Arquivo de noticias do CCG

Hijas de Galicia foi unha institución pioneira na historia da emigración galega da primeira metade do século XX. Creada na Habana en 1917 cun fin asistencial, mantivo a súa actividade ata o ano 1960. Durante ese período, ofreceu atención sociosanitaria ás galegas emigradas e prestou especial atención ás situacións de vulnerabilidade que estas sufrían, sobre todo ás vinculadas coa trata e tráfico de mulleres. Ademais, desenvolveu un papel crucial nos inicios do feminismo galego e cubano. María Xosé Porteiro García é a autora da entrada que se incorpora hoxe ao Álbum de Galicia, a colección dixital de biografías que mantén o Consello da Cultura Galega (CCG).

“Un planeta sen plástico” é o título da nova entrega de Proxector, iniciativa que desenvolve o Centro de Documentación Sociolingüística de Galicia (CDSG) do Consello da Cultura Galega (CCG) en colaboración coa Universidade de Santiago de Compostela (USC). Nela, reúnense unha ducia de recursos audiovisuais nos que se analizan as consecuencias que os residuos plásticos teñen para o ecosistema e se propoñen algunhas solucións para revertelas. Con este especial, o CCG súmase á conmemoración do Día Mundial do Medio Ambiente de 2023, que nesta edición ten como tema central a contaminación xerada polos plásticos.

En 1933 o Seminario de Estudos Galegos (SEG) deu ao prelo unha das súas obras máis emblemáticas, Terra de Melide. Era o resultado dos amplos traballos de campo e investigación pioneiros que os membros do SEG fixeron sobre esta comarca. O Consello da Cultura Galega (CCG), en colaboración co Museo da Terra de Melide, quere conmemorar estes traballos cun roteiro que terá lugar o sábado 10 de xuño. Nel visitaranse os espazos investigados polos membros do SEG ao longo da comarca da Terra de Melide.

Inocencio Schmidt de las Heras (A Coruña, 1897–1975) foi un dos grandes representantes da corrente fotográfica do pictorialismo, na que destacou polo seu dominio da técnica do bromóleo. A paisaxe constituíu o núcleo central da súa obra, aínda que coa súa cámara rexistrou tamén imaxes de estatuas e recantos típicos dalgunhas cidades. Ademais, realizou outro tipo de fotografías máis vinculadas coa sociedade industrial do seu tempo, nas que sobresae a presenza de fábricas, ferrocarrís ou guindastres. A súa entrada no Álbum de Galicia, a colección dixital de biografías que mantén o Consello da Cultura Galega (CCG), é autoría de Vítor Vaqueiro.

“Alimentos sen remordementos. Alternativas para unha cesta da compra sustentable” é o título da xornada que terá lugar este martes, 6 de xuño, no Vello Cárcere de Lugo. Organizada polas seccións de Pensamento e de Ciencia, Tecnoloxía, Natureza e Sociedade do Consello da Cultura Galega (CCG) co apoio do Concello de Lugo, a actividade ten como obxectivo analizar os diferentes modelos de produción e consumo alimentarios. A presidenta do CCG, Rosario Álvarez, inaugurará ás 10:00 horas esta cita, que coordinan María Teresa Barral, Iolanda Casal, Ana Isabel García Arias e David Soto. A sesión é presencial e non se poderá seguir en directo, pero será gravada e subida con posterioridade á hemeroteca do CCG.

O Consello da Cultura Galega dedica a cuarta xornada do foro Pensar o mundo dende Galicia, co que celebra o seu 40º aniversario, a situar o idioma galego no contexto lingüístico actual. A cita fai unha parada para revisar os retos do galego no contexto actual, no que existen outras dinámicas lingüísticas asociadas ás novas mobilizacións da cidadanía e ás tecnoloxías. Esta sesión do foro titúlase “O desafío do galego nas sociedades multilingües” e está coordinada por Dolores Vilavedra. Nela participan destacados profesionais como Peter A. Kraus, da Universidade de Augsburgo, ou Bernadette O’Rourke, da Universidade de Glasgow. A cita terá lugar o xoves 8 de xuño na sede do CCG e ten aberta a inscrición.

Cangas acolle este sábado unha xornada moi singular que busca explorar os límites entre a creación literaria e o universo dos videoxogos. Titúlase “Hai un poema no teu videoxogo” e é unha proposta deseñada polo Consello da Cultura Galega (CCG) e o Museo do Videoxogo. A cita está coordinada por Carmen García Mateo e Carlos Pereiro, quen asegura que “buscamos unir dous mundos que parecen afastados pero que non o están tanto”. Os poetas Pablo Rodríguez e Branca Trigo ofrecerán unha innovadora actividade en que haberá xogos en streaming, poesía, audiovisual e moita experimentación.

