Estudo histórico e lingüístico do Tombo das viñas de Ribadavia
4/1/2021
O Consello da Cultura Galega presenta unha nova edición, a cargo de Luz Méndez, dos tres textos que contén o Tombo das viñas de Ribadavia, un rolo de pergamiño procedente do mosteiro de Melón e custodiado no Arquivo da Catedral de Ourense. A maiores, a obra inclúe unha análise paleográfica, diplomática, lingüística e histórica destes textos; un estudo onomástico de nomes persoais e topónimos, un glosario léxico e os índices de persoas e lugares citados. No remate, os/as lectores/as tamén atoparán uns anexos documentais que conteñen textos medievais en latín e galego correspondentes a procesos inquisitivos, así coma unha transcrición do traslado do Tombo das viñas a outro tombo do mosteiro de Melón no ano 1800.
