O 35% dos castelanfalantes rematan a ESO cunha competencia deficiente en galego
28/4/2021
A Real Academia Galega presenta o estudo Avaliación da competencia bilingüe nos idiomas galego e castelán do alumnado de 4º da ESO, onde se analiza a competencia en comunicación lingüística da denominada xeración Z, poñendo os datos en relación con variables sociodemográficas, sociolingüísticas e escolares. Malia que, por mandato legal, o sistema educativo debe garantir que o alumnado remate a ESO coa mesma competencia nos dous idiomas oficiais, o estudo constata un evidente desequilibrio en detrimento do galego, relacionado co perfil lingüístico do alumnado, o hábitat e a titularidade do centro. Así, mentres os galegofalantes demostran ter unha competencia equilibrada nos dous idiomas, máis do 35% dos castelanfalantes teñen unha competencia bastante máis deficiente en galego ca en castelán. A competencia bilingüe tamén é máis máis homoxénea nos centros públicos e no rural; sendo o alumnado do ámbito urbano e da rede privada o que amosa peor competencia en galego.
