Arquivo de noticias do CCG

A Sección de Artes Plásticas do Consello da Cultura Galega (CCG) considera necesaria a creación de profesionais especializados da crítica de arte. Con este obxectivo, nunha dirección pedagóxica e paralela á acción promocional doutros proxectos, o CCG prantexa a realización deste Obradoiro de crítica de arte, que terá lugar a próxima semana (do 17 ó 21), fusionando as áreas teóricas e prácticas desta disciplina. A necesidade de relación e comunicación entre o feito artístico e a sociedade fixo precisa a creación dunha serie de interlocutores da mensaxe estética. O crítico de arte, axente activo deste intercambio, actúa de espectador intencionado na engrenaxe da industria cultural.

O arquitecto Juan Luís Dalda Escudero reivindicou o principio da "planificación espacial máis alá da ordenación do territorio" na súa intervención nas xornadas "Galicia, estratexias de futuro. Novos espazos na sociedade global", que están a celebrarse no Consello da Cultura Galega (CCG), en Santiago, coa participación de filósofos, sociólogos, arquitectos e urbanistas e que rematarán hoxe, venres. Dalda, profesor titular de Planeamento Urbanístico da Escola Técnica Superior de Arquitectura de A Coruña, reflexionou sobre "a cidade difusa no noroeste peninsular", insistiu na necesidade de "adecuar a planificación terrtorial ó complexo espazo urbano do século XXI" e lembrou que o que definiu como "fracaso do feísmo é o fracaso de vinte anos de política urbanística con protagonismo especial da Xunta, do Parlamento de Galicia e tamén dos concellos".

O filósofo francés Gilles Lipovetsky pronunciará hoxe, mércores, 12 de novembro, ás 19´00 horas, a conferencia inaugural das Xornadas GALICIA, ESTRATEXIAS DE FUTURO: NOVOS ESPAZOS NA SOCIEDADE GLOBAL, organizadas polo Consello da Cultura Galega (CCG), dentro dos actos conmemorativos do vinte aniversario da institución. No acto inaugural intervirán tamén o Presidente do CCG, Alfonso Zulueta de Haz, e o coordinador das xornadas, Antón Baamonde.

O idioma galego dispón xa de ferramentas e productos terminolóxicos numerosos e sistematizados e conta asemade cunha "Metodoloxía do traballo terminográfico puntual en lingua galega", presentada no curso da derradeira sesión de traballo do I Simposio Galego de Terminoloxía, celebrado nas dependencias do Consello da Cultura Galega (CCG). Ás sesións asistiron máis de cen investigadores, lingüistas e traductores. Os traballos completáronse coas IV Xornadas da Asociación Española de Terminoloxía (Aeter). O Simposio, terá continuidade e carácter bianual e abriu xa a consulta para unha consulta sobre a posible creación da Asociación Galega de Terminoloxía.

A segunda xornada do I Simposio Galego de Terminoloxía abordou esta mañá as técnicas e criterios que os especialistas e os filólogos e traductores aplican á hora de crear palabras en galego para designar novas realidades (como na informática) ou realidades moi específicas, como nomes científicos. Este congreso, organizado pola Sección de Lingua do Consello da Cultura Galega e o Servicio de Terminoloxía Galega (Termigal), conta coa participación de preto de cen investigadores e profesionais.

"Os estudios terminolóxicos deben ter unha especial relevancia nas linguas en proceso de normalización", afirmou Manuel González, coordinador do Servicio de Terminoloxía Galega (TERMIGAL) no acto inaugural do I Simposio Galego de Terminoloxía, celebrado esta tarde no Centro "Ramón Piñeiro", en Santiago. As sesións de traballo, ás que asisten un cento de investigadores e estudiosos, continuarán o venres e o sábado no salón de actos do Consello da Cultura Galega (CCG) e inclúen, en horario de tarde, o desenvolvemento do programa das IV Xornadas de Traballo da Asociación Española de Terminoloxía (AETER).

A Sección de Lingua do Consello da Cultura Galega (CCG) e o Servicio de Terminoloxía Galega (Termigal) promoveron o I Simposio Galego de Terminoloxía "Terminoloxía e planificación lingüística", que hoxe, xoves, ás 16´30 horas, vai ser inaugurado no salón de actos do Centro Ramón Piñeiro para a Investigación en Humanidades, en Santiago.

O Consello da Cultura Galega (CCG) editou dez mil exemplares do cómic PARANDO A MAREA NEGRA, que distribuirá entre os centros de ensino de Galicia. A publicación recolle a esforzada e solidaria reacción posta en marcha en Galicia, e fóra de Galicia, para neutralizar o impacto da catástrofe do "Prestige" e subliña "unha idea de esperanza e de concienciación na defensa da natureza e do medio ambiente; todos podemos facer algo e todas as contribucións son necesarias", en palabras da autora do guión, a escritora María Pilar Jiménez Aleixandre.

O Consello da Cultura Galega presentará mañá martes, día 4, ás 12´00 horas en rolda de prensa o cómic PARANDO A MAREA NEGRA, que describe a esforzada reacción posta en marcha en Galicia para neutralizar o impacto da catástrofe do "Prestige".

