Arquivo de noticias do CCG

A presidenta do Consello da Cultura Galega, Rosario Álvarez, acompañada da nova Comisión Executiva, reuniuse esta mañá con Alfonso Rueda Valenzuela, presidente da Xunta de Galicia e presidente de honra do CCG. Na xuntanza falouse da situación actual do sector, da importancia da cooperación en material cultural e dos retos de futuro.

Hoxe, 2 de setembro, é o bicentenario do nacemento de Antolín Faraldo (Betanzos, 1823- Granada, 1853). Manuel Murguía dixo del que "fue el primero y el mejor". O primeiro en marcar o horizonte do autogoberno galego; o mellor porque se entregou até coa alma pola liberdade malia padecer persecución, censura, exilio e represión. A súa entrada, asinada por Xurxo Martínez, acaba de incorporarse ao Álbum de Galicia, colección biobibliográfica que mantén o Consello da Cultura Galega (CCG).

O Consello da Cultura Galega (CCG) colabora un ano máis co Festiletras, festival organizado pola Fundación Eduardo Pondal na Aldea do Couto (Ponteceso). Nesta ocasión faino co espectáculo dos Quinquilláns Por que é salgada a auga do mar?. A función terá lugar este venres (2 de setembro) na eira da Praza do Quinteiro.

Urbano Feijoo Sotomayor (1808-1898) foi un controvertido empresario e político galego que promoveu a creación dun plan de colonización que facilitase, en termos xurídicos, económicos, filantrópicos e prácticos a chegada a Cuba de galegos. O operativo rematou cun grande escándalo polo trato denigrante dispensado aos traballadores. O Álbum de Galicia vén de incorporar a súa biografía asinada pola escritora Elisa Vázquez de Gey, gran coñecedora da súa figura e da vida cotiá e política da vida colonial da illa de Cuba.

Procedemento bolsas proxectos de investigación 2022 (PR970B)

Convocatoria Bolsas Casa Velázquez 2022

Procedemento bolsas proxectos de investigación 2022 (PR970B)

Convocatoria Bolsas Casa Velázquez 2022

Convocatoria Bolsas Casa Velázquez 2022

Luís Seoane (Bos Aires, 1910- A Coruña, 1979) naceu coa marca gravada da emigración, impresa polos seus pais que se asentaron na capital Arxentina. Décadas máis tarde engadiu a do exilio, que o levou de Galicia á súa cidade natal, reconvertida nunha da capitais da arte contemporánea. Ese dupla ancoraxe xeográfica e cultural influíu nun Seoane viaxeiro, en permanente busca creativa e experimental sempre marcado pola teima de achegar a cultura á cidadanía. O relato completo do polifacético creador pódese ver en Materiais Seoane. Entre Galicia e Arxentina que inaugurou este xoves a presidenta do Consello da Cultura Galega, Rosario Álvarez, a directora xeral de Patrimonio, Museos y Casco histórico da Ciudad de Buenos Aires, Martina Magaldi; o secretario xeral da Emigración, Antonio Rodríguez Miranda, e a directora do museo Larreta, Delfina Helguera, coa presenza de Silvia Dolinko, comisaria da exposición xunto con Pablo García Martínez, máis numerosas autoridades e personalidades locais. A mostra estará aberta ata o 27 de novembro no Museo de Arte Español Enrique Larreta.

Procedemento bolsas proxectos de investigación 2022 (PR970B)

A nova entrada do Álbum de Galicia incorpora a figura de Jaime Pacheco (Freixo de Espada à Cinta, Tras os Montes-Bragança, 1878 – Vigo, 1954) a cabeza visible dun dos estudos fotográficos máis senlleiros de Galicia. Unha entradada que asina o fotógrafo Vítor Vaqueiro.

Arturo Souto Feijoo (Pontevedra, 1902- México D.F., 1964) foi un dos artistas máis destacados e innovadores da chamada xeración de “Os renovadores”. Sobre a súa traxectoria e o compromiso social da súa obra afonda a xornada deste mércores do ciclo “Revisando a nosa arte”, co que a Sección de Creación e Artes Visuais Contemporáneas do Consello da Cultura Galega (CCG) revisa mensualmente a traxectoria de personalidades destacadas da nosa arte. A sesión é presencial pero pode seguirse en directo desde o web e as redes sociais da institución.

