Carlos Casares foi presidente do Consello da Cultura Galega entre 1996 e 2002, tralo falecemento de Filgueira Valverde. Converteuse no presidente máis novo que tivo a institución, outorgándolle un impulso de modernidade que se mantén. No acto de homenaxe convocado pola Fundación Casares, a presidenta do Consello da Cultura Galega lembrou que “pasaron 20 anos pero aínda é frecuente lembrar, con diferentes motivos, o dinamismo vinculado coa renovación tecnolóxica e a necesidade de situar a cultura galega na rede; a vocación pola difusión da boa nova da cultura galega contemporánea fóra das nosas fronteras e fóra do espazo exclusivo das comunidades galegas do exterior; e a procura constante de definir o papel do CCG dentro do marco institucional e no ámbito cultural”.