A secretaria do CCG, Paula Cabaleiro, abriu o acto e deu lectura ao Decreto 60/2026 polo que se nomea a Dolores Vilavedra como presidenta. No seu discurso Vilavedra situou a produción de coñecemento no centro da misión da institución. Defendeu o CCG como un espazo de reflexión transversal e interdisciplinario capaz de ofrecer análises rigorosas que sirvan de referencia para a sociedade e para os poderes públicos. “Entre as moitas competencias que ao CCG lle corresponden por mandato legal, estou firmemente convencida de que hai unha que, dalgún xeito, abrangue todas: a de ser un ente activo de produción de coñecemento”, afirmou. Definiu as liñas estratéxicas do seu mandato, que pasan por reforzar o Observatorio da Cultura Galega, impulsar os dereitos culturais, ampliar os públicos da institución e adaptar o Consello aos retos do presente e do futuro. Entre as primeiras iniciativas avanzadas figuran a elaboración dun informe sobre a lectura en Galicia e a posta en marcha dun plan cuadrienal de dixitalización.

Vilavedra ofreceu ao Goberno galego “lealdade e respecto institucional, máxima colaboración e a nosa maior vontade de manter activas canles de comunicación fluídas”. Ao tempo, reivindicou a autonomía orgánica e funcional do Consello da Cultura Galega como condición indispensable para garantir a independencia, a obxectividade e o cumprimento da súa misión de defensa e promoción da cultura galega.

Outro dos eixes do seu discurso foi o reforzo do traballo na Rede. Vilavedra apostou por ampliar a colaboración co asociacionismo cultural, o sistema educativo, os centros de estudos galegos no exterior e as novas diásporas, así como por fortalecer o papel do Pleno, das seccións e das comisións como espazos de participación e representación da diversidade cultural galega. Ademais, expresou un compromiso “como cidadá e como presidenta” na defensa da lingua galega, e a necesidade de favorecer unhas condicións de uso, transmisión e difusión que aseguren o seu futuro. Xunto a isto, chamou a prestar maior atención á crecente diversidade cultural e lingüística da sociedade galega, “preocúpannos os atrancos que estes novos grupos cidadáns poidan atopar no acceso á nosa lingua e á nosa cultura. Garantir o seu dereito a seren galegos e galegas de pleno dereito tamén nas prácticas culturais debería ser unha prioridade nos vindeiros anos”.

O presidente da Xunta, Alfonso Rueda, amosou o seu apoio á nova titular e fixo fincapé na fortaleza e no dinamismo que amosa actualmente o sector cultural na comunidade, grazas ao talento dos creadores locais. Así mesmo, subliñou que a acción cultural é unha prioridade transversal para a Xunta e apuntou a retos fundamentais que requiren a implicación de toda a sociedade a curto e medio prazo, entre os que salientou a procura de consensos arredor do Pacto pola Lingua neste 2026.

Vilavedra sucede a Rosario Álvarez, quen presidiu o Consello desde 2018 e no seu discurso de despedida definiu o seu mandato como “colaborativo, participativo e non presidencialista”. A presidenta saínte destacou o fortalecemento da rede institucional e social do Consello, a descentralización da súa programación, a aposta pola dixitalización e, especialmente, o contacto coa cultura de base. “Unha das maiores satisfaccións foi corroborar a forza da cultura de base, a que fan día a día homes e mulleres de todas as idades, en verdadeira transmisión interxeracional”, asegurou, antes de expresar a súa confianza na nova presidenta e o seu ofrecemento a seguir colaborando: “sempre me encontrará á disposición dela e do Consello da Cultura Galega para o que sexa mester”, apuntou.

O acto contou cun programa musical concibido como un diálogo entre literatura e creación musical. A apertura correu a cargo de Canto de berce, de Marcial del Adalid, sobre un poema de Fanny Garrido, unha obra que evoca a transmisión da memoria e do legado cultural entre xeracións. No ecuador do acto interpretouse Les roses de Saadi, da compositora Eugenia Saunier, sobre versos de Marceline Desbordes-Valmore, como símbolo da permanencia da creación artística fronte ao paso do tempo. O peche chegou con Maio longo, de José Baldomir, sobre un poema de Rosalía de Castro, unha composición emblemática do repertorio galego que proxecta unha mensaxe de esperanza, continuidade e renovación. As tres interpretacións estiveron a cargo da mezzosoprano Nuria Lorenzo López, acompañada ao piano por Alejo Amoedo Portela, recoñecido pianista e vicepresidente do CCG.