O Consello da Cultura Galega lamenta o pasamento de Daniel Barata Quintas (Rairiz de Veiga, 1943-Ourense, 2023), quen foi membro do Plenario desta institución entre 1990 e 1993, como conselleiro de Cultura. A traxectoria profesional de Barata levono por todos os niveis do sistema educativo: foi profesor, inspector e delegado da Consellaría de Educación. En 2018 o sindicato educativo Anpe nomeouno "Docente do ano". Desenvolveu unha carreira política como concelleiro en Ourense, parlamentario e alén de conselleiro. Ademais de Maxisterio, estudou tamén Filosofía e Letras.

Ernesto Guerra da Cal (Ferrol, 1911 – Lisboa, 1994) foi escritor, poeta e un destacado estudoso das literaturas portuguesa e galega. Exiliado en Nova York dende 1939, traballou a prol da internacionalización da cultura galega e, sobre todo, da figura de Rosalía de Castro. A nova entrega de Voces centenarias, proxecto que mantén o Arquivo Sonoro de Galicia (ASG) do Consello da Cultura Galega (CCG), difunde tres audios que permiten escoitar algúns dos seus poemas recitados na voz do propio autor.

A chegada da luz eléctrica e a extensión masiva da iluminación artificial mudaron os ritmos naturais ata tal punto que están empezando a descubrirse os seus impactos na saúde das persoas e no medio ambiente. A día de hoxe, a luz artificial xa é considerada un axente contaminante. Sobre os efectos que a iluminación artificial causa no equilibrio ambiental e na saúde humana, o gasto enerxético asociado e a deterioración da capacidade de observación do ceo nocturno trata a xornada "Os múltiples riscos da contaminación luminosa", que organiza o Consello da Cultura Galega (CCG) este xoves, 1 de xuño. A presidenta do CCG, Rosario Álvarez, inaugura esta cita que coordina Jorge Mira. A sesión pode seguirse en directo por Internet e nas redes sociais do CCG.

Eduardo Pondal (Ponteceso, A Coruña, 1835 – A Coruña, 1917) foi o último gran poeta do Rexurdimento. Autor dunha produción que o consagrou como o bardo do pobo galego, puxo a súa obra e a súa vida ao servizo da nación, do rexurdir e da redención de Galicia. Ademais, por encarga do compositor Pascual Veiga, escribiu o texto para o himno galego. A súa entrada no Álbum de Galicia, a colección dixital de biografías que mantén o Consello da Cultura Galega (CCG), é autoría de Manuel Ferreiro Fernández.

Alberto Datas foi unha das figuras clave no movemento de renovación que experimentou a arte galega nos anos oitenta. Vinculado ao grupo Atlántica, destacou pola súa particular representación da condición humana, da natureza e da crise da nosa civilización a través dunha obra en que o xesto, a cor e a materia son os protagonistas. Co fin de profundar no imaxinario do pintor e na súa traxectoria artística, a Sección de Creación e Artes Visuais Contemporáneas do Consello da Cultura Galega (CCG) dedícalle este mércores, 31 de maio (19:00 horas), unha nova xornada do ciclo Revisando a nosa arte. A sesión, coordinada por Paula Cabaleiro, desenvolverase de xeito presencial na Casa das Campás (Pontevedra). A cita non se poderá seguir en directo, pero será gravada e subida posteriormente á hemeroteca do CCG.

A presidenta do Consello da Cultura Galega, Rosario Álvarez, participou esta mañá na inauguración de Educación, xénero e lectura, unha mostra que se achega á educación e á lectura cunha perspectiva de xénero. O proxecto expositivo, que se pode ver no Museo Pedagóxico de Galicia, conta en 16 mesas expositoras con libros e recursos escolares, obxectos significativos, fotografías históricas, cartelística e imaxes un proceso de discriminación e estereotipos, pero tamén de conquistas transformados. O CCG contribúe neste proxecto con materiais do noso Centro de Documentación en Igualdade e Feminismos (CDIF)

No último terzo do século XIX, as asociacións de emigrantes galegos iniciaron un importante labor editorial ao pór en marcha diferentes xornais, boletíns e revistas. Ademais de manter informada a colectividade, estas publicacións contribuíron a crear unha conciencia política e cultural propia para os e as galegas. O especial Historias de ida e volta, proxecto do Arquivo da Emigración Galega (AEG) do Consello da Cultura Galega (CCG) que conta co apoio da Secretaría Xeral da Emigración, escolma algunhas das cabeceiras editadas polas sociedades de emigrantes en América e Europa durante o século XX.

