As cercas constitúen un elemento delimitador dos espazos urbanos con respecto ao exterior, mais teñen tamén un compoñente coercitivo e de control da poboación. Representan, así mesmo, un símbolo de poder que, na Idade Media, se materializou a través dos castelos e as murallas.


Nesta xornada, analizarase a función que desempeñaron os valados na época medieval. Ademais, profundarase en como a construción deste tipo de peches deriva dun proceso anterior localizado na base do feudalismo na Península Ibérica: o encastelamento. Contarase, para iso, con persoas expertas en diferentes áreas disciplinarias das humanidades, que realizarán un percorrido desde os primeiros castelos xa petrificados en Galicia ata diferentes vilas para as que as cercas constitúen parte da súa identidade e da súa conformación no pasado medieval.

O programa
Abrirá a cita Victoriano Nodar, da Universidade de Vigo, co relatorio “Os primeiros castelos de Galicia como elementos de control do territorio e símbolos do poder feudal”. A continuación, Xosé Manuel Broz falará sobre a cerca da vila melidense, mentres que Fran Alonso Toucido (Tempos Arqueólogos e Universidade de Santiago de Compostela) e Rebeca Blanco-Rotea, coordinadora da Sección de Patrimonio e Bens Culturais do CCG, farán o propio coa da vila da Guarda, en Pontevedra. Após as súas intervencións, o historiador e vicepresidente da Fundación Vicente Risco, Antonio Blanco, expoñerá o caso do castelo de Allariz. Pechará a xornada a arqueóloga Matilde González Méndez cunha conferencia que leva por título “Comunicar un patrimonio derruído. Investigación e valorización da muralla de Santiago”.