Arquivo de noticias do CCG

Portugal celebra o 500 aniversario do nacemento dunha das figuras máis sobranceiras da cultura portuguesa: Luís Vaz de Camões. O Consello da Cultura Galega (CCG), en colaboración coa Real Academia Galega (RAG) máis a Cátedra de Estudos Galegos da Facultade de Letras da Universidade de Lisboa (FLUL), organizan varias actividades en Lisboa encamiñadas a estreitar as relacións entre a cultura galega e portuguesa no marco dos actos conmemorativos. Unha delas é a exposición “Sob o signo de Camões. Exposição do livro galego da FLUL” que a presidenta do CCG, Rosario Álvarez, inaugura esta tarde. Outra é encontro-diálogo “Vidas paralelas” que terá lugar mañá mércores no que participan Hélio Alves e Xosé Manuel Dasilva e que afonda na pegada e no impacto creativo da obra camoniana nos autores máis importantes da literatura galega.

“Xohán Vicente Viqueira (1886-1924) No centenario do seu pasamento” é o título da xornada que terá lugar o martes 22 de outubro (19:00 horas) no salón de actos da Casa Galega da Cultura, en Vigo. O evento, organizado polo Consello da Cultura Galega (CCG), a Fundación Penzol e o Concello da cidade, afondará na produción e a vida deste intelectual galego. A presidenta do CCG, Rosario Álvarez e o presidente da Fundación Penzol, Manuel Puga, inauguran esta cita coordinada por Malós Cabrera, vicepresidenta da fundación. A asistencia será libre e gratuíta ata completar a capacidade.

Carlos Casares desempeñou un papel central na difusión da cultura galega, sobre todo polo seu carácter de embaixador, de “tecer pontes”, e tamén pola súa versatilidade. Estas ideas afloraron na maior parte das intervencións dun encontro que durante dous días xuntou no Consello da Cultura Galega (CCG) profesionais do xornalismo, da literatura, da investigación e algunhas amizades. A cita, coordinada por Dolores Vilavedra, serviu tamén para descubrir facetas menos coñecidas del, como a súa fascinación pola ciencia ou a súa dimensión relixiosa. O encontro rematou esta mañá cunha análise do seu labor como escritor en xornais.

Carlos Casares foi, para a cultura galega, moito máis que un creador. A súa faceta pública como escritor e como intelectual centra un encontro que o Consello da Cultura Galega (CCG) organiza desde mañá en Santiago de Compostela. Esta cita pretende analizar o papel desempeñado por Casares no campo político-cultural da Transición así como a actividade difusora da cultura galega no exterior. O presidente do Consello da Cultura Galega, Ramón Villares, o presidente da Real Academia Galega, Víctor Freixanes, e un representante da familia Casares inauguran esta cita que se poderá seguir en directo por Internet.

Autor dunha obra enriquecida cun grande substrato poético, o legado literario e xornalístico de Álvaro Cunqueiro revive baixo as novas miradas do congreso internacional “Mil e un Cunqueiros” inaugurado hoxe na sede do Consello da Cultura Galega. O creador, o narrador o xornalista foi esencialmente un poeta, como salientou o escritor César Antonio Molina na conferencia inaugural. Unha figura emblemática da literatura, galega e española, do século XX, que merece ser estudada e divulgada, como subliñou Ramón Villares, presidente da institución cultural organizadora do evento xunto coas tres universidades galegas. Villares recordou que era este o acto central do “Ano Cunqueiro”, impulsado e coordinado desde o Consello da Cultura para conmemorar o centenario do escritor (Mondoñedo, 1911-Vigo, 1981). No acto inaguural interviron tamén Manuel Fernández Iglesias e Francisco Durán, vicerreitores das universidades de Vigo e Santiago, respectivamente, e José María Barja, reitor da Universidade da Coruña, en cuxo Paraninfo se desenvolverán mañá, xoves, as sesións deste congreso itinerante.