Biografía de Teresa Nieto Freire
É arquitecta e, desde 1989, funcionaria do Corpo Especial de Arquitectos da Xunta de Galicia, no que desenvolve a súa actividade no ámbito da protección do patrimonio cultural.
Foi xefa da Oficina Técnica do Instituto Galego da Vivenda e Solo, xefa do Servizo de Urbanismo de Pontevedra e subdirectora de Protección da Cidade e dos Camiños de Santiago no período 2006-2009. Tamén foi vicepresidenta do Comité Asesor do Camiño de Santiago e vogal de diversas comisións de patrimonio, entre elas a Comisión Territorial de Patrimonio Histórico de Pontevedra, a Subcomisión Xunta-Igrexa e o Consello Executivo da Axencia de Protección da Legalidade Urbanística.
Desde a Subdirección de Protección da Cidade e dos Camiños de Santiago deseñou e puxo en marcha a metodoloxía para a delimitación dos Camiños de Santiago co desenvolvemento dos estudos do territorio histórico dos Camiños e a elaboración da proposta de delimitación das rutas.
Participou como relatora en diversos congresos, xornadas e cursos en relación cos Camiños de Santiago, o patrimonio mundial e a protección e defensa do patrimonio cultural, organizados polo Ministerio de Cultura, pola Xunta de Galicia, polo Consello da Cultura Galega e polo Colexio Oficial de Arquitectos de Galicia. Foi profesora no Máster en Tecnoloxías para a Protección do Patrimonio Cultural Inmoble, da Universidade de Vigo, entre 2010 e 2013. É autora de diferentes publicacións, entre as que destaca Camiños de Santiago, 50 anos de desprotección patrimonial dun itinerario cultural (2013).
Publicacións nas que participou Teresa Nieto Freire
LIBRO
Foro Patrimonio e Sociedade
Guía práctica para a análise dun sector clave na gobernanza do futuro 2019-2021
LIBRO. ACTAS
A posta en valor do patrimonio cultural dos ríos
: Galicia e outros exemplos
Teresa Nieto Freire nas actividades do CCG
