicia, unha gran base de datos que unifique o acceso en liña aos bens recollidos en museos e coleccións.

MÉRCORES 26

Mañá mércores 26, a partir das 10 horas, chegarán os relatorios de: Cristina Sánchez Carretero, do Consello Superior de Investigacións Científicas, (Cara a un patrimonio público galego: vinte apuntamentos); Carlos Nárdiz, da Universidade da Coruña, (As infraestruturas no territorio histórico cultural: estrutura e vertebración da paisaxe de Galicia); Xan Carmona, da Universidade de Santiago de Compostela, (Sobre o patrimonio industrial de Galicia: notas para un debate), María García Alén (A lexislación actual en materia de protección do Patrimonio Cultural Galego) e Iago Seara (A intervención no Patrimonio Cultural construído: o Plan Director e a conservación crítica).