A Escola Galega de Administración Pública publica a convocatoria de actividades de formación para o persoal da Administración local galega. Entre a formación programada, ofértase un curso de redacción de documentos técnico-xurídicos en galego, na modalidade de teleformación, que se desenvolverá entre os días 6 e 24 de maio de 2021. O prazo de presentación das solicitudes é de dez días, contados a partir do seguinte ao da publicación da convocatoria.
12/03/2021. CURSOS E CONGRESOS
11/03/2021. AXUDAS E PREMIOS
No marco do Plan de reactivación dos sectores cultural e turístico fronte aos efectos derivados da Covid-19, a Secretaría Xeral de Política Lingüística convoca a segunda convocatoria do Fondo de proxectos culturais en lingua galega Xacobeo 2021. O obxectivo é seleccionar e contratar proxectos culturais e lingüísticos, que se incorporarán ao Fondo Xacobeo 2021, un repositorio no que participan profesionais autónomos, empresas, cooperativas e entidades sen ánimo de lucro do tecido económico e cultural de Galicia. O prazo de presentación de solicitudes remata o 8 de abril de 2021. Podes obter máis información sobre esta iniciativa, así como consultar as bases completas da convocatoria premendo aquí.
11/03/2021. AXUDAS E PREMIOS
O Servizo de Normalización Lingüística da Universidade de Santiago de Compostela presenta unha nova convocatoria de axudas para financiar a elaboración de quince novos títulos para a colección Esenciais USC. O persoal docente e investigador da USC que desexe participar, ten de prazo para presentar as súa propostas ata o vindeiro 31 de marzo de 2021, ás 14:00 horas. Podes ampliar información premendo aquí.
09/03/2021. AXUDAS E PREMIOS
A Deputación de Pontevedra convoca subvencións dirixidas aos concellos de menos de 50.000 habitantes, para realizar actividades de dinamización da lingua galega durante o ano 2021. As accións subvencionables deben pertencer a algunha das seguintes tipoloxías: certames literarios e xornalísticos; creación audiovisual e literaria; feiras/eventos de promoción da creación en galego; estudos sobre sociolingüística; xornadas e publicacións sobre recuperación da toponimia; xornadas, campañas e publicacións para a dinamización comercial en galego; iniciativas de conmemoración do Día das Letras Galegas, ou recoñecementos a persoas e colectivos que aposten polo galego; actividades de promoción do idioma na sociedade, nomeadamente na infancia e a mocidade; iniciativas para a captación de neofalantes. O prazo de presentación de solicitudes remata o 15 de abril de 2021. Para consultar as bases preme aquí.
09/03/2021. DINAMIZACIóN
O Servizo de Normalización Lingüística do Concello de Ames convoca a décimo oitava edición do Certame Literario Concello de Ames, que ten como principal obxectivo promover a creatividade en lingua galega. O certame conta con dúas modalidades (narrativa e poesía) e en cada unha delas estableceranse tres categorías, segundo a idade dos participantes. Os textos, de tema libre, deben ser inéditos e estar escritos en lingua galega. O prazo de presentación de orixinais remata o 8 de abril de 2021. Podes consultar as bases completas premendo aquí.
05/03/2021. DINAMIZACIóN
O Servizo de Normalización Lingüística do Concello de Pontevedra e mais a Coordinadora de Equipos de Normalización e Dinamización da Lingua Galega dos IES e CIFP de Pontevedra organizan unha nova edición do programa "Ben veñas, maio", dirixido ao alumnado matriculado nos institutos públicos do concello. O obxectivo do programa é fomentar a creatividade e o uso do galego entre a mocidade. Nesta edición, o alumnado poderá participar en calquera destes seis certames: videoclips musicais, curtametraxes, fotografía, banda deseñada, narración curta e poesía. O prazo de admisión de traballos remata o 23 de abril de 2021.
