Santiago de Compostela, 28 de maio de 2010.- O Consello da Cultura Galega (CCG) porá en marcha o martes 1 de xuño o primeiro dos cinco “<a href="http://consellodacultura.org/reflexion2010/">Foros de reflexión estratéxica sobre a cultura galega</a>”, un diálogo sobre o papel que debe xogar a cultura galega no século XXI. Ao foro inicial, sobre “Políticas culturais” seguiranlle os dedicados a “Institucións culturais” (15 de xuño), “Cultura e mercado” (22 de xuño), “Contidos da cultura” (8 de xullo) e “Proxección exterior”. As sesións terán lugar, en xornadas de mañá e tarde, na Biblioteca da institución e posiblitarán a elaboración de conclusións, que serán enriquecidas e ampliadas nun debate aberto ao conxunto da sociedade durante o mes de outubro.


<!--more-->O primeiro dos cinco foros, dedicado ás “políticas culturais” comezará o 1 de xuño ás 9´30 horas coordinado por Ramón Maiz e co relatorio-marco de Arturo Rodríguez Morató. As liñas do debate abordarán os seguintes temas:

-A Cultura como ben público e o seu valor intrínseco.

-A democracia cultural: público e cidadanía, estratexias para aumentar o acceso e a participación.

-Gobernanza da cultura: cooperación entre Administracións e coa sociedade civil.

-Planificación estratéxica da Cultura: diagnóstico, plans e estratexias, desenvolvemento e monitorización, avaliación.

Os catro foros restantes, xa citados, serán coordinados por: Rosario Álvarez, Francisco Campos, Henrique Monteagudo-Victor Freixanes e Xulio Rios. Da coordinación técnica encárgase Xaime Subiela.


 DE XANEIRO A OUTUBRO

Ponse en marcha así a segunda fase dun proceso aberto, plural e participativo, que comezou o pasado mes de xaneiro con propostas e consultas a diferentes representantes do sector cultural, convocados desde o CCG na procura de acordos arredor das estratexias de futuro da cultura galega. O grupo de traballo, coordinado por Xosé López, remitiu un cuestionario a trescentas persoas representativas do sector cultural e da sociedade. Partindo das respostas recibidas ponse agora en marcha unha segunda fase (xuño-xullo) con cinco foros de reflexión, dos que deberá sair unha base de propostas, que se abrirán ao debate, a través dos soportes do CCG na Rede, no mes de setembro. Co conxunto das achegas o equipo coordinador elaborará, en outubro, un documento de integración coas orientacións estratéxicas para o futuro da cultura galega. As conclusións serán remitidas ás institucións públicas, culturais e sociais.

O CCG continúa e amplía con esta nova iniciativa os seus obxectivos de ser cada vez máis un lugar de encontro, reflexión e debate sobre os desafíos da cultura e o futuro da sociedade galega. Tamén sobre a posibilidade de acordos que permitan a consideración e o deseño de estratexias necesarias para respostar a eses desafíos nun novo escenario cultural e de comunicación.