Xaime Varela Sieiro

É licenciado en Filoloxía Clásica e Filoloxía Hispánica (sección Galego-Portugués) pola USC e é doutor en Filoloxía Clásica (programa Estudos medievais) pola mesma universidade. No 2004 diplómase na EPHE de París (Section de sciences historiques et philologique). Exerce como docente de Lingua e Literatura Galega e coordinador do Equipo de Dinamización da Lingua desde 1995 en diversos institutos. Amais foi lector de lingua e literatura na Sorbonne Nouvelle-París III (1996-2001) e profesor de lingua no IE Cañada Blanch de Londres (2010-2015), onde creou e desenvolveu nas aulas e nas redes sociais o proxecto Galego en Londres, Premio da Cultura (2019) na súa modalidade de «Proxección no exterior». No eido da investigación tense ocupado en diversas publicacións do léxico da documentación altomedieval de Galicia e do asociacionismo e da produción cultural galega en Francia e no Reino Unido. A nivel local é membro do colectivo Baluarte dos Pendellos para a defensa e rehabilitación das construcións do antigo recinto feiral de Agolada.