05/03/2021. CURSOS E CONGRESOS
A Comisión de Normalización Lingüística da Facultade de Ciencias da Educación da USC, co apoio do Servizo de Normalización Lingüística, organiza o "Obradoiro de apoderamento lingüístico. Ferramentas dende a Educación Social", dirixido preferentemente ao alumnado do grao de Educación Social. O obxectivo é reflexionar sobre a problemática lingüística galega e afondar nas potencialidades da educación social en materia de normalización lingüística. As sesións desenvolveranse, a través de videoconferencia, os días 13, 16, 20 e 23 de abril de 2021. O prazo de inscrición remata o 7 de abril. Para ampliar información, preme aquí.
05/03/2021. AXUDAS E PREMIOS
A Deputación de Pontevedra convoca axudas dirixidas a entidades culturais sen fin de lucro, destinadas a fomentar o emprego da lingua galega na sociedade durante o ano 2021. As accións subvencionables deben pertencer a algunha das seguintes tipoloxías: certames literarios e xornalísticos; creación audiovisual e literaria; feiras/eventos de promoción da creación en galego; estudos sobre sociolingüística; xornadas e publicacións sobre recuperación da toponimia; xornadas, campañas e publicacións para a dinamización comercial en galego; iniciativas e publicacións de conmemoración do Día das Letras Galegas, ou recoñecementos a persoas e colectivos que aposten polo galego; obradoiros de fomento do galego entre a veciñanza; produción de materiais en galego dirixidos á difusión do idioma nalgún eido. O prazo de presentación de solicitudes remata o 15 de abril de 2021. Para consultar as bases preme aquí.
04/03/2021. OUTRAS
O Servizo de Normalización Lingüística da Universidade de Santiago publica, no último número do seu boletín O Cartafol Dixital, os datos sobre usos lingüísticos na actividade docente no curso 2020-2021. En termos xerais, actualmente impártese en castelán o 73,63% das horas docentes, en galego o 22,10% e noutros idiomas estranxeiros o 4,27%. No mesmo número ofrécese información detallada sobre usos lingüísticos segundo o tipo de titulación (grao ou mestrado), ou o departamento e a categoría do persoal docente e investigador. Así mesmo, tamén podes consultar a evolución dos usos lingüísticos na USC desde o curso 2003-2004.
04/03/2021. DINAMIZACIóN
O Servizo de Normalización Lingüística do Concello de Ames organiza a actividade "Arrolos de salitre", un obradoiro de cantos de berce no que, da man de Faia Díaz e Guillerme Fernández, poderás aprender melodías para arrolar as crianzas con lingua, música e moito apego. A iniciativa está dirixida a familias con nenos/as de 0 a 2 anos, ou que estean esperando un bebé. A actividade terá lugar o vindeiro 11 de marzo de 2021 no Pazo da Peregrina (Bertamiráns). Podes obter máis información sobre os trámites de inscrición premendo aquí.
03/03/2021. DINAMIZACIóN
O Consello da Cultura Galega presentou hoxe a programación deseñada para conmemorar o Día das Letras Galegas 2021, dedicado a Xela Arias. Os actos de homenaxe arrincarán o vindeiro 21 de marzo cun recital poético e posteriormente, o CCG editará unha edición non venal da obra Non te amola, da autora homenaxeada. Xa no mes de maio, porá o ramo a este programa co seu tradicional Concerto das Letras Galegas, este ano a cargo de Laura LaMontagne e PicoAmperio. Podes manterte ao día destes actos no espazo web Xela Arias. Día das Letras Galegas 2021, onde tamén atoparás outros recursos relacionados coa autora, como unha biografía, unha galería fotográfica, unha compilación de intervencións sonoras ou o documental “Xela e a palabra”. Para ampliar información, preme aquí.
