Arquivo de noticias do CCG

A presidenta do Consello da Cultura Galega (CCG), Rosario Álvarez, e o Secretario Xeral da Emigración, Antonio Rodíguez Miranda revisaron as actuacións conxuntas para o coñecemento e divulgación da emigración galega no marco da xuntanza que mantiveron na sede do CCG. A dixitalización dos fondos de sociedades de emigrantes na Península Ibérica, así como os referentes aos procesos de emigración galega centrarán as liñas de acción para os vindeiros meses.

Fernando Blanco de Lema (Cee, A Coruña, 1796 - A Habana, Cuba, 1875) mudou a historia de Cee cando, tres días antes do seu falecemento, expresou a súa vontade de destinar o seu capital á fundación dun colexio de primeira e segunda ensinanza na súa vila natal. Este desexo traduciuse na construción do actual IES Fernando Blanco e da antiga Escola de Nenas, dous centros que foron o motor educativo e cultural de Cee naquela época. A súa biografía no Álbum de Galicia é autoría de Darío Areas Domínguez.

Dar a coñecer o conxunto de cruceiros góticos da nosa comunidade é o obxectivo desta xornada, que se celebrará este mércores, 30 de novembro, no Centro Sociocultural Mingos de Pita (Melide). Nela reuniranse diversos expertos, que analizarán a importancia que teñen estas xoias patrimoniais tanto no conxunto monumental da nosa terra como na mentalidade colectiva. A actividade está organizada polo Consello da Cultura Galega (CCG) e conta coa colaboración do Museo da Terra de Melide e o apoio do Concello de Melide. A presidenta do CCG, Rosario Álvarez, e o alcalde de Melide, José Manuel Pérez Pena, inauguran esta cita que será gravada e posteriormente se incorporará á hemeroteca dixital da institución.

Martín Sarmiento (1695-1772) foi un pioneiro en concibir Galicia como país, como conxunto. No 250º cabodano da súa morte, o Consello da Cultura Galega (CCG) afonda no seu legado cun simposio. Da man dunha serie de especialistas internacionais analizáronse os variados intereses e temáticas que o erudito abordou no seu texto máis destacado, a Obra de 660 pliegos, composta por cinco tomos. Ademais, no marco do simposio, Henrique Monteagudo presentou o primeiro volume desta obra (o segundo, o terceiro e o cuarto volume saíron do prelo hai varios anos e o quinto está en formato dixital) que axuda a completar un proxecto que permite poñer a disposición pública o pensamento dun dos pioneiros do galeguismo. A presidenta do CCG, Rosario Álvarez, destacou na inauguración que a institución prestou sempre gran atención sobre a extraordinaria figura de Sarmiento “que todo o merece”. O simposio remata este martes coa revisión das ciencias naturais na obra sarmentina.

O Consello da Cultura Galega (CCG) acode á 15ª edición do Culturgal, que se celebra do 24 ao 27 de novembro no Pazo da Cultura de Pontevedra, con dúas actividades relacionadas coas accións de asesoría e divulgación cultural que mantén a institución. A primeira terá lugar este venres coa proxección de Sophias, serie web para dar a coñecer, en clave galega, as figuras e temas de filósofas destacadas na historia do pensamento. A segunda será o sábado cando se explicará os informes e estudos realizados polo Observatorio da Cultura Galega.

Desde mediados do século XIX, pescadores e mariñeiros da ría de Ares asentáronse en Cuba, onde traballaron na frota pesqueira, no transporte de mercadorías e pasaxeiros, nos estaleiros ou en empresas subsidiarias do naval. Neste tempo, conseguiron dominar o sector da pesca na badía da Habana e mesmo no golfo de México. O novo especial de Historias de ida e volta, proxecto do Arquivo da Emigración (AEG) do Consello da Cultura Galega (CCG) que conta co apoio da Secretaría Xeral da Emigración, reflicte en vinte imaxes e documentos os labores desempeñados por estes emigrantes galegos no sector pesqueiro, fundamentalmente, pero tamén noutras actividades relacionadas co comercio, a hostalaría ou a explotación do carbón.

O Álbum de Galicia, a colección dixital de biografías do Consello da Cultura Galega (CCG), inclúe a traxectoria do escritor e intelectual Xosé Neira Vilas (Gres, Vila de Cruces, Pontevedra, 1928 – 2015). Ademais, coincidindo co centenario do seu nacemento, incorpórase tamén a da escritora e activista pola memoria histórica Mariví Villaverde Otero (Vilagarcía de Arousa, Pontevedra, 1922 – Ribadumia, Pontevedra, 2017). A primeira das biografías é autoría de Valentín García Gómez, secretario xeral de Política Lingüística, mentres que a segunda está asinada pola escritora Marga do Val.

