Contido:
O 20 de decembro de 1907 estréase no teatro Tacón da Habana, propiedade do Centro Galego, o "Himno galego", con letra de Eduardo Pondal (1835-1917) e música de Pascual Veiga (1842-1906). O promotor deste feito histórico é o galeguista afincado en Cuba Xosé Fontenla Leal. O coro Cántigas da Terra, moi activo social e musicalmente e vencellado ás Irmandades da Fala, interpreta o "Himno galego" en 1923 no enterro de Manuel Murguía. Esta gravación do "Himno a Galicia" está editada en Barcelona pola compañía Odeón en 1928.