03/03/2021. AXUDAS E PREMIOS
A Unidade Técnica de Normalización Lingüística da Deputación da Coruña convoca a duodécima edición do Premio Rosalía de Castro de Lingua, que ten como obxectivo recoñecer iniciativas de normalización lingüística, ou traxectorias de persoas, colectivos e entidades que destaquen polo seu compromiso coa promoción e dignificación do idioma galego. Establécense tres categorías: unha para recoñecer o labor daquela persoa que máis destaque na promoción da lingua galega de calidade; outra para a entidade que máis destaque na promoción do galego; e unha terceira para o proxecto de dinamización lingüística que estea dirixido especificamente aos sectores de menor idade (infancia e mocidade). A dotación económica do premio é de 2.100 euros para cada unha das categorías. O prazo de presentación de solicitudes publicarase nos vindeiros días no BOP da Coruña, no anuncio elaborado a través do Sistema Nacional de Publicación de Subvencións.
02/03/2021. DINAMIZACIóN
A Real Academia Galega presenta hoxe no CEIP Sárdoma-Moledo (Vigo), o colexio onde estudou Xela Arias, unha nova edición do proxecto Primavera das Letras, que este ano se centra na figura desta autora, á que se lle dedica o Dia das Letras Galegas 2021. No web atoparás materiais lúdicos e didácticos deseñados para o profesorado e o alumnado de infantil e primaria, ademais de información biográfica e bibliográfica sobre a autora. Para ampliar a nova preme aquí.
01/03/2021. INVESTIGACIóN
Xa podes consultar en liña, no Repositorio Institucional da Universidade de Vigo, a tese "O léxico da hipoloxía no galego oral", autoría de Fernando Groba. Trátase dun traballo de compilación, clasificación e análise do léxico oral relacionado co sector equino, recollido en Galicia e nos concellos galegofalantes de Asturias, León e Zamora, así como no territorio luso estremeiro. En concreto, analízanse as formas que os falantes teñen para nomear e describir os équidos; os nomes e adxectivos relacionados co corpo destes animais; as denominacións vinculadas coa faneróptica; a terminoloxía que ten que ver coa súa cronometría; e o léxico relacionado coas súas funcións vitais básicas e os problemas de saúde que poden presentar os animais.
01/03/2021. DINAMIZACIóN
A Deputación da Coruña convoca a quinta edición do concurso musical “Quero Cantar”, que nesta edición especial de 2021 só inclúe a categoría xuvenil.
O certame está dirixido a solistas ou grupos musicais, formados por rapaces e rapazas con idades comprendidas entre 13 e 16 anos, que presenten a maqueta dunha composición en galego con letra e música orixinais e inéditas. O premio para os dous grupos ou solistas seleccionados polo xurado consiste na participación no "Programa formativo Quero Cantar" que se explica no anexo da convocatoria, así como a elaboración dun videoclip da canción realizada tras a participación neste programa formativo. O prazo de presentación de solicitudes remata o 30 de setembro de 2021 ás 14:00 horas, tal e como se indica no anuncio elaborado a través do Sistema Nacional de Publicación de Subvencións.
O certame está dirixido a solistas ou grupos musicais, formados por rapaces e rapazas con idades comprendidas entre 13 e 16 anos, que presenten a maqueta dunha composición en galego con letra e música orixinais e inéditas. O premio para os dous grupos ou solistas seleccionados polo xurado consiste na participación no "Programa formativo Quero Cantar" que se explica no anexo da convocatoria, así como a elaboración dun videoclip da canción realizada tras a participación neste programa formativo. O prazo de presentación de solicitudes remata o 30 de setembro de 2021 ás 14:00 horas, tal e como se indica no anuncio elaborado a través do Sistema Nacional de Publicación de Subvencións.
01/03/2021. DINAMIZACIóN
Coincidindo coa celebración do Día de Rosalía, que tivo lugar o pasado 24 de febreiro, o Servizo de Normalización Lingüística do Concello de Rianxo elaborou e puxo ao dispor da cidadanía unha compilación de vídeos musicais nos que máis de 40 artistas interpretan poemas de Rosalía. A compilación está accesible na canle de vídeos Youtube, onde podes escoitar máis de tres horas de música en galego de diferentes estilos musicais: rock, rap, trap, jazz, heavy ou canción de autor, entre outros. Para ampliar información, preme aquí.
