Arquivo de noticias do CCG

O presidente do Consello da Cultura Galega, profesor Ramón Villares, concluiu en Sao Paulo (Brasil) un periplo que o levou tamén, desde o 19 de marzo, a Bos Aires e Montevideo. En Sao Paulo impartiu no Instituto “Itaú Cultural” un seminario para xerentes e coordinadores desa institución e dirixentes de instituciós culturais paulistas. Falou sobre “As institucións culturais de Galicia e as expectativas e os desafíos da cooperación cultural”.

Hoxe presentamos a nova etapa do Álbum da Ciencia. Nesta entrevista, o seu coordinador, Xosé A. Fraga, explícanos as claves do novo Álbum.

O presidente do Consello da Cutlura Galega, Ramón Villares, inaugurou hoxe no Patronato da Cultura Galega, en Montevideo (Uruguai) a exposición itinerante “OS ADEUSES, 73 imaxes da emigración galega (1957-1963)” captadas polo fotoxornalista Alberto Martí. A mostra, promovida e organizada polo Consello da Cultura Galega (CCG) e o Centro Galego de Artes da Imaxe (CGAI), percorreu toda Galicia en 2011. Ramón Villares continúa así o periplo que persoalmente iniciou en Bos Aires o 19 de marzo e que rematará en Sao Paulo o vindeiro día 27.

O Consello da Cultura Galega publicou en audio na Mediateca todas as intervencións realizadas nos XIV Encontros pola Normalización Lingüística, canda outros materiais que permiten seguir os relatorios e os debates. Pode consultalos aquí.

O presidente do Consello da Cultura Galega, Ramón Villares, ponunciará conferencias en Bos Aires e Sao Paulo e inaugurará unha exposición en Montevideo. Na capital arxentina presentará o libro “Luís Seoane, entre Galicia y la Argentina” nun coloquio previsto para o 21 de marzo no Museo de Arte Latinoamerixcano de Buenos Aires (MALBA). En Montevideo inagurará a exposición “Os Adeuses. 73 imaxes da emigración galega (1957-1963” o día 23 no Patronato da Cultura Galega e, finalmente, o día 26 de marzo en Sao Paulo, no Instituto Itaú Cultural, dirixirá un seminario sobre “Institucións e cooperación cultural”.

Ricardo Gurriarán, comisario da mostra Asociacionismo cultural en Galicia 1961-1975 que o CCG inaugurará esta primavera no Museo do Pobo Galego explícanos as claves do proceso de produción e amósanos unha escolma dos materiais que se exhibirán.

O Consello da Cultura Cultura Galega, a través da súa Sección de Patrimonio e Bens Culturais, colaborará coa Asociación de Empresas e Profesionais da Conservación e Restauración de Bens Culturais de Galicia (CRG) na valorización do patrimonio artístico e cultural galego. Con esa finalidade promoverá accións e foros para fomentar o coñecemento e a divulgación do legado atesourado por Galicia, a terceira comunidade autónoma de España en riqueza artística.

A mocidade e o seu uso das redes sociais suponen para o idioma galego unha oportunidade evidente con todo por facer, xa que a presenza do galego percíbese “escasa e insuficiente”. Así o reflicte o avance dun informe que está a elaborar Fernando Ramallo, profesor da Universidade de Vigo, que hoxe presentou un avance nos XIV Encontros para a Normalización Lingüística. O informe parte dunha enquisa entre 1.295 estudantes de bacharelato, ciclos e universidade e foi encargado pola Secretaría Xeral de Política Lingüística. A atención ao comportamento da mocidade galega nas redes sociais dominou a segunda e última xornada dos Encontros organizados polo Centro de Documentación Sociolingüística do Consello da Cultura Galega e celebrados na Cidade da Cultura de Galicia coa asistencia de máis de cen investigadores e xestores lingüísticos.

