Arquivo de noticias do CCG

O Consello da Cultura Galega inaugurará o xoves, 13 de setembro, no Salón de Actos do mosteiro de Celanova, ás 10:00 h o I Congreso Internacional "Curros Enríquez e o seu tempo". No acto de inauguración estarán presentes Carlos Casares, Presidente do Consello da Cultura Galega, o vicepresidente da Deputación de Ourense, Rogelio Martínez González, Xesús Alonso Montero, catedrático de Literatura Galega, e Antonio Mouriño, alcalde de Celanova, Felipe Ferreiro, delegado provincial da Consellería de Cultura.

O Consello da Cultura Galega foi elixido como gañador dos Premios Ourense de Banda Deseñada no apartado dedicado ás personalidades e institucións que máis destacaron polo seu traballo en beneficio do cómic galego. Estes premios, outorgados pola Concellería de Cultura do Concello de Ourense e a Casa da Xuventude de Ourense, encádranse dentro da celebración da XIII Xornadas de Banda Deseñada que a cidade das Burgas organiza entre o 5 e o 13 de outubro.

Coa pretensión de ofrecer un documento cun indubidable valor estético e filolóxico, o Consello da Cultura Galega acaba de publicar unha edición facsímile do manuscrito orixinal da obra de Alfonso R. Castelao, Os dous de sempre. A presentación da edición, coordinada polo secretario do Consello da Cultura Galega, Henrique Monteagudo, terá lugar mañá, martes 24 de xullo, ás 12h. na sede do Museo de Pontevedra.

Ordenar e racionalizar os procesos de inmigración, integrar a estas poboacións na sociedade española, disuadir a inmigración ilegal, loitando contra o tráfico e a explotación, e loitar contra a xenofobia e a intolerancia, son as metas cara ás que traballa o Goberno español no proceso de regularización da inmigración en España, segundo fixo público esta mañá o Secretario de Estado para a Estranxeiría e a Inmigración, Enrique Fernández-Miranda. Fernández-Miranda fixo estas declaracións durante a súa intervención no marco da xornada “Inmigración: un novo reto”, que o Arquivo da Emigración Galega organizou na sede do Consello da Cultura Galega.

A mesa redonda coa que quedou pechada a xornada "A inmigración: un novo reto", organizada polo Arquivo da Emigración Galega ó longo de toda a xornada de hoxe, estivo centrada nas experiencias persoais dos inmigrantes, que coincidiron en sinalar que o choque cunha nova cultura e unha nova lingua fixera a súa integración difícil. Procedentes de Arxentina, Venezuela, Ghana ou Camerún, os participantes na mesa redonda, que estivo moderada polo historiador e membro do Arquivo da Emigración Galega, Xosé Manuel Núñez Seixas, expuxeron os diferentes motivos que os impulsaron a vir a España e os problemas polos que tiveron que pasar.

O Secretario de Estado para a Estranxeiría e a Inmigración, Enrique Fernández-Miranda exporá a nova Lei de Estranxeiría, abordando os conflictos que ocasiona a súa implantación, nun relatorio que ofrecerá o vindeiro luns, 25 de xuño, no marco da xornada "A inmigración: un novo reto", que organiza o Arquivo da Emigración Galega na sede do Consello da Cultura Galega.

A crise da enfermidade das "vacas tolas" e as súas posibles repercusións na saúde humana será obxecto dunha reunión de máis dunha vintena de expertos no marco da Xornada de Síntese sobre a crise da Encefalopatía Esponxiforme Bovina (EEB) e da Variante da Enfermidade de Creutzfeldt-Jakob (vECJ) organizada pola Sección de Ciencia, Tecnoloxía e Sociedade para o vindeiro luns, 25 de xuño na sede do Consello da Cultura Galega.

Galicia, un país tradicionalmente de emigrantes, é agora o destino de numerosos estranxeiros que veñen buscando un futuro mellor do que lles espera nos seus países de orixe. O fenómeno da inmigración en Galicia, algo totalmente novo na historia do noso país, así como as súas consecuencias na poboación galega e a adaptación dos inmigrantes á súa nova situación serán algúns dos aspectos que se abordarán na xornada que baixo o título A inmigración: un novo reto, será presentada ós medios de comunicación mañá, xoves 21 de xullo, en rolda de prensa, ás 12.00h. na sede do Consello da Cultura Galega.

A presentación do libro Cousas da vida no Faro de Vigo (1926-1933) por Castelao, publicación do Consello da Cultura Galega na que se recollen as colaboracións humorísticas do escritor no Faro de Vigo entre 1926 e 1933, terá lugar na xornada de mañá, mércores 20 de xuño, ás 12.00h. na sede da Fundación Penzol, en Vigo, nun acto ó que asistirán o presidente do Consello da Cultura Galega, Carlos Casares Mouriño, o secretario desta institución, Henrique Monteagudo, o director xeral do Faro de Vigo, Pedro Pablo Alonso, así como Alfonso Zulueta de Haz, en representación da Fundación Penzol e o responsable da edición do libro, Clodio González Pérez.

