A socioloxía, a educación, a filosofía ou a xeopolítica son algunhas das caras que se exploran nos diferentes vídeos incluídos nesta entrega de Proxector. A escolma arrinca con dous traballos didácticos elaborados polo alumnado do IES Antón Alonso Ríos de Tomiño arredor dos Obxectivos de Desenvolvemento Sostible (ODS), aprobados pola ONU en 2015 no marco da Axenda 2030. Trátase de dúas pezas breves: unha presenta os 17 obxectivos para un futuro sostible e outra céntrase no número 16, que pon o acento na necesidade de promover sociedades xustas, pacíficas e inclusivas. Outro par de vídeos afonda no significado da xustiza social e da equidade.

Tamén se inclúe unha serie de producións que recollen o labor de distintos centros vinculados ás universidades galegas neste eido. Así, o grupo ECOSOT da Universidade de Vigo analiza, entre outras liñas de investigación, a segregación ocupacional da poboación inmigrante; e o Centro de Estudos de Seguridade (CESEG) da Universidade de Santiago estuda como a xeografía humana e a xeografía física inciden nas relacións de poder, nas dinámicas políticas e nas relacións internacionais.

Completa esta entrega un vídeo sobre o Seminario Galego de Educación para a Paz, creado en 1985, que continúa a elaborar materiais didácticos neste ámbito; e unha charla TED impartida por Ellen Johnson Sirleaf, primeira muller presidenta dunha nación africana e gañadora do Premio Nobel da Paz. En menos de quince minutos, Sirleaf explica como as mulleres de Liberia contribuíron a reconstruír o país tras anos de guerra civil, e subliña que a equidade de xénero é esencial para garantir a paz e a prosperidade. O especial péchase cun vídeo divulgativo que reflexiona sobre que sucedería se se detonasen, de xeito simultáneo, todas as bombas nucleares existentes na Terra (arredor de 15.000).

Proxector
Proxector: audiovisuais en galego para a docencia é un espazo web dedicado a recompilar, clasificar e difundir recursos audiovisuais que sirvan de apoio á docencia en lingua galega de diversas materias de bacharelato e de ensino universitario.
O proxecto orixinal foi deseñado polo Servizo de Normalización Lingüística da Universidade de Santiago de Compostela e botou a andar no ano 2015 no portal educativo Didactalia. En 2018 o CCG, a través do Centro de Documentación Sociolingüística de Galicia (CDSG), sumouse á iniciativa e comezou a participar de xeito activo tanto na súa coordinación como na edición de contidos. Cumprindo coas competencias que lle son propias no eido da preservación e difusión do idioma galego, o CCG acordou asumir tamén a custodia dos datos recompilados ao longo destes anos e que, a partir de agora, estarán ao dispor da cidadanía no sitio web institucional.
Os vídeos están clasificados segundo a súa temática, o idioma no que foron gravados ou subtitulados e o nivel de ensino no que se considera que poden ser empregados. A maiores, ofrécese unha ficha descritiva coa información básica de cada recurso. Pódese acceder aos contidos a través da busca libre ou dos diferentes despregables, que permiten filtrar os resultados segundo os criterios de clasificación antes citados.