A normalización do galego debe ser un reto para o conxunto da sociedade e non só para os poderes públicos. Así a ve o sociolingüista e académico Henrique Monteagudo, que hoxe abriu os XIV Encontros para Normalización Lingüística organizados polo Centro de Documentación Sociolingüística do Consello da Cutlura Galega. No acto inaugural o presidente da instituciòn, Ramón Villares, apostou “pola vía do consenso para revertir unha situación que é reversible”. Pola súa parte, o Secretario Xeral de Política Lingüística, Valentín García, afirmou que a mocidade “é un dos ámbitos prioritarios para a dinamización da nosa lingua”. Nos Encontros, que mañá rematarán no auditorio da Bilbioteca de Galicia da Cidade da Cultura, participan máis de cen investigadores e xestores lingüísticos que reflexionan e debaten sobre as distintas vías de relación entre lingua galega e mocidade.

Máis de cen investigadores e xestores lingüísticos, case o 75 por cento mulleres, participarán nos “XIV Encontros para a Normalización Lingüística” organizados polo Centro de Documentación Sociolingüística de Galicia do Consello da Cultura Galega. Coordinados por Henrique Monteagudo e Susana Mayo, os Encontros desenvolveranse os días 8 e 9 de marzo no auditorio da Biblioteca de Galicia da Cidade da Cultura en Santiago de Compostela e centraranse fundamentalmente na problemática relación entre a lingua galega e a mocidade. O acto inaguural terá lugar o xoves día 8 ás 10 horas presidido po Ramón Villares, presidente do CCG, ao que acompañarán Valentín García Gómez, Secretario Xeral de Política Lingüística, Henrique Monteagudo, coordinador, e David Barro e Valentina Formoso en representación das Coordinadoras de Normalización da lingua.

O conselleiro de Cultura, Educación e Ordenación Universitaria, Jesús Vázquez Abad, e o presidente do Consello da Cultura Galega, Ramón Villares, asinaron hoxe un protocolo de colaboración para a normalización lingüística, que permitirá ampliar e compartir na Rede os servizos e os recursos deseñados e implementados desde o Centro de Documentación Sociolingüística de Galicia (www.consellodacultura.org/arquivos/cdsg/). Destacan a Biblioteca para a Normalización Lingüística e a plataforma d-Lingua para a promoción do galego. Ramón Villares agradeceu a continuidade da colaboración iniciada pola Consellería en 2010 e Jesús Vázquez Abad afirmou que o acordo complementa outras liñas de cooperación como a dos XIV Encontros para a normalización lingüística que o Consello da Cultura celebrará os días 8 e 9 de marzo na Cidade da Cultura de Galicia.

A Galería Sargadelos, (Praza de Santo Domingo, 4 de Lugo) acolleu o 29 de febreiro ás 20 horas a presentación do libro EMIGRANTE DUN PAÍS SOÑADO. LUÍS SEOANE ENTRE GALICIA E ARXENTINA, editado polo Consello da Cultura Galega. O libro subliña a “dobre cidadanía” que marcou a biografía de Luís Seoane “combinando unha idea concibida desde Galicia coa achega dunha perspectiva propiamente arxentina”, en palabras de Ramón Villares, quen alén da dimensión artistica salientou a figura do intelectual "un ideólogo cun proxecto cultural para modernizar Galicia".
Na presentación xunto con Ramón Villares, presidente do Consello da Cultura Galega e editor do libro, interviron Benxamín Casal, presidente da Editorial Galaxia e o profesor da USC e escritor Claudio Rodríguez Fer.

Son 140 as persoas pre-inscritas para participar nos XIV Encontros para a Normalización Lingüística organizados polo Centro de Documentación Sociolingüística do Consello da Cultura Galega. Coordinados por Henrique Monteagudo e Susana Mayo, os Encontros desenvolveranse os días 8 e 9 de marzo no auditorio da Biblioteca de Galicia da Cidade da Cultura en Santiago de Compostela e centraranse fundamentalmente na relación entre a lingua galega e a mocidade. O programa e os trámites para a matriculación poden consultarse en www.consellodacultura.org

O Consello da Cultura Galega celebrará o vindeiro 24 de maio a xornada “Xigantes ou ananos? Celso Emilio Ferreiro e o debate sobre a emigración galega”. Tres relatorios e unha mesa redonda abordarán a biografía político-intelectual de Celso Emilio (Celanova, 1912-Vigo, 1979) no marco dos actos conmemorativos do seu centenario. Coordina a xornada o profesor Xosé Manoel Núñez Seixas.