A directora do Centro de Documentación en Igualdade e Feminismos (CDIF), Carme Adán, e mais África López Souto, directora do IES Urbano Lugrís, presentan este venres neste centro coruñés a unidade didáctica Sen cancelas, un documento elaborado polo Consello da Cultura Galega (CCG), co apoio da Secretaría Xeral da Igualdade, que complementa e explica a exposición homónima, que pecha as portas ese mesmo día no centro. O proxecto fai un percorrido polo pasado e presente en relación coas ideas e conceptos que deron forma á defensa dos dereitos e liberdades das persoas que non se axustaron á norma sexual e de xénero, así como aos estereotipos e valores sociais que os precederon. A exposición, que se puxo en marcha hai un ano, xa se puido ver en 17 centros educativos do país.

Juan Compañel (Santiago de Compostela, 1829 – La Catalina, Matanzas, Cuba, 1897) destacou pola súa actividade como editor e impresor do Rexurdimento. Propietario dun obradoiro na cidade olívica, da súa imprenta saíron as obras Cantares gallegos (1863), de Rosalía de Castro, ou Diccionario de escritores gallegos (1862), de Manuel Murguía. Ademais, dirixiu os periódicos La Oliva e, posteriormente, El Miño, no que constituíu un “proxecto xornalístico ao servizo de Galicia, do progresismo e da república”. Así o afirma Xurxo Martínez González na entrada que asina no Álbum de Galicia, a colección dixital de biografías que mantén o Consello da Cultura Galega (CCG).

“O 15-M doce anos despois: crise do Réxime ou Restauración?” é o título da nova sesión do ciclo Pensarmos, que terá lugar o 25 de maio (18:00 horas), na sede de Portas Ártabras - Amigos dos Museos de Galicia da Coruña. Nela, Cristina Fallarás e David Rodríguez conversarán con Xoán Antón Pérez Lema arredor do movemento do 15-M e o que supuxo para España e para Galicia. A actividade está organizada pola Sección de Pensamento do Consello da Cultura Galega (CCG) e coordinada por Celia Pereira Porto. A xornada é presencial e non se poderá seguir en directo, pero será gravada e estará proximamente dispoñible na hemeroteca do CCG.

O Teatro Afundación encheuse na véspera do Día das Letras Galegas para homenaxear a Francisco Fernández del Riego. O Consello da Cultura Galega (CCG) preparou, na décimo terceira edición do Concerto das Letras Galegas, un programa “do gusto do homenaxeado, ilustrando o seu eclecticismo, apostando pola tradición mais tamén pola contemporaneidade e procurando ilustrar a relación de don Paco coa cidade que o acolleu”, afirmou Cristina Domínguez, membro do Plenario da institución, na presentación da cita. A presidenta do CCG, Rosario Álvarez; o presidente da Real Academia Galega, Víctor Freixanes; o director xeral de Cultura, Anxo Lorenzo; a presidenta da Deputación de Pontevedra, Carmela Silva; a concelleira de Vigo Ana Mª Mejías, e a subdelegada do Goberno, María Rivas, foron algunhas das autoridades presentes neste concerto, interpretado pola Real Filharmonía de Galicia, con dirección de Maximino Zumalave, e polo Coro de Cámara Rías Baixas, dirixido por Bruno Díaz. Ademais de ser retransmitido en streaming, o concerto emítese pola segunda canle da TVG ás 22.10 horas do Día das Letras Galegas.

O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), incorpora 23 números da Revista del Centro Gallego. Voceiro oficial do Centro Gallego de Montevideo, entre as súas páxinas incluía novas sobre a propia entidade editora, así como outras que daban conta da actualidade galega e española. Os números que se dixitalizaron neste mes de maio corresponden a diversos exemplares publicados entre os anos 1926 e 1929, cuxos orixinais se atopan depositados no AEG.

Vigo acollerá o vindeiro martes a décimo terceira edición do Concerto das Letras Galegas (Teatro Afundación Vigo, 20:30 horas), unha proposta deseñada polo Consello da Cultura Galega (CCG) como apertura festiva para o Día das Letras. A Real Filharmonía de Galicia, dirixida por Maximino Zumalave, e o Coro de Cámara Rías Baixas interpretarán un programa que xira arredor da figura homenaxeada: Francisco Fernández del Riego (Vilanova de Lourenzá, 1913 - Vigo, 2010). No programa destaca a estrea de Sinfonietta, peza en tres movementos elaborada expresamente para a ocasión por Brais González Pérez (Vigo, 1987) a partir de textos de Salvador García Bodaño e Xaime Isla Couto e mais A miña burriña, peza moi querida por Fernández del Riego. Aínda quedan entradas dispoñibles que se poden retirar de xeito gratuíto en Ataquilla.com.