Paulino Pereiro

Compositor de música e de cámara, cun catálogo de máis de duascentas obras Compositor de música sinfónica e de cámara, cun catálogo que, a finais de 2011 constaba de 220 obras. A súa música interprétase en diferentes países de Europa e América. Participou na creación da AGC (Asociación Galega de Compositores) da que foi Presidente.
Como compositor de música escénica realizou, entre outros, os seguintes traballos (finalistas do premio María Casares): O Barbeiro de Sevilla. Op. 65 e Cyrano de Bergerac. Op. 72, ambas gravadas pola OSG, baixo a dirección de Alejandro Posada.
Estreou varias obras sinfónicas entre as que salientan: Sinfonía nº 1, “Paisaxes imaxinárias”. Op. 62 (estreada pola OSG con dirección de Antoni Wit). O inferno de Dante. Op. 61 (estreada pola Real Filharmonía de Galicia (RFG), dirixida por A. Ros Marbá). Orfeo e Dionisos. Op 67 (estreada pola RFG, dirixida por M. Zumalave). Ceo. Op. 54 (estreada pola OSG, dirixida por Eiji Oue).
A súa música de cámara foi interpretada entre outros por Antoni Besses (Variacións Beiras. Op. 48, gravadas en CD), Herre-Jan Stegenga, Florian Vlashi, David Ethève, Tatiana Prezevalskaia, Antonio Arias, José Luís Evangelista, Taller de Música do CGAC, Trío Quantz, Cuarteto Telemann, Shostakovich Ensemble, Taller de Canto do Orfeón Terra a Nosa, Javier Vázquez Grela, María José Ladra, o pianista Jean-Pierre Dupuy (que interpretou na BBC a súa obra Atlante), Enmanuel Ferrer, Quinteto de Metais Santa Cecilia, Grupo Instrumental Siglo XX, o cuarteto de violonchelos Chelicia, Luís Perandones e o Galatea Quartett.
Como escritor (membro da AELG) publicou, entre outras, as seguintes obras:
Ensaio: Iniciación á linguaxe musical e A música teatral (encargo da Universidade da Coruña).Teatro: O leitor de Goethe, A representación e Cyrano de Bergerac (en colaboración con F. Pillado). Novela: Entre dous (en colaboración con Victoria Salgado), Calidoscopio, Sinfonía cíclica (finalista Premio novela curta Manuel Lueiro Rey 2004) e Arredor de Chinto. Relato: Desde unha mesa de café, Habitar as illas (Premiado no “Certame de Creación literaria Carvalho Calero” 2003). Poesía: Morte do mar. Traducións: Blanche, dans la débâcle des ténèbres, versión bilingüe francés-galego do poemario de Daniel Thibaut.

A Fonte. Op. 3, para frauta e piano (1980), peza breve, de pouco máis de tres minutos de duración, é a primeira obra de cámara do autor. Escrita nun único movemento, dentro da forma tradicional do lied, utiliza unha linguaxe melódico-harmónica impresionista, dando relevo ó rexistro grave da frauta. Tanto o piano como a frauta participan do arabesco melódico e da resonancia, con deseños melódicos pentatónicos e cromáticos.
Esta obra foi estreada por Paulino Pereiro (frauta) e Juan Durán (piano) na antiga Delegación de Cultura da Coruña (Casa da Bomba) en 1985.

Cortesía: Fundación Paideia, Adrián Silva