Difusión - Consello de Galiza: Boletín Oficial Informativo. Xoves, 19 de xuño
Difusión

Consello de Galiza: Boletín Oficial Informativo

  1. Inicio
  2. Eventos
  3. Difusión

Difusión

Consello de Galiza: Boletín Oficial Informativo

Xoves, 19 de xuño
Consellodacultura.gal
Difusión

Consello de Galiza: Boletín Oficial Informativo

Consellodacultura.gal

Consello de Galiza: Boletín Oficial Informativo

Accede ao contido

O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), incorpora este mes de maio do boletín oficial informativo do Consello de Galiza. Son cinco números que van de 1963 a 1967, que se corresponden co intento de refundación da entidade orixinal que fora creada en 1944 en Montevideo por Castelao.
Orixinalmente, o Consello de Galiza foi creado o 15 de novembro de 1944 en Montevideo, Uruguai, como un órgano político do exilio galego durante a ditadura franquista. O seu principal impulsor e primeiro presidente foi Alfonso Daniel Rodríguez Castelao, ademais doutras figuras, defensoras do galeguismo desde o exilio, como foron Ramón Suárez Picallo e Antón Alonso Ríos. A súa función principal era representar a Galicia e os seus intereses políticos e culturais no exterior, actuando como un goberno galego no exilio, sen poder real pero cun valor simbólico fundamental para o desenvolmento do pensamento galeguista e democrático durante o franquismo. Despois da morte de Castelao, en 1950, comeza o seu declive, a pesar do intento de revitalización dos seus sucesores.

A cabeceira que hoxe se incorpora ao Repertorio da prensa da emigración galega é un exemplo dese intento de continuar coa reivindicación do Consello como institución lexítima. Súbense cinco números publicados en Bos Aires entre 1963 e 1967 que contaron coa participación de Luis Guede, Manoel Pazos, Manuel Pedreira, Moisés da Presa e Ricardo Flores, membros da comisión de seguimento. O boletín da conta das actividades desenvolvidas polo colectivo, como a creación do Premio Castelao, das normas de funcionamento interno do Consello de Galiza e, ademais, da conta das xuntanzas ordinarias.

Entre os números que se soben, atopase un de finais de 1963 co editorial "O ser i o non ser galego" que fai un balance histórico para tomar conciencia do seu propio valer e "poida desenvolver ao máximo as podencias criadores do seu pobo dando solucións xuntas ás dúas necesidades e problemas esenciais". Nese editorial afírmase que "somos un povo que ven persistindo ó longo da súa historia, no erro suicida de emborcar suas enerxias e capacidade creiadora sempre ó servicio de alleas empresas". Tamén recolle os nomes dos conselleiros e os integrantes das distintas comisión (comisión da facenda, comisión de cultura, comisión de relacións, xunta consultiva e a comisón fiscal) nese intento de recuperar o Consello de Galiza, que finalmente non foi posible.

O Repertorio da prensa da emigración galega
En 1998, froito dun traballo de investigación dirixido por Vicente Peña Saavedra, nace o Repertorio da prensa da emigración galega, un proxecto que busca difundir o patrimonio documental producido pola comunidade galega do exterior e que, hoxe en día, mantén actualizado o Arquivo da Emigración Galega do Consello da Cultura Galega. Nel, recompílase unha relación das publicacións galegas (boletíns, xornais de información xeral, revistas culturais, prensa política, revistas e voceiros internos das asociacións de emigrantes, publicacións institucionais etc.) editadas tanto polas asociacións de emigrantes como por persoeiros destacados da colectividade galega. Aínda que os números das diferentes cabeceiras se poden consultar directamente nas instalacións do AEG, cada mes dixitalízanse novos exemplares que se poñen á disposición dos usuarios e usuarias para seren consultados en liña no web institucional do CCG. Nas últimas entregas, que se publican o terceiro xoves de cada mes, subíronse trinta número do xornal Orientación Gallega de Bos Aires.
Prensa
19-06-2025

O Repertorio da prensa da emigración galega incorpora o boletín da segunda etapa do Consello de Galiza

 
Difusión
Consello de Galiza: Boletín Oficial Informativo
Data de publicación
Xoves, 19 de xuño
Onde
Consellodacultura.gal
Lugar

Consello da Cultura Galega
Pazo de Raxoi, 2º andar
Praza do Obradoiro, s/n
15705 Santiago de Compostela
Tel.: 981 957 202

Autoría
Arquivo da Emigración Galega (CCG)