A Sección de Creación e Artes Visuais Contemporáneas do Consello da Cultura Galega (CCG) organiza este mércores, 23 de novembro, ás 17:00 horas, a xornada Edición gráfica. Nela, o artista visual Darío Urzay e o director da Agencia Pública Casa Natal Pablo Ruiz Picasso, da Colección del Museo Ruso e do Centro Pompidou do Concello de Málaga, José María Luna, analizarán a obra gráfica, a súa relación con outras dinámicas de expresión artística e os problemas que afronta na actualidade. A actividade está coordinada por Jesús Pastor Bravo e, malia ser presencial, tamén se poderá seguir en directo a través das redes sociais da institución.

En Galicia hai 266 corais que agrupan a unhas 6100 persoas. O 70 % dos integrantes destas entidades teñen máis de 60 anos, son maioritariamente mulleres e a súa formación é autodidacta, malia que están dirixidas por profesionais titulados. É o perfil das formacións que describe o informe As corais en Galicia, o primeiro estudo sobre esta realidade que acaba de elaborar o Observatorio da Cultura Galega, servizo dependente do Consello da Cultura Galega (CCG). O informe, que xa está dispoñible para a súa descarga, presentouse no marco da xornada As corais: dinamizadoras imprescindibles do tecido cultural galego, que busca achegarse á importante función divulgativa e pedagóxica que desempeñan as corais e profundar no seu papel como forzas vertebradoras e dinamizadoras do tecido cultural.

As corais: dinamizadoras imprescindibles do tecido cultural galego é o título da xornada que se celebra na tarde deste martes, 22 de novembro. Nela, analizarase a incidencia social das máis de trescentas corais existentes na nosa comunidade e se presentará o primeiro informe que analiza esta realidade. A actividade está organizada pola Sección de Artes Escénicas, Musicais e Audiovisuais do Consello da Cultura Galega CCG) baixo a coordinadción de Alejo Amoedo e Cristina Domínguez Dapena. Recoñecidos profesionais achegaranse á importante función divulgativa e pedagóxica que desempeñan as corais e, profundarán no seu papel como forzas vertebradoras e dinamizadoras do tecido cultural. A sesión é presencial, pero tamén se poderá seguir en directo a través das redes sociais da institución.

Simone Weil, Simone de Beauvoir, Hannah Arendt, Judith Butler ou María Xosé Agra son algunhas das figuras que protagonizan Sophias, o último proxecto do Consello da Cultura Galega (CCG) que pretende reivindicar a importancia das filósofas e a vixencia do seu pensamento. A presidenta do CCG, Rosario Álvarez, presentou esta mañá no IES Politécnico de Vigo o proxecto que “inclúe dunha maneira moi especial a visión que as mulleres tiveron dentro da historia”. Euloxio Santos Leites, director do centro agradeceu a elección deste que ten case un século de historia formando profesionais con pensamento crítico. “Hoxe é un día de festa e de reivindicación histórica porque no Día Mundial da Filosofía traemos o pensamento das mulleres filósofas que foron esquecidas, invisibilizadas na historia do pensamento” apuntou Carme Adán, responsable deste proxecto elaborado por Cristina de la Torre e interpretada por María Roja e Marta Pérez. As actrices estiveron tamén presentes nun acto no que a filósofa María Xosé Agra ofreceu un relatorio sobre a importancia das mulleres na filosofía.

Afondar no proxecto de educación patrimonial levado a cabo no Colexio de Nosa Señora da Antiga, en Monforte de Lemos, é o obxectivo da xornada O Colexio de Nosa Señora da Antiga (Monforte de Lemos, Lugo). Un exemplo de educación patrimonial. A actividade, que forma parte das accións con que o Consello da Cultura Galega (CCG) conmemora o Día do Patrimonio Mundial, desenvolverase ata o sábado nas instalacións do propio colexio. A cita, coordinada por Rebeca Blanco-Rotea e Mar Bóveda López, forma parte das actividades desenvoltas pola Sección de Patrimonio e Bens Culturais do CCG. Na súa inauguración participarán Rosario Álvarez, presidenta do CCG; José Tomé Roca, alcalde do Concello de Monforte de Lemos; María del Carmen Martínez Insua, directora xeral de Patrimonio Cultural da Xunta de Galicia; Francisco Javier Agudo, xerente da Fundación Colexio Nosa Señora da Antiga, e Mª del Mar Bóveda López, coordinadora do encontro. A sesión non se poderá seguir en directo, pero será gravada e estará proximamente dispoñible na hemeroteca do CCG.

O Repertorio de prensa da emigración, proxecto do Arquivo da Emigración Galega (AEG) do Consello da Cultura Galega, suma 24 novos números da revista Acción Española, órgano oficial do Centro Gallego de México. Foi unha publicación creada para informar a colonia española residente en México sobre as diversas entidades de emigrantes españois que traballan a prol dos seus intereses. Conta con moitas noticias sobre a política e os políticos españois do momento, así como dos mexicanos.

