Os coordinadores desta cita son tamén os relatores das primeiras conferencias. Arrinca con Anxo Carracedo, director da Fundación Pública Galega de Medicina Xenómica (FPGMX), que fala da medicina personalizada e os grandes proxectos xenómicos. Após a súa intervención, María Brion, coordinadora científica de Xenoma Galicia. Instituto de investigación Sanitaria de Santiago do SERGAS, explicará en que consiste o proxecto Xenoma Galicia. Carmen Durán Parrondo, directora xeral de Saúde Pública da Consellería de Sanidade, atenderá aos cribados poboacionais en Galicia. Benigno Rosón, subdirector xeral de Sistemas e Tecnoloxías da Información, Consellería de Sanidade, ofrecerá un relatorio titulado “A importancia dos datos en saúde” e Senén Barro, director do CiTIUS-Centro Singular de Investigación en Tecnoloxías Intelixentes da Universidade de Santiago de Compostela, pechará a xornada cunha conferencia titulada “A intelixencia artificial na medicina personalizada”.

Proxecto xenoma e a telemedicina
O proxecto Xenoma Galicia é unha iniciativa da Xunta de Galicia que aposta pola xenómica como habilitadora da medicina personalizada e como impulsora da investigación biomédica no ecosistema galego de saúde. Os seus obxectivos son secuenciar o ADN de 400 000 cidadáns e, deste xeito, poder detectar enfermidades antes de que aparezan, diagnosticalas de maneira precoz e ofrecer tratamentos farmacolóxicos individualizados, así como constituír un banco de datos xenómico e un biobanco galego de mostras biolóxicas dispoñibles para o colectivo investigador.