Concepción Cochón

Está licenciada en Filoloxía Hispánica, especialidade Galego-Portuguesa, pola Universidade de Santiago de Compostela; posteriormente realizou o mestrado interuniversitario en Política Lingüística e Planificación da Lingua Galega, do que acadou o título pola Universidade de Vigo. Traballa no Servizo de Normalización Lingüística do Concello de Pontevedra desde a súa creación, no ano 1999. Desde ese ano pertence á CTNL e foi parte da directiva desta asociación entre os anos 2000 e 2006. Como técnica de normalización e membro da CTNL, participou e participa en diversos proxectos colectivos para a normalización da lingua. Algunhas destas iniciativas, como a Rede de Entidades Amigas da Lingua ou o programa Falamos coa ANL da Universidade de Vigo, foron só de ámbito local. Outras iniciativas como Ciberlingua, Club de Debate, o programa Apego, Youtubeiras+, Enreguéifate ou a Asociación de Entidades Locais pola Lingua Galega naceron e desenvolvéronse ao longo do país grazas ao traballo en colaboración das e dos profesionais técnicos de moitos servizos de normalización municipais, do compromiso coa lingua de moitas persoas con responsabilidade política nos concellos e de diversas entidades comprometidas co noso idioma. Pero foi no ano 2018 cando estendeu a normalización da lingua a unha nova dimensión, a máis importante sen dúbida ningunha: a crianza da súa filla en, con, por, para, desde e a través do galego.