26/02/2021. DINAMIZACIóN
Co gallo da conmemoración do seu 50 aniversario, o Instituto da Lingua Galega organiza o concurso de vídeo Móvete, dirixido a alumnado que estea cursando 3º, 4º da ESO, 1º ou 2º de Bacharelato en calquera centro educativo de Galicia ou dos territorios de fala galega. O estudantado pode participar na modalidade individual ou en grupo. Para facelo debe elaborar un vídeo inédito e orixinal, que non supere os 2 minutos de duración nin os 300 MB de tamaño, sobre algún destes temas: "Móvete co galego", "Conmóvete co galego" ou "Promove o galego". O xurado outorgará diferentes premios tecnolóxicos e culturais para os autores/as dos mellores vídeos. O prazo para presentar os traballos remata o 31 de maio de 2021. Podes consultar as bases do certame premendo aquí.
23/02/2021. DINAMIZACIóN
A Asociación de Escritores en Lingua Galega (AELG) promove desde 2010 que cada 24 de febreiro se homenaxee a Rosalía de Castro, figura clave na reivindicación e prestixio do idioma galego no século XIX, convidando á cidadanía a agasallar un libro en galego e unha flor. O vindeiro sábado, 27 de febreiro, ás 12:00 h, a AELG celebrará no Panteón de Galegos Ilustres (Santiago de Compostela) o acto central de conmemoración do Día de Rosalía de Castro 2021. A maiores, institucións, entidades culturais e centros de ensino do país tamén están a organizar estes días diferentes actividades e actos de homenaxe. No web do Consello da Cultura Galega podes consultar o especial “Sempre Rosalía”, con documentación variada sobre a autora.
23/02/2021. AXUDAS E PREMIOS
A Deputación de Pontevedra publica as bases das subvencións dirixidas a concellos e outras entidades locais para a creación, mantemento ou reforzo dos servizos de normalización lingüística (SNL) municipais durante o ano 2021. Poden optar ás axudas para a creación de SNL os concellos de máis de 5.000 habitantes e de ata un máximo de 50.000 habitantes (así como as agrupacións de concellos, mancomunidades ou as entidades locais menores que cheguen a esa cifra mínima). No caso das axudas para mantemento e reforzo, poderán solicitalas os concellos da provincia de Pontevedra que no momento da publicación da convocatoria teñan creado e en funcionamento un SNL. O prazo de presentación de solicitudes remata o 12 de marzo de 2021. Para acceder ao texto da convocatoria, preme aquí.
23/02/2021. DINAMIZACIóN
A Secretaría Xeral de Política Lingüística (SXPL) da Xunta de Galicia promove a terceira edición do programa “ 21 días co galego e +”, que se inaugurou onte, 22 de febreiro, e na que participan dez centros de ensino galegos. O programa está deseñado para implementar na educación secundaria, mais nesta edición incorporouse tamén, como experiencia piloto, un centro de educación primaria. O obxectivo é que o alumnado desenvolva durante 21 días as propostas didácticas, adquira o hábito de falar galego en diferentes contextos e reflexione sobre a situación actual do noso idioma. Para ampliar información, preme aquí.
23/02/2021. DINAMIZACIóN
O alumnado de 4º da ESO do CPI O Cruce de Cerceda participa este ano no programa educativo "Escolas embaixadoras do Parlamento Europeo", que lles permitirá difundir entre a comunidade educativa todo o que nos une como europeos/as, pero tamén aquelo que nos distingue e constitúe un dos maiores patrimonios da UE, como é a súa diversidade lingüística. Unha das iniciativas que están a desenvolver no marco deste programa educativo é a campaña en Change.org para solicitar que o galego, o catalán e o éuscaro sexan recoñecidos como idiomas oficiais do Parlamento Europeo. Na páxina web do centro podes ver o vídeo de presentación do proxecto.
