Difusión

O máis destacado da cultura galega en 2023 segundo os seus xestores

  1. Inicio
  2. Eventos
  3. Difusión
  4. Documento de traballo

Difusión. Documento de traballo

O máis destacado da cultura galega en 2023 segundo os seus xestores

Luns, 26 de febreiro de 2024
consellodacultura.gal
Difusión
Documento de traballo

O máis destacado da cultura galega en 2023 segundo os seus xestores

consellodacultura.gal

A música e o audiovisual foron os elementos máis salientables da cultura galega en 2023, que destacou en especial aqueles elementos vinculados á proxección e visibilidade exterior da cultura galega, pero tamén os grandes eventos e programacións. Así se plasma no documento de traballo “O máis destacado da cultura galega en 2023 segundo os seus xestores”, que recompila as respostas de 960 entidades do sector cultural galego e que o Observatorio da Cultura Galega publicou como un avance do vindeiro Barómetro da Cultura Galega. Deste xeito, as Tanxugueiras encabezan a listaxe, cun 10,3% das respostas, seguidas moi de preto polo festival O Son do Camiño (10,1%), o filme O corno (7,4%), Yolanda Castaño co Premio Nacional de Poesía e a publicación de Materia (5,5%) ou o filme As bestas, de Rodrigo Sorogoyen (4,4 %). A porcentaxe expresa a coincidencia nas respostas do conxunto de entidades.
Tanto as Tanxugueiras, coa súa participación no Benidorm Fest, como O Son do Camiño xa obtiveran posicións destacadas no ano 2022, cun 21,1% e un 10,4% da mostra respectivamente. En xeral, o ámbito musical acada importantes referencias, como o dúo Fillas de Cassandra (1,5%) ou Leilía e a súa xira de despedida (1,2%). No ámbito audiovisual destacan tamén figuras individuais como Luis Tosar (1,4%) ou Luis Zahera (0,9%), así como outras mencións “en relación coa crecente importancia da visibilidade e recoñecemento deste ámbito da cultura”, como a Academia Galega do Audiovisual e os Premios Mestre Mateo (1,1%), ademais doutros festivais ou os contidos en galego das plataformas.

As diferentes programacións e os festivais ocupan tamén unha posición relevante, como os eventos culturais do Camiño de Santiago (4%), aínda que menor comparado co Xacobeo (22,3%) e ao mesmo nivel que a programación da Cidade da Cultura (4%).

Na mostra destaca tamén a presenza dos premios literarios, con Yolanda Castaño ou Paula Carballeira e o seu Premio Nacional de Literatura Dramática (2%), así como a relevancia singular de autores como Ledicia Costas (0,7%) ou Arantza Portabales (0,3%).

No plano das artes visuais destaca a “Celebración Picasso 1973-2023”, en referencia á exposición Picasso branco no recordo azul do Museo de Belas Artes da Coruña (1,8%), e tamén as exposicións da Fundación Marta Ortega, sobre todo a de Helmut Newton (1,6%), e as exposicións Cidades no tempo (0,7%).

A investigación
Os datos corresponden ás respostas de 960 entidades do sector cultural, que ofreceron 1314 respostas recollidas entre o 15 de xaneiro e o 9 de febreiro de 2024. Na enquisa, entre outras cuestións, preguntouse polos “tres eventos, accións culturais, persoas ou entidades máis salientables da cultura galega do ano 2023”. A recompilación das respostas a esta pregunta que se publica hoxe é un avance dos resultados dunha nova entrega do Barómetro da Cultura Galega, que o CCG realiza con carácter anual desde 2020 e que ten como obxectivo facer unha “diagnose avaliativa que permite retratar a situación, evolución, eivas, fortalezas e perspectivas das entidades culturais galegas”.

O documento completo pode consultarse aquí:
https://consellodacultura.gal/publicacion.php?id=4496
LUGAR
Consello da Cultura Galega
Pazo de Raxoi, 2º andar
Praza do Obradoiro, s/n 15705
Santiago de Compostela
Tel.: 981 957 202 / Fax.: 981 957 205
Ligazóns
Prensa
26-02-2024

Os eventos musicais, o audiovisual, o éxito exterior da cultura galega e as grandes mostras expositivas, no máis destacado polo sector cultural en 2023

 
Difusión.
Documento de traballo
O máis destacado da cultura galega en 2023 segundo os seus xestores
Data de publicación
Luns, 26 de febreiro de 2024
Onde
consellodacultura.gal
Enderezo

Consello da Cultura Galega
Pazo de Raxoi, 2º andar
Praza do Obradoiro, s/n 15705
Santiago de Compostela
Tel.: 981 957 202 / Fax.: 981 957 205

Organiza
Observatorio da Cultura Galega (CCG)