Eduardo Corbelle Rico

Doutor Enxeñeiro de Montes pola Universidade de Santiago de Compostela, con premio extraordinario de doutoramento no curso académico 2009-2010 coa tese "Abandono da agricultura e cambios da cuberta do solo", dirixida polos profesores Rafael Crecente Maseda e Inés Santé Riveira. Na actualidade é profesor na Escola Politécnica Superior de Enxeñaría da mesma universidade (Campus Terra, Lugo). A súa actividade docente tense repartido até a actualidade en doce materias diferentes do Grao de Enxeñaría en Xeomática e Topografía e o Máster en Xestión Sustentable da Terra e o Territorio e na dirección de máis de 25 traballos fin de máster, fin de grao e proxectos de fin de carreira.

Foi relator convidado en varios eventos auspiciados pola Organización para a Agricultura e a Alimentación das Nacións Unidas (FAO) relacionados coa xestión de terras e o abandono da actividade agraria (LANDNET 2014 Conference, Belgrado; 2nd International Workshop on Land Consolidation and Land Banking, Budapest, 2011; Support to the preparation of a national land consolidation strategy and a land consolidation pilot project in Albania, 2011; FAO Regional Workshop on Land Tenure and Land Consolidation, Santiago de Compostela, 2009), así como membro por invitación do panel de expertos sobre abandono de terras agrícolas do Joint Research Centre da Comisión Europea (2012), do comité científico do Open Source Geospatial Research and education Symposium (OGRS) en 2014 (Espoo, Finlandia) e 2012 (Yverdon-les-Bains, Suíza), así como do Congreso Internacional de Agroecoloxía e Agricultura Ecolóxica (Vigo), tamén en 2012 e 2014. É membro da Sección de Ciencia, Natureza e Sociedade do Consello da Cultura Galega desde 2017.

As súas liñas de investigación céntranse no estudo dos cambios de uso e cuberta do solo (land systems science) e no estudo dos mercados de terras (land administration and land institutions). Ten publicados 20 artigos científicos nacionais e internacionais (tres deles en Land Use Policy) e tres libros (como autor ou editor) nestas temáticas, e actuou como avaliador externo para as revistas Ecological Applications, Journal of Environmental Management, International Journal of Remote Sensing, Sustainability, Landscape and Urban Planning, Land Use Policy, Land Degradation and Development, Ecological Indicators, Environmental Science and Policy, Land, entre outras. Estas publicacións foron citadas 63 veces na Web of Science (índice H: 4) e 85 veces en Scopus (índice H: 5). O seu último libro titúlase Un enorme bazar: o mercado de terras en Galicia (2016). Código ORCID: 0000-0002-2382-6767. Scopus Author ID: 52363629400.