19/02/2021. DINAMIZACIóN
O vindeiro domingo, 21 de febreiro, conmemórase o Día Internacional da Lingua Materna, unha celebración instaurada pola UNESCO en 1999 para festexar a riqueza que supón a diversidade lingüística do planeta. Neste 2021, o eixo temático elixido é "Fomentar o multilingüismo para a inclusión na educación e a sociedade". Coincidindo con esta data, a Real Academia Galega difunde en liña o relato "Xeliña fala galego", escrito por Valentín Arias en 1968, que ten como protagonista a súa filla Xela Arias, a quen a RAG dedica este ano o Día das Letras Galegas. Pola súa parte, a Secretaría Xeral de Política Lingüística retransmitirá ese día en directo a actuación "Puño, puñete", de Baobab Teatro, dirixida a nenos e nenas de 1 a 7 anos e ás súas familias.
19/02/2021. OUTRAS
O Servizo de Normalización Lingüística da Universidade de Santiago de Compostela presenta os Termos esenciais de vacinas, un recurso que permite acceder directamente a 125 fichas do bUSCatermos que describen conceptos relacionados co ámbito das vacinas, as súas tipoloxías e as campañas de inmunización. En cada ficha atoparás o nome polo que é coñecido cada concepto en galego, español e inglés, así como a área ou áreas temáticas en que se inscribe. Na maior parte dos casos, tamén podes consultar a súa definición en galego.
17/02/2021. OUTRAS
O alumnado da materia “Deseño e Elaboración de Materiais Didácticos” da Facultade de Ciencias da Educación da USC, xunto cos profesores Jesús Rodríguez e Tania Caamaño, elaboraron un banco de recursos educativos en liña relacionados coa pandemia da Covid-19. Os materiais están clasificados segundo o nivel educativo ao que van dirixidos (educación infantil, primaria ou secundaria) e en función da fonte de localización (Youtube, editoriais, redes sociais, revistas…). A maiores, hai un apartado dirixido ás familias, outro aos docentes e un terceiro, aos centros educativos. Trátase dun proxecto cooperativo que se irá completando cada curso escolar. Así mesmo, os internautas tamén poden colaborar enviando suxestións.
16/02/2021. DINAMIZACIóN
O Servizo de Normalización Lingüística (SNL) da Mancomunidade de Ordes organiza a actividade "Rosalía e as nosas Letras", co ánimo de conmemorar entre a comunidade educativa o Día de Rosalía (que se celebrará o vindeiro 24 de febreiro) e mais o Día das Letras Galegas, que este ano 2021 está dedicado a Xela Arias. A actividade está dirixida ao alumnado de educación primaria e ESO dos centros educativos da comarca de Ordes (concellos de Cerceda, Frades, Mesía, Ordes, Tordoia e Trazo). Para participar cómpre crear un vídeo ou audio recitando versos de Rosalía de Castro, ou un fragmento da obra de calquera outro/a escritor/a ao/á que se lle dedicaran as Letras Galegas, e colgalo no evento de Facebook creado para a ocasión. Repartiranse diferentes premios entre os/as autores/as dos vídeos e audios máis valorados. Para ampliar esta nova, preme aquí.
15/02/2021. OUTRAS
O Servizo de Normalización Lingüística do Concello de Vigo presenta unha unidade didáctica sobre o Día Internacional da Lingua Materna, que a Unesco conmemora cada 21 de febreiro desde 1999. No recurso, deseñado para alumnado de 6º de Primaria e 1º e 2º da ESO, explícanse conceptos coma o de "lingua materna" ou "identidade lingüística", e ofrécese información sobre a diversidade lingüística do planeta e a importancia de preservar este patrimonio común.
