Contido:
Luisa Vela (1884-1938) e Emilio Sagi-Barba (1876-1949) forman a parella lírica máis admirada e aplaudida do primeiro terzo do século XX. Nesta lousa, editada en 1914, está rexistrado o dúo de Rosa e Pablo, personaxes do I acto da zarzuela Maruxa, obra do compositor Amadeo Vives e libreto de Luis Pascual Frutos. Ambientada en Galicia, introduce elementos folclóricos e frases en lingua galega. Dende a súa estrea en 1914 como zarzuela e en 1915 como ópera, acada un notable éxito de público e crítica musical, pola súa estrutura narrativa e gran riqueza melódica.
