Arquivo de noticias do CCG

O II Seminario Internacional “Emigración e exilio nos Estados Unidos de América: Experiencias de Galicia e Açores” celebrouse na Illa de San Simón os días 18 e 19 de outubro, organizado polo Consello da Cultura Galega e a Fundaçao Luso-Americana para o Desenvolvimento. Tratouse de considerar, de xeito comparado, aspectos como a integración nas sociedades de acollida, as relacións co mundo do exilio, o impulso de novos medios de comunicación na diáspora e o papel das comunidades emigrantes na diplomacia cultural. O seminario continúa os traballos desenvolvidos no congreso GALICIA e AÇORES: A ROTA AMERICANA, celebrado nas Illas Açores a finais de 2009.

O Consello da Cultura Galega acolleu hoxe 18 de outubro a xornada “Zambrano-Dieste: O legado de dúas figuras insubornables”. O obxectivo é analizar as obras, pensamentos e relacións de María Zambrano (1904-1991), figura clave da filosofía do século XX, e Rafael Dieste (1899-1981), escritor da Xeración do 27 e renovador da literatura galega. Dúas persoas comprometidas e enraízadas na cultura popular, significadas activamente coa causa da II República e participantes nas "Misións Pedagóxicas" e noutras iniciativas culturais. " de rescatar e facer xustiza a dúas figuras que tanto aprecio se profesaron e de vinculalas cos proxectos doutras xentes que tamén souberon abrir posibilidades en tempos difíciles", precisa María Xosé Agra, coorganizadora da xornada xunto con Ramón Maiz.

O libro "Poesía completa de Valentín Paz-Andrade", en edición de Gregorio Ferreiro Fente, foi presentado hoxe no salòn de actos do Consello da Cultura Galega. No acto interviron: Rosario Álvarez, vicepresidenta do CCG; Xesús Alonso Montero, catedrático e escritor, Gregorio Ferreiro Fente e o editor Manuel Bragado, director de Edicións Xerais de Galicia. O volume de 750 páxinas ven incorporar ao sistema literario galego "un poeta novo e de entidade", afirmou o profesor Alonso Montero. O acto concluiu coa voz de Valentín Paz-Andrade recitando o poema "¡Boas vindas, mariñeiros!".

A exposición itinerante “Un canto e unha luz na noite. Asociacionismo cultural en Galicia (1961-1975), ideada e organizada polo Consello da Cultura Galega en colaboración coa Fundación “10 de Marzo”, foi inaugurada hoxe na Casa Galega da Cultura (Praza da Princesa, 2) en Vigo. A mostra, comisariada por Ricardo Gurriarán, rescata e destaca en vintedous paneis explicativos e nove vitrinas o papel dinamizador e transformador dos axentes e das asociacións culturais en Galicia nos últimos quince anos da ditadura franquista. Arranca en 1961, ano de creación en Compostela da primeira asociación cultural galega “O Galo”. No acto inaugural interviron Ramón Villares, presidente do CCG, Ricardo Gurriarán, Alfonso Zulueta, presidente da Fundación Penzol, e o Alcalde de Vigo, Abel Caballero. A exposición, que conta coa colaboración do Concello de Vigo e o auspicio da Fundación Penzol, poderá visitarse ata o vindeiro 11 de novembro.

A “Asociación Española de Casas Museo y Fundaciones de Escritores” celebrará, entre o 9 e o 13 de outubro o “I Encuentro Ibérico de Casas Museo y Fundaciones de Escritores” que se desenvolverá durante dous días en Santiago de Compostela e outros dous no marco da Capital Europea da Cultura de Guimarães. O martes día 9 ás 19 horas os congresistas sesionaron no salón de actos do Consello da Cultura Galega. Foron recibidos por Francisco Díaz-Fierros, vicepresidente da institución, que deu paso aos relatorios do Secretario Xeral de Política Lingüística, Valentín García, e do Secretario Xeral de Cultura, Anxo Lorenzo, sobre “A rede de dinasmización lingüística” e “O turismo cultural en Galicia”, respectivamente. O Consello da Cultura, a Casa da Troya e a Cidade da Cultura, son os lugares nos que discurrirá a parte gallega do encontro.

