21 de febreiro, Día Internacional da Lingua Materna
19/2/2021
O vindeiro domingo, 21 de febreiro, conmemórase o Día Internacional da Lingua Materna, unha celebración instaurada pola UNESCO en 1999 para festexar a riqueza que supón a diversidade lingüística do planeta. Neste 2021, o eixo temático elixido é "Fomentar o multilingüismo para a inclusión na educación e a sociedade". Coincidindo con esta data, a Real Academia Galega difunde en liña o relato "Xeliña fala galego", escrito por Valentín Arias en 1968, que ten como protagonista a súa filla Xela Arias, a quen a RAG dedica este ano o Día das Letras Galegas. Pola súa parte, a Secretaría Xeral de Política Lingüística retransmitirá ese día en directo a actuación "Puño, puñete", de Baobab Teatro, dirixida a nenos e nenas de 1 a 7 anos e ás súas familias.