Empresas do sector da cultura presentan unha boa capacidade de adaptación en tempos de crise económica. Así o reflicten os datos presentados hoxe polo Observatorio da Cultura Galega, do Consello da Cultura Galega, no Encontro Internacional Economía e Cultura, que se celebra na Cidade da Cultura de Galicia. Segundo este estudo, elaborado a partir do Índice de Rendemento do Trinomio Economía+Cultura+Creatividade (IRTECC), estas empresas “son produtivas e eficientes, ofrecen servizos e produtos atractivos, teñen potencial de crecemento e semellan comportarse mellor que as incluídas noutros indicadores”, explicou Hakam Casares, coordinador do Observatorio. O relatorio pode verse completo en:
http://observatorio.consellodacultura.org/

Publicada orixinalmente en 1996 polo Arquivo Sonoro de Galicia co gallo do Día das Letras Galega dedicado ao polígrafo Xesús Ferro Couselo, e dentro da súa iniciativa de dixitalización da colección As Nosas Voces, poden consultar dentro da Mediateca do CCG a conferencia "Orixe e formación da cidade de Ourense", impartida por este autor en 1968.

Acceda á Mediateca

Se o dereito, esencial, á cultura propia non se ten cualificado ata hoxe como dereito humano de alcance xeral é porque a orde internacional segue tendo o seu último fundamento nos Estados e non nos Dereitos. Así argumentou o profesor Bartolomé Clavero, catedrático de Historia do Dereito e das institucións, da Universidade de Sevilla e membro do Foro Permanente das Nacións Unidas para as cuestións indíxenas, no seminario interdisciplinar “Os sentidos das culturas”, do Consello da Cultura Galega. A conferencia co título "¿Cómo é que non hai un dereito humano á túa cultura propia?” iniciou o sexto ano dun ciclo de reflexións e debates coordinado polo profesor Ramón Maiz.

O Consello da Cultura Galega incorporou nestes días á Mediateca da institución a dixitalización de novos volumes da colección As Nosas Voces, que editou o Arquivo Sonoro de Galicia na década dos 90. Son valiosas achegas sonoras coa voz de Rafael Dieste, Ramón Piñeiro, Ramón Suárez Picallo e Manuel Meilán que pode consultar na Mediateca do CCG.

O conselleiro de Cultura, Educación e Ordenación Universitaria, Xesús Vázquez Abad, e o Secretario Xeral de Cultura da Xunta de Galicia, Anxo Lorenzo Suárez, visitaron esta tarde o Consello da Cultura Galega. Foron recibidos polo presidente da institución, Ramón Villares, con quen mantiveron unha reunión de traballo, á que tamén asistiron Francisco Díaz Fierros e Rosario Álvarez, vicepresidentes, e o xerente Marcelino Fernández Santiago. Neste primeiro encontro institucional falouse, entre outros temas, da colaboración por parte do Consello da Cultura Galega, primeira institución cultural e órgano estatutario de carácter asesor e consultivo dos poderes públicos de Galicia.

Dentro da iniciativa para a dixitalización da colección As nosas voces, editada nos 90 polo CCG en cassete, é a quenda de Ramón Otero Pedrayo en América (I), publicada polo Arquivo Sonoro de Galicia en 1993. O volume recolle a intervención de Don Ramón Otero Pedrayo nun acto con emigrantes da colectividade galega de Bos Aires, e pódese descubrir a vibrante oratoria do profesor ourensán.


Escoite a conferencia na Mediateca