O Consello da Cultura Galega expresou o seu pesar polo falecemento de Blanca Jiménez Alonso, viúva de Fermín Penzol, e que fora integrante do Plenario da institución entre 2001 e 2008. Era presidenta de honra da Fundación Penzol e conselleira da Editorial Galaxia.
O Consello da Cultura Galega salientou “o entusiasta labor de Blanca Jiménez Alonso no desenvolvemento do ricaz patrimonio bibliográfico Fundación Penzol, creada por iniciativa do seu marido e aberta ao servizo de Galicia en Vigo desde 1963”. Lembrou asemade a “continuada colaboración da Fundación Penzol co Consello da Cultura desde a constitución desta institución en 1983”.
O funeral celebrarase mañá sábado día 6 de outubro ás 18´15 horas no tanatorio de Boisaca en Santiago de Compostela.

“Nunca existiu nin como denominación nin como realidade un imperio español e o afán expansionista conduciu á fragmentación e ao colapso final, á guerra civil e á independencia das colonias”. Anthony Pagden, profesor de Ciencias Políticas e Historia na University of California-Los Ángeles (UCLA) defendeu este argumento na conferencia que iniciou un novo ciclo do seminario interdisciplinar "O(s) Sentido(s) da(s) Cultura(s)", que o Consello da Cultura Galega puxo en marcha en 2006 coa coordinación do profesor Ramón Maiz. A sesión desenvolveuse nun salón de actos abarrotado de estudiosos da ciencia política.

O Consello da Cultura Galega, a través do seu Arquivo da Emigración Galega, participará no desenvolvemento de dous proxectos impulsados pola Asociación de Institucións para as Migracións Europeas (AEMI). Trátase do “Migraport”, portal das migracións europeas, e da “Historia migratoria europea 1800-2010”. O Arquivo da Emigración Galega, que tomou parte na conferencia anual da AEMI, a finais do pasado setembro en Cracovia (Polonia), incorporouse a esta asociación internacional coincidindo coa asemblea celebrada en Bilbao en 2010.

O Consello da Cultura Galega, xunto co Institut d´Estudis Catalans e a Real Academia da Lengua Vasca (Euskaltzaindia), e tamén coa Unión de Editoriales Universitarias Españolas (UNE), estará presente en LIBER 2012, encontro internacional da industria editorial hispana que se celebra do 3 ao 5 de outubro no recinto da Fira de Barcelona. Trátase de dar a coñecer unha escolma das súas máis recentes produccións bibliográficas no maior encontro profesional da industria do libro en español, que acolle 450 editoriais e empresas de 15 países.

A Federación de Asociacións da Prensa de Galicia (FEGAPE) fixo entrega hoxe ao Consello da Cultura Galega dunha gravación inédita do discurso pronunciado por Valentín Paz-Andrade, o 10 de xullo de 1984 no Pazo de Fonseca, en Santiago de Compostela, con motivo da constitución da FEGAPE, en calidade de presidente de honor da mesma. O Presidente do CCG, Ramón Villares, agradeceu a donación, que incorpora ao Arquivo Sonoro de Galicia unha testemuña máis de Valentín Paz-Andrade, a quen Luís Menéndez, presidente da Asociación da Prensa de Santiago, glosou como “mestre de xornalistas”.

O Consello da Cultura Galega presentou o libro “O(s) sentido(s) da(s) cultura(s)”, que recolle en 720 páxinas a maioría dos textos presentados e debatidos durante os últimos catro anos no seminario interdisciplinar do mesmo título. Trátase dunha contribuciòn “moi sólida e orixinal ao debate sobre o papel da cultura nas sociedades democráticas occidentais”, afirmou Ramón Villares, presidente do CCG. Para Ramón Maiz, coordinador do seminario e compilador da obra, o libro permite un achegamento á pluralidade das significacións da cultura desde diversas tradicións intelectuais, olladas persoais e disciplinas académicas”. A publicación pode ser descargada desde os dispositivos móviles mediante o código QR.

