O título do proxecto expresa a súa dobre intención. Por unha banda, ‘caligrafías’ significa tanto “a arte de escribir con boa letra” como “o conxunto de trazos que caracterizan a escritura dunha persoa ou escrito”. Pola outra temos a música, obxectivo último desta iniciativa do Arquivo Sonoro de Galicia, que busca rescatar a erudición de prestixiosos estudosos do eido musical galego (Xosé Filgueira Valverde, Xosé López Calo…) e revalorizar, entre outros, compositores, estilos musicais ou instrumentos que forman parte da cultura musical de Galicia (Gaos, a zanfona etc.).
O Arquivo Sonoro de Galicia (ASG) abriu con este proxecto unha nova liña de divulgación dos seus fondos inéditos. Ten periodicidade bimestral e arrincou en febreiro de 2023 cunha conferencia de Filgueira Valverde verbo da faceta musical de Rosalía de Castro. Cada dous meses, presentaremos unha nova conferencia do noso fondo que permitirá coñecer o acervo musical do país da man dos seus máis grandes expertos.
O Consello da Cultura Galega publicou hoxe no seu web unha nova entrega das Caligrafías Musicais, a serie de conferencias de expertos sobre o patrimonio musical galego que recupera fondos pouco coñecidos do Arquivo Sonoro de Galicia. Desta volta, incorpórase unha intervención do folclorista Pedro Echevarría Bravo, realizada en Ferrol en 1984, onde dá conta dos paralelismos entre Negra sombra, a composición musical de Juan Montes inspirada no poema de Rosalía de Castro, e a danza prima asturiana. A conferencia xa está accesible no web do Consello da Cultura Galega.
Entre 1951 e 1960, o folclorista burgalés Pedro Echevarría Bravo percorreu Galicia recollendo preto de 1400 cancións de tradición oral, dentro das Misións Folclóricas organizadas polo Instituto Español de Musicoloxía do CSIC. Tamén participou activamente da vida musical como director de bandas como a de Santiago de Compostela. Nesta conferencia, Echevarría céntrase nunha das composicións máis célebres do Rexurdimento musical galego, o Negra sombra do lugués Juan Montes, no que se elaborou o coñecido acompañamento musical do poema de Rosalía de Castro. Echevarría estudou a proximidade entre a primeira cuarteta do Negra sombra e a danza prima asturiana, un dos cantos máis tradicionais da comunidade autónoma veciña.
A conferencia, dunha hora de duración, inclúe referencias eruditas sobre a obra de Montes e as posibles influencias de compositores asturianos como Anselmo González del Valle. O documento sonoro pertence á colección Caixa Galicia-Ferrol e custódiase no Arquivo Sonoro de Galicia do Consello da Cultura Galega.
