Xornada - O Patrimonio cultural nos espazos portuarios de Galicia. 13 de marzo de 2025
Xornada

O Patrimonio cultural nos espazos portuarios de Galicia

  1. Inicio
  2. Eventos
  3. Xornada

Xornada

O Patrimonio cultural nos espazos portuarios de Galicia

13 de marzo de 2025
Vigo
Xornada

O Patrimonio cultural nos espazos portuarios de Galicia

13 de marzo de 2025 Vigo
A xornada O patrimonio cultural nos espazos portuarios de Galicia é a primeira actividade que o Consello da Cultura Galega organiza en colaboración coa Escola Técnica Superior de Arquitectura da Universidade da Coruña. Ten por obxecto destacar a diversidade dos valores culturais de carácter material e inmaterial que acollen estes espazos, analizar a complexidade da súa protección e, ademais, presentar exemplos de actuacións arquitectónicas recoñecidas relacionadas cos portos.

Sendo Galicia, como sinala Murguía, «unha case península, con numerosos portos, refuxios benfeitores colocados entre os terribles mares de Portugal e os non menos feros e ásperos da costa cantábrica», os portos galegos, como espazos de comunicación e de actividade económica e comercial, desempeñaron un papel fundamental na construción do territorio litoral galego e da súa identidade cultural.

Desde a multitude de peiraos e pequenos varadoiros ao longo da costa, dos pequenos portos pesqueiros das vilas litorais aos grandes portos; dos portos romanos aos portos ligados ao desenvolvemento da pesca e da industria conserveira a partir da metade do século XIX e ao desenvolvemento industrial de Galicia no século XX, estes espazos conservan as pegadas das actividades que se levaron a cabo neles: navegación, pesca, comercio, construción naval, industria, tecnoloxías, coñecementos e recursos, organizacións, memoria social.

Recoñecer esas pegadas como patrimonio e preservalas cunha nova conciencia do seu valor cultural fai necesario non só compatibilizar a súa protección cos usos e actividades portuarios actuais e, en moitos casos, coa súa reutilización, senón tamén recuperar e favorecer o vínculo entre os portos e a cidadanía.

Exemplo desas actuacións de recuperación e transformación son as dúas intervencións que se van expoñer na xornada: a reurbanización do bordo do porto en Porto do Son, de Creus e Carrasco e rvr arquitectos, premiada pola solución da convivencia entre as actividades portuarias e urbanas, que favorece o contacto directo entre a cidade e o mar, e a rehabilitación do estaleiro tradicional Ciprián en Outes, de Fuertes Penedo Arquitectos, que recupera a configuración orixinal do edificio, en estado de ruína parcial, para un novo uso cultural.
Programa
O Patrimonio cultural nos espazos portuarios de Galicia
Programa en PDF
Prensa
12-03-2025

O patrimonio portuario analízase nunha xornada no Museo do Mar

Ficha técnica 
Xornada
O Patrimonio cultural nos espazos portuarios de Galicia
Cando
13 de marzo de 2025
Onde
Vigo
Lugar

Museo do Mar de Galicia
Avenida Atlántida, 160
36208 Vigo

Coordinación
Patricia Muñiz Núñez
Teresa Nieto Freire
Organiza
Consello da Cultura Galega
Escola Técnica Superior de Arquitectura. Universidade da Coruña
Sección de Patrimonio e Bens Culturais (CCG)
Colabora
Museo do Mar de Galicia