Arquivo de noticias do CCG

O Consello da Cultura Galega acolle mañá, mércores 11 de decembro, ás 19h. a presentación do libro "Galicia. Ensaio xeográfico de análise e interpretación dun vello complexo agrario", a obra de referencia do xeógrafo francés Abel Bouhier "La Galice. Essai géographique d'analyse et d'interprétation d'un vieux complexe agraire" que agora o CCG presenta completa - dous tomos máis un, que recolle mapas e gráficos - e nunha traducción ó galego a cargo de Benxamín Casal.

A exposición Galicia - América. Cinco séculos de historia, organizada polo Consello da Cultura Galega en 1992, segue a súa andaina. Agora no Concello de Betanzos que acollerá esta mostra na planta alta do seu Edificio do Liceo a partir de mañá, xoves, 5 de decembro, ás 20.30h nun acto que contará coa presencia do presidente do Consello da Cultura Galega, Alfonso Zulueta.

A Comisión Executiva do Consell Valencià de Cultura realizará unha visita oficial este martes e mércores ó Consello da Cultura Galega. A Comisión estará encabezada polo Presidente da institución, Santiago Grisolía.

A autobiografía de Ramón Piñeiro ou, en palabras de Carlos Casares, o que se puido "salvar e compoñer" a partir de horas de conversas entre Casares e Piñeiro. Esto é "Da miña acordanza. Memorias de Ramón Piñeiro", o derradeiro traballo do que foi presidente do Consello da Cultura Galega e director de Galaxia, Carlos Casares, e que mañá se presenta oficialmente nun acto que terá lugar mañá, martes, 26 de novembro, ás 20h. na sede do Consello da Cultura Galega.

Os avances tecnolóxicos dos últimos anos están a cambiar as formas de comunicación e facendo que xurdan novas canles que esixen dos xornalistas unha adaptación. O xornalismo en Internet, a súa situación laboral e as súas actitudes profesionais e, sobre todo, a definición das funcións do xornalista en Internet eran cuestións pendentes que o Consello da Cultura Galega, a través da súa Sección de Comunicación, decidiu abordar a través dun miúdo estudio que agora se presenta dentro da colección de Informes baixo o título "Xornalismo en Internet. Actitudes profesionais e condicións laborais dos periodistas en liña".

Home, menor de trinta anos, licenciado en Xornalismo, que traballa a xornada completa, cun salario de entre 600 e 900 euros ó mes e que fai horas extras que case nunca cobra. Este é o perfil do xornalista galego en Internet, segundo se desprende do Informe que baixo o título "Xornalismo en Internet. Actitudes profesionais e condicións laborais dos periodistas en liña" presentou esta mañá o coordinador da Sección de Comunicación do CCG, Xosé López.

Os conflictos que xorden á hora de aplicar as regras do protocolo español e as das diferentes Comunidades Autónomas será un dos temas centrais que se abordarán ó longo das dúas xornadas das que se compón o I Encontro de Protocolo e Cerimonial en Galicia, que se desenvolverá na Facultade de Ciencias Sociais da Universidade de Vigo o xoves e o venres, 14 e 15 de novembro.

O Museo do Pobo Galego, en San Domigos de Bonaval (Santiago de Compostela), acollerá desde mañá, mércores 13 de novembro, e ata finais de ano a mostra "Galicia e a sega en Castela ó longo dos tempos". O acto de apertura oficial da exposición terá lugar no Museo do Pobo Galego ás 13h. e contará coa participación do presidente do Conselo da Cultura Galega, Alfonso Zulueta.

Os especialistas que se deron hoxe cita na segunda e última xornada do I Congreso luso-galego de estudios xornalísticos que se desenvolve na sede do Consello da Cultura Galega, en Santiago, coincidiron en afirmar que a concentración e a reestructuración sons as tendencias comúns que se detectan no mundo dos medios de comunicación a un e outro lado do Miño.