A expresión do seu canto, o timbre aveludado da súa voz, o seu talento vocal e escénico ou a súa precisión musical foron calidades que destacaron os medios de comunicación sobre María Luisa Nache (Ferrol, 1924 - A Coruña, 1985). A soprano tivo unha breve mais próspera carreira, que se estendeu desde 1945 ata 1963 e que se desenvolveu, principalmente, nos máis importantes teatros internacionais. A súa foi “unha voz de ouro da lírica galega polo mundo”, como a define María del Carmen Lorenzo Vizcaíno na entrada que asina para o Álbum de Galicia.

Co gallo da celebración do Día Internacional do Patrimonio Mundial o vindeiro 16 de novembro, a Sección de Patrimonio e Bens Culturais do Consello da Cultura Galega (CCG) organiza a xornada Patrimonio material e inmaterial da emigración galega a Portugal (séculos XVIII-XX): A solidariedade e cooperación transfronteiriza na Raia Seca. A actividade, que se desenvolverá o propio día 16, ás 09:30 horas, na sede da institución, ten como obxectivo analizar a traxectoria histórica da emigración galega a Portugal e poñer en valor os elementos do patrimonio material e inmaterial ligados a ese proceso migratorio. O encontro estará inaugurado pola presidenta do CCG, Rosario Álvarez, mais pola coordinadora da Sección, Rebeca Blanco-Rotea, e os da propia actividade, Nieves Amado e Hortensio Sobrado. Para a súa organización, contouse coa colaboración da Secretaría Xeral da Emigración da Xunta de Galicia. Malia ser presencial, a xornada tamén se poderá seguir en directo a través das redes sociais corporativas do CCG.

O vindeiro 16 de novembro é o Día Mundial do Patrimonio, unha efeméride que o Consello da Cultura Galega (CCG) celebra cada ano con actividades arredor do patrimonio cultural. Nesta ocasión, e seguindo as indicacións descritas na guía práctica Foro Patrimonio e Sociedade, o CCG centra as súas accións en dar a coñecer a importancia da cidadanía no proceso de construción patrimonial. Unha das xornadas terá lugar en Santiago, para analizar o patrimonio inmaterial da emigración a Portugal, a outra en Monforte (días 18 e 19), para amosar o proxecto de educación patrimonial arredor do Colexio de Nosa Señora da Antiga.

O responsable do Observatorio da Cultura Galega, Hakan Casares, participa hoxe no Sexto Foro das Rexión minoritarias europeas que se desenvolve en Galway (Irlanda) ata mañá. Baixo o título Minorities mean business. How a different language and culture can attract investors and tourists especialistas de diferentes rexións abordarán o valor engadido das minorías á hora de conquistar novos mercados e vender produtos, con especial atención ao turismo.

Os bicos feridos de Ana R Figueiredo é a novela que inaugurou unha xeración na literatura galega. “Son a xeración da nova diáspora que se caracteriza pola importancia das voces femininas, pola idea de fracaso fronte a idea de liberdade e emancipación e a cuestión transxeracional e que agora está nun período de emerxencia” explica María Alonso, coordinadora da xornada “Narrrativas da nova diáspora galega” organizada polo Consello da Cultura Galega (CCG). Durante un día especialistas de diferentes universidades abordaron as características desta nova xeración e as súas manifestacións na literatura, no audiovisual e no transmedia que se afasta con forza do estereotipo antigo da emigración. A presidenta, Rosario Álvarez, destacou a importancia deste encontro que forma parte das liñas de preocupación do CCG en atender ao que significa a emigración para a cultura galega.

A colección biográfica do Consello da Cultura incorpora (CCG) esta semana a traxectoria de Luis Ksado (Ávila, 1887 - Santiago de Compostela, 1972), “un dos grandes profesionais do seu tempo e, con toda seguranza, quen con maior afán dedicara a súa vida a fotografar o país que decidira adoptar como o seu”, tal e como o define o fotógrafo Vítor Vaqueiro. El é o autor da súa entrada no Álbum de Galicia.

Narrativas da nova diáspora galega é o título da xornada que organiza o Arquivo da Emigración Galega do Consello da Cultura Galega (CCG) e que ten como obxectivo explorar as manifestacións artísticas (nomeadamente as literarias e audiovisuais) xurdidas arredor da vaga migratoria que se produciu a partir da crise económica de 2008. Os escritores Xesús Fraga e Anna R. Figueiredo participan neste encontro que contará coa presenza de destacados investigadores e investigadores de diferentes universidades europeas. A presidenta, Rosario Álvarez, inaugura mañá este encontro xunto coa súa coordinadora, María Alonso. A cita é presencial pero tamén se poderá seguir en directo a través das redes sociais da institución.