En xaneiro de 2020 o Consello da Cultura Galega presentou o Álbum de Galicia, unha colección dixital de biografías de persoas que destacaron en moi diversos ámbitos: a sociedade, a ciencia, a cultura ou a empresa. A idea é dar visibilidade e perspectiva de conxunto ás numerosas mulleres e homes, xa finados, que contribuíron de maneira significativa á sociedade galega ao longo da súa historia. En moitos casos, seguen a ser grandes descoñecidos para o público de todas as idades, de dentro e de fóra do país.
As biografías do Álbum de Galicia están enriquecidas con material documental, referencias bibliográficas e contidos multimedia que permiten coñecer a obra das persoas divulgadas, pero tamén a produción intelectual existente sobre elas. Os textos e materiais están producidos por persoas expertas e son unha fonte rigorosa para acceder á vida e obra destes persoeiros. Ademais, o Álbum de Galicia permite explorar a presenza das persoas biografadas nos fondos documentais dixitalizados do Consello da Cultura Galega. O Álbum de Galicia é, xa que logo, o punto de acceso que ofrece a entidade para coñecer toda a súa produción divulgativa e investigadora ao redor de cada unha das figuras.
O Álbum de Galicia, colección de biografías do Consello da Cultura Galega (CCG), incorpora hoxe a entrada de Prudencio Piñeiro Latierro (San Sebastián, 1838 - Ferrol, 1919). Pianista e dinamizador da cultura galega, autor de pezas de zarzuela, director da orquestra de Vigo, do orfeón de Pontevedra, fundador dunha academia de música na cidade e organista da igrexa parroquial de Ferrol. Nilo García Armas é o autor da entrada que está dispoñible para consulta no web do CCG.
Fillo do organista da igrexa castrense de San Francisco de Ferrol e director da orquestra de Vigo, o autor comezou a aprender música da man do seu pai. Nos seus primeiros anos como pianista interpretou zarzuelas e pezas nas diferentes festas de Pontevedra. Nesa cidade fundou tamén unha academia de música. Ao longo da súa traxectoria, colaborou con grandes intérpretes de renome e chegou a dirixir importantes agrupacións musicais do país e Portugal. García Armas, autor da entrada, salienta a participación de Piñeiro na Sociedade do Recreo Artístico de Vigo e a celebración dun concerto en Santiago, onde puido tocar con artistas como Hilario Courtier ou Eduardo Dorado entre outros grandes músicos da época.
.
Ademais da súa faceta como intérprete, compuxo pezas a partir de textos de Rosalía, como Un repoludo gaiteiro ou Como chove miudiño. Compuxo zarzuelas, vals de salón e música para orfeóns que puideron gozar as cidades de Braga, Vigo e Ponteareas. Participou ademais como xurado en certames musicais como os Xogos Florais de Ourense e desenvolveu pezas para actos relixiosos. Trala morte do seu pai, pasou a ocupar o seu posto como organista da igrexa parroquial de San Francisco de Ferrol. Na cidade departamental tamén dirixiu unha pequena orquestra para funcións relixiosas. Na mesma época presentou algunhas das súas composicións a diferentes concursos como o do diario El Heraldo de Madrid, ou a revista Arte Musical, onde obtivo varios premios e mencións.
Ao longo da súa vida mantivo unha relación profesional e persoal co compositor e editor Canuto Berea, que imprimiu algunhas das melodías do autor.