O militar e fotógrafo afeccionado Jesús Faílde Oro retratou os seus veciños da aldea de Friufe, en Agolada (Pontevedra) durante os anos cincuenta. Un traballo que permite coñecer a vida cotiá desta parroquia pontevedresa no seu traballo diario pero tamén nas súas celebracións. Unha escolma dese arquivo pódese ver en A parroquia para sempre. Jesús Faílde Oro. Memoria gráfica das xentes de Agolada (1950-1960) que o xerente do Consello da Cultura Galega (CCG), Marcelino Fernández; o alcalde do concello de Agolada, Luis Calvo; e os representantes do Colectivo Baluarte dos Pendellos, Manuel Busto e Xaime Varela, xunto co autor inauguraron esta mañá en Agolada. A exposición tamén se pode ver en liña no sitio web do CCG.

A presidenta do Consello da Cultura Galega, Rosario Álvarez, inicia unha viaxe institucional na que contribúe ao fortalecemento da cultura galega no exterior. A viaxe arrinca este mércores co acto de entrega a Rosario Álvarez do título “Huésped de honra” a cargo Legislatura da Cidade Autónoma de Bos Aires. Reunións con diferentes institucións e conferencias conforman a axenda que conclúe o día 21 coa inauguración da exposición Materiais Seoane. Entre Galicia e Arxentina no Museo de Arte Español Enrique Larreta.

O Plenario da Real Academia Galega acordou, na sesión ordinaria do 9 de xullo de 2022, que o autor homenaxeado no Día das Letras Galegas 2023 será Francisco Fernández del Riego (Vilanova de Lourenzá, 1913 – Vigo, 2010), cadrando coa celebración do sesenta aniversario do primeiro Día das Letras Galegas, do que foi inspirador, e os cento dez anos do seu nacemento.

Para ampliar a nova, accede á web da RAG. Tamén podes consultar a súa entrada biobliográfica no Álbum de Galicia.

“Pido a axuda de todos, individual e colectiva, para o cumprimento das altas tarefas que lle foron encomendadas a esta institución gardando o principio de independencia e obxectividade” afirmou Rosario Álvarez no seu discurso de toma de posesión como presidenta do Consello da Cultura Galega (CCG). Nel destacou tamén a necesidade de “reforzar a marca do CCG, que descansa sobre catro piares: identidade, interese, rigor e innovación”. O presidente de honra da institución e presidente da Xunta de Galicia, Alfonso Rueda, presidiu o acto, ao que asistiron numerosas autoridades e unha nutrida representación da política, da sociedade e da cultura galegas. Tras a toma de posesión tivo lugar unha sesión plenaria, na que se procedeu á elección da nova Comisión Executiva da institución e ao nomeamento de diferentes coordinadores de seccións e arquivos.

Ribadeo é unha das vilas galegas nas que o legado dos indianos -os emigrantes retornados da América ao longo do século XIX e XX- permanece visible a través da súa arquitectura. Un pasado histórico que se recupera cada ano na festividade “Ribadeo indiano” coa que colabora o Consello da Cultura Galega (CCG) a través do Arquivo da Emigración Galega (AEG) con diferentes actividades. A presidenta do CCG, Rosario Álvarez, é tamén a pregoeira desta edición.

Procedemento bolsas proxectos de investigación 2022 (PR970B)

Galicia viviu entre 1931 e 1939 un amplo desenvolvemento de asociacións mariñeiras derivadas da implantación de modelos e relacións de produción capitalista. A análise desa situación e a súa relación co contexto político daquela altura centran este martes a xornada “Memoria e historia do traballo do mar en Galicia”. É unha nova entrega dos Encontros Monográficos co Patrimonio Cultural que organiza a Sección de Patrimonio e Bens Culturais do Consello da Cultura Galega (CCG). A cita, coordinada por Francisco Xavier Redondo Abal, é presencial pero pode seguirse en directo desde o web e as redes sociais co CCG.