O prazo de inscripción, gratuíta, para participar nas Xornadas GALICIA, ESTRATEXIAS DE FUTURO: NOVOS ESPACIOS NA SOCIEDADE GLOBAL, organizadas polo Consello da Cultura Galega (CCG) continúa aberto. As prazas, en número de 80, cubriranse por orde de inscripción, entregarase diploma acreditativo e validarase un crédito de libre configuración das universidades de Vigo e A Coruña.

O Pleno do Consello da Cultura Galega (CCG) aprobou esta tarde o proxecto do orzamento para 2004 que ascende a 2.093.545 euros e supón tan só un incremento do 0´80 por cento respecto do ano anterior. O pleno, celebrado baixo a presidencia do titular, Alfonso Zulueta de Haz, aprobou asemade as previsións de traballo das doce Seccións e os catro Arquivos que desenvolven a actividade da institución.

As ferramentas que permiten o uso do galego na informática e a dinamización lingüística como un proxecto empresarial centraron a última xornada dos VII Encontros para a Normalización Lingüística que se celebraron esta semana en Santiago de Compostela. Durante este xoves e o venres, preto de douscentos investigadores e técnicos participaron no foro organizado polo Centro de Documentación Sociolingüística de Galicia (CDSG), do Consello da Cultura Galega (CCG).

"O futuro do idioma galego xogarase nos espazos urbanos e a garantía do seu uso está moi relacionada coa concienciación das familias, que foi perdendo peso fronte á escola e a outros axentes máis ben castelanizadores", afirmou Gabriel Rei-Doval, da Universidade de Oxford, na conferencia inaugural dos VII Encontros para a Normalización Lingüística que hoxe e mañá teñen lugar en Santiago de Compostela organizados polo Centro de Documentación Sociolingüística (CDSG) do Consello da Cultura Galega (CCG).

O Consello da Cultura Galega (CCG) presentará mañá, venres 24 de outubro, ás 12´00 horas, en rolda de prensa, as xornadas GALICIA, ESTRATEXIAS DE FUTURO: NOVOS ESPAZOS NA SOCIEDADE GLOBAL. A presentación terá lugar no auditorio do CCG e contará coa presencia do Presidente da Institución, Alfonso Zulueta de Haz e do coordinador das xornadas, o profesor e ensaísta Antón Baamonde.

Douscentos investigadores e técnicos participarán nos VII Encontros para a Normalización Lingüística, que se celebrarán en Santiago os días 23 e 24 de outubro organizados polo Centro de Documentación Siciolingüística de Galicia, do Consello da Cultura Galega (CCG).

A Comisión Executiva do Consell Valencià de Cultura realizará unha visita oficial este martes e mércores ó Consello da Cultura Galega. A Comisión estará encabezada polo Presidente da institución, D.Santiago Grisolía.

Xoán Manuel Casado, escritor e un dos fundadadores do PEN Clube Galicia, do que era presidente Carlos Casares, será lembrado nun recital que terá lugar mañá, venres 22 de marzo de 2002, ás 20 h. no Salón de Actos do Consello da Cultura Galega.

O Consello da Cultura Galega recibiu hoxe 118 documentos e testemuñas radiofónicas donadas en custodia polo xornalista Fernando Ramos ó Arquivo Sonoro de Galicia. Entre as gravacións figuran entrevistas con personalidades como Ramón Otero Pedraio, Alvaro Cunqueiro, Xaquín Lorenzo, Xosé Trapero Pardo ou Valentín Paz Andrade. O acto de entrega e a sinatura do correspondente protocolo foi presidido polo presidente do Consello da Cultura Galega, Alfonso Zulueta de Haz e contou coa asistencia do vicepresidente e director do Arquivo Sonoro de Galicia, Ramón Castromil.

O Consello da Cultura Galega recibirá mañá, martes, ás 11´30 horas, 118 documentos e testemuñas radiofónicas que o xornalista Fernando Ramos dona en custodia ó Arquivo Sonoro de Galicia. Entre as gravacións figuran entrevistas con Ramón Otero Pedraio, Xaquín Lorenzo, Valentín Paz Andrade ou Xesús Ferro Couselo. Trátase de fondos reunidos ó longo de trinta anos de exercicio profesional do xornalismo en prensa e radio. A parte esencial (1968-1976) corresponde ó traballo de Fernando Ramos como redactor e locutor en Radio Popular en Ourense e Vigo.

O Consello da Cultura Galega (CCG) valora positivamente o acordo adoptado pola Real Academia Galega (RAG) sobre a reforma e a actualización das normas ortográficas e morfolóxicas do idioma galego. Entende que os pequenos retoques introducidos suporán un mínimo esforzo de adaptación para os usuarios da norma vixente e, en troques, ampliarán a base de apoio a sectores significativos do mundo cultural e social galego. É, pois, un paso necesario e oportuno cara á superación das disensións normativas e a aceptación xeral das normas oficiais.