Encontro - Os oficios do mar. 3 de xullo de 2025
Encontro

Os oficios do mar

  1. Inicio
  2. Eventos
  3. Comunidades e patrimonio cultural inmaterial
  4. Encontro

Comunidades e patrimonio cultural inmaterial Encontro

Os oficios do mar

3 de xullo de 2025
Ribeira
Encontro
Comunidades e patrimonio cultural inmaterial

Os oficios do mar

3 de xullo de 2025 Ribeira
Os coñecementos, as técnicas, as habilidades, os simbolismos, os usos e os procesos relacionados cos oficios artesanais e as súas tecnoloxías e capacidades e os saberes asociados aos procesos de produción forman parte das manifestacións do patrimonio cultural inmaterial. En Galicia, os oficios vinculados ao mar teñen unha especial relevancia para as comunidades que se desenvolveron tradicionalmente en equilibrio co ecosistema costeiro, creando unha cultura propia cuxa transmisión está ligada á supervivencia desas actividades.

As técnicas construtivas da carpintaría de ribeira son unha destas manifestacións, cuxa relevancia se recoñeceu na primeira declaración de ben de interese cultural dunha expresión do patrimonio cultural inmaterial realizada despois da entrada en vigor, no ano 2016, da Lei de patrimonio cultural de Galicia, que incorporou á lexislación autonómica as peculiaridades propias do patrimonio inmaterial, tendo en conta a súa natureza e as medidas específicas de protección, así como os principios fundamentais da Convención para a salvagarda do patrimonio cultural inmaterial.

Outros oficios, como o das redeiras, non teñen ese recoñecemento en canto manifestacións do patrimonio cultural inmaterial, nin contan con ese apoio para a súa salvagarda, entendida esta como o conxunto de accións de identificación, documentación, investigación, preservación, protección, promoción, valorización, transmisión e revitalización que poden establecerse desde a protección patrimonial. As profesionais redeiras, organizadas nas súas asociacións profesionais, levan tempo loitando para dignificar a súa profesión e sacala da situación de case invisibilidade na que se atopaba e para garantir a transmisión do oficio e a remuda xeracional.

Neste encontro faremos un percorrido por tales temas, desde a relevancia cultural dos oficios do mar ata a regulación do patrimonio cultural inmaterial en Galicia, coa implicación que outorga aos portadores das manifestacións no seu recoñecemento e salvagarda, e contaremos coa participación de representantes de dúas desas comunidades portadoras que nos falarán dos problemas do seu oficio e da contribución que ten, ou pode ter, a protección patrimonial para o seu coñecemento, práctica e transmisión.
Programa
Comunidades e PCI. Os oficios do mar
Programa en PDF
Comunidades e PCI. Os oficios do mar
Cartaz en PDF
Prensa
02-07-2025

Ribeira acolle unha xornada sobre os oficios do mar e o patrimonio cultural inmaterial

Temáticas
Patrimonio
Ficha técnica 
Encontro
Comunidades e patrimonio cultural inmaterial
Os oficios do mar
Cando
3 de xullo de 2025
Onde
Ribeira
Lugar

Centro Cultural Lustres Rivas
Rúa Manuel Lustres Rivas, 20
15960 Ribeira

Coordinación
Ana Estévez Lavandeira
Teresa Nieto Freire
Relator/a
Manuel Chaín Pérez
Lino Lema Bouzas
Rosa María Pardo Campaña
Gerardo Triñanes Fernández
Modera
Guadalupe Jiménez Esquinas
Organiza
Consello da Cultura Galega
Sección de Patrimonio e Bens Culturais (CCG)
Colabora
Concello de Ribeira