A Sección de Ciencia, Tecnoloxía e Sociedade organizou para mañá, xoves 14 de xuño, ás 12h. no Paraninfo da Universidade de Vigo, un acto para presentar oficialmente unha nova publicación do Consello da Cultura Galega, Economía Ambiental e Sociedade, producto da publicación das actas que sobre o Seminario Economía Ambiental e Sociedade, acolleu Santiago o pasado mes de maio.

O Consello da Cultura Galega acolleu esta mañá o relatorio do profesor da Universidade de Luján (Arxentina), Alejandro Fernández, que ofreceu as principais conclusións da súa Tese de Doutoramento na Universidade Central de Barcelona, que leu recentemente, nun relatorio baixo o título A inmigración española na Arxentina e o comercio bilateral, 1880-1935. Na súa intervención, abordou as relacións entre a inmigración e o desenvolvemento das relacións comerciais cos países de orixe dos emigrados, un traballo que levou ó profesor Fernández a un "detallado e rico coñecemento do colectivo español no período da inmigración clásica, entre 1880 e 1930", segundo asegurou o historiador, Xosé Manuel Núñez Seixas, quen fixo a presentación de Alejandro Fernández no acto que tivo lugar esta mañá no Consello da Cultura Galega.

O doutor pola Universidade de Barcelona e profesor da Universidade de Luján (Arxentina), Alejandro Fernández, ofrecerá unha conferencia mañá, martes 12 de xullo de 2001, ás 12 h., no Salón de Actos do Consello da Cultura Galega, nun acto organizado polo Arquivo da Emigración Galega.

O presidente do Consello da Cultura Galega foi o encargado de facer a presentación da nova publicación do Arquivo Sonoro de Galicia, Poetas e narradores nas súas voces, un libro que recolle textos de 31 autores galegos contemporáneos e que está complementado cun doble CD, onde se atopan as voces destes literatos, "unha obra que é o primeiro volume dunha serie que se quere proseguir, recollendo as voces de poetas e dramaturgos galegos de hoxe", segundo asegurou Carlos Casares no acto que tivo lugar esta mañá no Salón de Actos do Consello da Cultura Galega.

Con motivo da presentación oficial do libro Poetas e Narradores nas súas voces, o Consello da Cultura Galega organiza un acto que terá lugar mañá, venres 8 de xuño, ás 12,00h. no Salón de Actos do Consello da Cultura Galega. O acto contará coa participación de oito dos escritores que participaron nesta publicación do Arquivo Sonoro de Galicia, que serán presentados polo presidente do Consello da Cultura Galega, Carlos Casares. Do mesmo xeito, o acto aproveitarase para facer público o nomeamento do novo responsable do Arquivo Sonoro de Galicia, Paulino Novo Folgueira.

O Consello da Cultura Galega uniuse á celebración do Día Internacional do Medio Ambiente coa presentación de dúas publicacións de banda deseñada, De quen é a auga e Vivir no Solo, coas que se pretende comezar a concienciar ós nenos galegos da precariedade na que se atopan algúns bens tan sensibles como a auga ou o solo e da necesidade de conservalos.

A catedrática de Historia e investigadora, Clara Eugenia Lida, asegurou que México "distinguiuse por ser o país de Hispanoamericana que máis exiliados republicanos recibiu e máis facilidades lles deu para establecerse na sociedade mexicana". Esta profesora en El Colegio de México, unha das institucións investigadoras máis prestixiosas de ese país, ofreceu esta e outras conclusións durante o relatorio que baixo o título Españois en México durante o primeiro franquismo, ofreceu na tarde de onte no Salón de Actos do Consello da Cultura Galega, nun acto organizado polo Arquivo da Emigración Galega.

Españois en México durante o primeiro franquismo é o título do relatorio que a doutora Clara E. Lida ofrecerá mañá, mércores 30 de maio, ás 19,00h. no Salón de Actos do Consello da Cultura Galega, nun acto que organiza o Arquivo da Emigración Galega coa pretensión de afondar nos trasvases de poboación que se produciron nesas datas en dirección a América.

O Consello da Cultura Galega, nun esforzo de adaptación ás novas tecnoloxías, acaba de estrear un novo sitio web, www.consellodacultura.org, que sustitúe á anterior, que xa non respondía ás necesidades dunha institución en contínuo crecemento e expansión.

O Consello da Cultura Galega comezou esta mañá os actos de celebración do Día das Letras Galegas, que este ano está dedicada ó escritor e xornalista ourensán Eladio Rodríguez. O director do Instituto de Lingua Galega, Antón Santamarina, foi o encargado de abrir o programa de actividades cunha conferencia titulada Eladio Rodríguez, lexicógrafo.

A través dunha conferencia e da presentación da edición facsimilar do libro Folerpas e dun vídeo, que terán lugar o vindeiro mércores, 16 de maio, o Consello da Cultura Galega ten previsto unirse ós actos programados para homenaxear ó escritor e xornalista, Eladio Rodríguez, ó que este ano se lle dedica o Día das Letras Galegas.