A creación dun marco que permitira facer un repaso dos encontros e desencontros da comunidade lusa e a galega ó longo da historia así como das tendencias actuais da investigación sobre o xornalismo centraron a sesión inaugural do I Congreso luso-galego de estudios xornalísticos. A investigación e o ensino do xornalismo no espacio luso-galego, que se desenvolven desde hoxe e ata mañá en sesións de mañá e tarde no Consello da Cultura Galega.

Máis dun cento de profesionais galegos e portugueses, catro universidades, seis mesas de debate, comunicacións, relatorios e só dous días para concentralo todo. É o I Congreso Luso-Galego de Estudios Xornalísticos que acolle a sede do Consello da Cultura Galega, en Santiago de Compostela, durante as xornadas do martes, 29 de outubro e o mércores, 30.

A xeración dunha sensibilidade da sociedade cara á arte a través da publicación de obras como o CD-ROM "Índice documental dos escultores galegos do século XX", que esta mañá se presentou xunto co último informe publicado pola Sección de Artes Plásticas, "Museos e Centros de Arte Contemporánea". Este é unha das premisas coas que traballa a Sección de Artes Plásticas, segundo puxo de manifesto o seu coordinador, Iago Seara na rolda de prensa que tivo lugar no Consello da Cultura Galega.

Encher o baleiro e a dispersión existente no campo da escultura galega no século XX a través do uso das novas tecnoloxías. Con este obxectivo nace o Índice documental de escultores galegos do século XX, unha publicación en formato de CD-Rom que mañá será presentado no Consello da Cultura Galega nun acto promovido pola Sección de Artes Plásticas, responsable da súa edición.

Baixo a premisa de dar a coñecer a visión que o cine ofreceu da emigración galega, o Consello da Cultura Galega, a través do Arquivo da Emigración Galega, en colaboración coa Consellería de Emigración, o CGAI e o Concello de Santiago, presentou esta mañá un ciclo de cine baixo o título "Cine e Emigración", que se desenvolverá en horario de tarde no Teatro Principal do 22 ó 25 de outubro.

Co obxectivo da presentación das Xornadas Cine e Emigración, o Consello da Cultura Galega organiza mañá, venres, 18 de outubro de 2002, ás 12,30h. unha rolda de prensa que se celebrará na sede do Consello da Cultura Galega.

Ignoradas e sen ningún tipo de recoñecemento. Así se atopan moitas linguas minoritarias en Europa segundo puxo de manifesto Henrique Costas, profesor de Lingua Galega na Universidade de Vigo, durante a mesa de traballo que se desenvolveu esta mañá no marco dos VI Encontros de Normalización Lingüística na sede do Consello da Cultura Galega.

A elaboración dun Plan Xeral de Normalización da lingua galega aberto, que busque o consenso de tódalas forzas políticas e a participación da sociedade. Esta foi a premisa fundamental na que fixo un maior fincapé o Director Xeral de Política Lingüística da Xunta, Xesús Pablo González Moreiras durante a súa intervención, que abriu os VI Encontros para a Normalización Lingüística, unhas xornadas que a sede do Consello da Cultura Galega acolle hoxe e mañá.

O Consello da Cultura Galega acolle os días 14 e 15 de outubro os Encontros para a Normalización Lingüística, que na sexta edición presentan os planos de normalización das universidades de Santiago e Vigo. E se o futuro do idioma depende da planificación institucional a curto e medio prazo, a supervivencia das linguas a nivel europeo tamén toma un camiño determinado segundo o amparo que lles proporciona a lexislación vixente. Esta necesidade de campañas de difusión e o pulo que supón a oficialización dunha lingua son dúas axudas a ter en conta en casos concretos coma o do galego estremeiro e dos esforzos dos case 78 000 falantes a favor da dignificación da súa fala.

O desafío de reconstruír as ata agora "medias- historias" dos galegos e facelas completas a través de traballos que non se limiten á análise do fenómeno da inmigración ou da emigración foi o reto que lanzou o profesor Carlos Zubillaga durante a súa intervención no seminario que se desenvolveu esta mañá na biblioteca do Consello da Cultura Galega.