Xa está dispoñible unha nova entrega de Proxector, proxecto web do CDSG que xunta unha escolma de recursos audiovisuais útiles para profesorado e público xeral sobre distintos eidos do coñecemento. A nova edición deste mes ten a trigonometría como protagonista cunha ducia de pezas audiovisuais de carácter didáctico.

No especial ofrecido polo CCG pódense ver diversos materiais, entre os que se atopa un vídeo de introdución á trigonometría ou unha peza arredor dos usos das matemáticas na nosa vida cotiá. Tamén se poden ver dúas pezas de Xavier Pérez Couto, o divulgador AstroXabi: unha sobre conceptos básicos de astronomía e outra que ensina a calcular a latitude dun determinado lugar a partir das estrelas.

Nesta entrega tamén se recolle un vídeo que relata como é posible calcular o tamaño da terra co mesmo método que usou o grego Eratóstenes no ano 200 a.C. e outro sobre as medicións da liña costeira e as dificultades coas que se topan os cartógrafos no seu desempeño. As inquedanzas non rematan na Terra, xa que unha das pílulas audiovisuais conta a razón de que os científicos apunten cun láser medidor cada certo tempo á Lúa.

Outro dos vídeos aborda a distancia e nel formúlase a pregunta de cal ten que ser a distancia á que hai que situar unha persoa para que o ángulo de visión dunha estatua sexa máximo. Un problema enunciado polo matemático alemán Johann Müller Regiomontano, considerado, ademais, o creador da trigonometría. O científico, profesor da USC e divulgador Jorge Mira tamén ten o seu oco neste especial, neste caso coa explicación da pregunta “a que altura está o ceo?”

Sobre o matemático Rodríguez
O Consello da Cultura Galega, a Real Academia Galega de Ciencias e a Universidade de Santiago de Compostela presentan este xoves o libro José Rodríguez González (1770-1824). Un matemático sublime, ás 12:00 h, na Aula Magna da Facultade de Matemáticas da USC. Non é o único recurso que se pode atopar sobre o matemático, xa que a súa entrada tamén figura no Álbum de Galicia, escrita por Margarita Barral.

Un apoio audiovisual ao ensino en galego
Proxector: audiovisuais en galego para a docencia é un sitio web centrado en ofrecer de maneira atractiva e en lingua galega diversos materiais audiovisuais para o seu uso nas aulas de bacharelato e dos cursos universitarios. Para iso, unha vez ao mes escóllese unha temática protagonista, ao redor da cal se ofrecen para todo o público diversos vídeos elaborados por estudantes, divulgadores ou expertos sobre esta materia.

O proxecto orixinal foi deseñado polo Servizo de Normalización Lingüística da USC e comezou no ano 2015 dentro do portal educativo Didactalia. No 2018 o CCG, a través do CDSG, entrou na iniciativa para participar na comunicación e na edición dos contidos. Ademais, en virtude das competencias que lle son propias no coidado e difusión do idioma galego, o CCG pretende asumir a custodia destes materiais, ofrecidos a toda a sociedade nunha web dedicada a ese fin.