15/02/2021. DINAMIZACIóN
A Secretaría Xeral de Política Lingüística e a Dirección Xeral de Xuventude, Participación e Voluntariado da Xunta de Galicia organizan unha nova edición de Lingua de namorar, un concurso en liña de mensaxes de amor en lingua galega dirixido a mozos e mozas de 14 a 35 anos. A iniciativa está deseñada para dinamizar o uso do galego nas relacións persoais e nas novas tecnoloxías, nomeadamente en Internet e na mensaxería instantánea. Os participantes nas categorías A (de 14 a 19 anos) e B (de 20 a 35 anos) poden enviar as mensaxes
a través da páxina web do concurso. Como novidade, este ano engádese unha nova modalidade para participar a través de Instagram. Neste caso cómpre ser seguidor/a dos perfís @xuventudegalicia e @linguagalega. O prazo para enviar as mensaxes remata o 2 de marzo de 2021. Para ampliar información, preme aquí.
a través da páxina web do concurso. Como novidade, este ano engádese unha nova modalidade para participar a través de Instagram. Neste caso cómpre ser seguidor/a dos perfís @xuventudegalicia e @linguagalega. O prazo para enviar as mensaxes remata o 2 de marzo de 2021. Para ampliar información, preme aquí.
12/02/2021. CURSOS E CONGRESOS
A Escola Galega de Administración Pública publica dúas convocatorias de cursos de linguaxes específicas, unha na que se ofertan cursos de linguaxe xurídica galega para o persoal da Administración de Xustiza que presta servizos fóra de Galicia, e outra na que se ofertan cursos de linguaxe administrativa e xurídica destinados ao persoal ao servizo das distintas administracións galegas. Todos os cursos se desenvolverán na modalidade de teleformación. En ambas as dúas convocatorias, o prazo de presentación de solicitudes é de oito días, contados a partir do seguinte ao da súa publicación.
11/02/2021. OUTRAS
A Real Academia Galega, a Euskaltzaindia e o Institut d’Estudis Catalans, como institucións con responsabilidades oficialmente recoñecidas na defensa e promoción do galego, éuscaro e catalán, publican unha declaración conxunta reivindicando o plurilingüismo como patrimonio común. O obxectivo do texto é contribuír a aclarar o debate público acerca da presenza das linguas no sistema educativo, sinalando que "para asegurar o seu futuro en condicións de normalidade, o catalán, o éuscaro e o galego precisan dunha presenza reforzada no sistema educativo, que de ningunha maneira redundou nin vai redundar en menoscabo da competencia en castelán". As tres institucións póñense ao dispor dos poderes públicos do Estado para asesorar nos asuntos relativos aos tres idiomas que representan, "en beneficio do respecto mutuo e da convivencia entre as comunidades lingüísticas e os/as falantes das diversas linguas do Estado español".
11/02/2021. OUTRAS
O Proxecto Trasno (comunidade de voluntarios/as que se dedica a localizar software libre ao galego) está a traballar para incorporar o noso idioma ao proxecto Common Voice, promovido pola Fundación Mozilla. O obxectivo é
crear unha tecnoloxía para que as máquinas baseadas na intelixencia artificial (asistentes de voz, lectores de textos para persoas con necesidades especiais, etc.) tamén poidan entender e falar o galego. Así pois, desde o Proxecto Trasno piden a colaboración de falantes nativos de galego para que envíen frases curtas de uso cotián e, posteriormente, as graven co seu propio estilo e acento. Para obter máis información sobre esta iniciativa, así como sobre as diferentes fórmulas de participación, preme aquí.
crear unha tecnoloxía para que as máquinas baseadas na intelixencia artificial (asistentes de voz, lectores de textos para persoas con necesidades especiais, etc.) tamén poidan entender e falar o galego. Así pois, desde o Proxecto Trasno piden a colaboración de falantes nativos de galego para que envíen frases curtas de uso cotián e, posteriormente, as graven co seu propio estilo e acento. Para obter máis información sobre esta iniciativa, así como sobre as diferentes fórmulas de participación, preme aquí.