Afonso Becerra de Becerreá

Dramaturgo, director e investigador. Doutor en Artes Escénicas pola Universitat Autònoma de Barcelona. Titulado superior en Arte Dramática polo Institut del Teatre de Barcelona. Titulado en Interpretación no ITAE de Asturias. Premio Álvaro Cunqueiro da Xunta de Galicia. Docente na Escola Superior de Arte Dramática de Galicia. Actualmente está a escribir a historia da danza contemporánea en Galicia, por encargo da Academia de las Artes Escénicas de España. Ademais de artigos e colaboracións en diversos volumes colectivos, publicou, como dramaturgo e ensaísta, as seguintes obras: Confio-te o meu corpo. A dramaturgia po-dramática (Através, 2018); Textículos dramáticos e posdramáticos (Laiovento, 2013 e 2014); Roberto Vidal Bolaño e o xogo do teatro (Laiovento, 2012); Dramatículas (Laiovento, 2010); Crio-Xénese (Laiovento, 2007); Dramaturxia. Teoría e práctica (Galaxia, 2007); Rexurdimento (RGT, 2006); O ritmo na dramaturxia (Universidade da Coruña, 2005) e Agnus Patris (Xerais, 2002). En 2009 fundou, xunto a Ana Contreras, a Cía. ÓNFALO TEATRO S.L., coa que estrearon Neuras de Mª Xosé Queizán (Auditório de Cangas, 18/11/09) e NA META (Sálvese quen poida) de Thomas Bernhard (MIT Ribadavia, 17/07/10). Anteriormente traballou, entre outros, nos espectáculos: Rosalía 21 (Producciones Bles S.L. Teatro Mella da Habana, 23/02/08); Porno de Dani Salgado (Teatre Lliure de Barcelona, 22/04/04); Cavallitus de Antonio Morcillo (Teatre Nacional de Catalunya, 32 Festival Internacional de Teatre de Sitges, 09/06/01) e Rexurdimento. Visións dun cego (Nove Dous Teatro S.L. Auditorio do Carballiño, Ourense 15/10/2000). Pertence ao consello de redacción de Erregueté. Revista Galega de Teatro. É colaborador, entre outras publicacións, das revistas de artes performativas ARTEZBLAI, Primer Acto e Danza en escena.