O Consello da Cultura Galega acollerá mañá xoves as “III xornadas sobre boas prácticas na conservación do patrimonio cultural. (O patrimonio inmoble: interaccións holísticas e calidade)”. Organizadas en colaboración coa Escola Superior de Conservación e Restauración de Bens Culturais de Galicia e tres asociacións profesionais do sector, as xornadas contarán coa asistencia de máis de cen expertos e estudiosos. Os debates poderán ser seguidos tamén vía streaming a través de www.consellodacultura.org

Un grupo de alumnos e profesores do colexio “Apóstol Santiago” de Bos Aires-Arxentina visitaron hoxe a sede do Consello da Cultura Galega, no Pazo de Raxoi en Santiago dee Compostela, onde foron recibidos polo presidente Ramón Villares e o xerente Marcelino Fernández Santiago. Os alumnos, en viaxe de estudos por Galicia, coñeceron distintos aspectos do traballo e as actividades da institución e a súa proxección na Rede a través da web institucional www.consellodacultura.org e do portal www.culturagalega.org

O Consello da Cultura Galega, a través do seu Arquivo Sonoro de Galicia, dixitalizará os fondos documentais de gravacións propiedade do Liceo de Ourense. Para o cumprimento deste obxectivo os presidentes do Consello da Cultura e do Liceo, Ramón Villares e José Carlos Martínez-Pedrayo, respectivamente, asinaron hoxe un convenio de colaboración na sede da entidade cívica ourensana.

O seminario interdisciplinar "O(s) Sentido(s) da(s) Cultura(s)", que o Consello da Cultura Galega puxo en marcha en 2006, reanudará as súas actividades o próximo 4 de outubro. Anthony Pagden, profesor de Ciencias Políticas e Historia na University of California-Los Ángeles disertará e reflexionará, a partir das 17 horas, sobre o tema "De la monarquía católica a la república virtuosa. El imaginario político en la creación del mundo iberoamericano".

O escritor, pedagogo e activista cultural Agustín Fernández (Paz (Vilalba-Lugo, 1947) foi galardoado co XI Premio “FACER PAÍS-Ramón Piñeiro López”, instituído en 2002 para recoñecer o labor senlleiro dunha persoa ou dunha entidade galega a prol do desenvolvemento de Galicia. O xurado, integrado por representantes de catorce asociacións de Láncara, Sarria, A Pobra de San Xiao e O Corgo (Lugo), que considerou un total de 45 candidaturas, salientou, alén da “innovadora e longa obra narrativa, traducida e recoñecida do premiado e o seu traballo a prol da renovación pedagóxica” o seu “decidido compromiso con Galicia e a lingua galega”, que o fan merecedor “de ser considerado un dos bos e xenerosos”. O fallo deuse a coñecer no curso dunha rolda de prensa celebrada hoxe no Consello da Cultura Galega, en Santiago de Compostela. O premio, que carece de dotación económica, será entregado en Láncara nos días finais do vindeiro mes de outubro.

A Universidade de Cardiff, capital de Gales, acolle do 12 ao 14 de setembro o X Congreso da Asociación Internacional de Estudos Galegos (AIEG) baixo o título “Galiza alén do Arco Atlántico. Unha visión multidisciplinar dos estudos galegos”. Participarán 125 expertos galicianistas e relatores, entre os que figurarán expertos do Consello da Cultura Galega, institución que alberga a sede da AIEG e que colabora activamente no encontro, organizando catro das sete conferencias plenarias.

A Biblioteca do Consello da Cultura Galega acolleu do 5 ao 7 de setembro o curso "Carlos Casares, escritor e intelectual do seu tempo" programado pola Universidad Internacional Menéndez Pelayo (UIMP) e dirixido pola profesora e crítica literaria Dolores Vilavedra. O curso analizou a obra e a faceta intelectual de Carlos Casares (1941-2002) cando se cumpren dez anos do seu pasamento. O lembrado escritor foi tamén o terceiro presidente do Consello da Cultura Galega (1996-2002).

O Presidente e a Comisión Executiva do Consello da Cultura Galega (CCG) expresaron hoxe o seu pesar polo falecemento do xornalista, intelectual e galeguista Avelino Pousa Antelo (Arzón, A Baña, 1914).
O presidente do Consello da Cultura, Ramón Villares, destacou que a súa vida “pode considerarse como unha metáfora da Galicia do século XX e principio do século XX”. Nese sentido, Ramón Villares, subliñou do seu perfil biográfico “a vocación polo maxisterio, o interese pola agricultura e unha grande paixón polo galeguismo político” .