A estadía enmárcase no protocolo de colaboración asinado en febreiro de 2010 entre o Presidente do Consello da Cultura Galega, Ramón Villares e Richard Saler, Decano do Colexio de Humanidades e Ciencias da Universidade de Stanford para a difusión da cultura galega.

O profesor Núñez Seixas está a ensinar no trimestre de inverno (xaneiro-marzo) o curso, dirixido a estudantes de grao e de posgrao, "Spanish Nationalist Discourses from General Franco to President Zapatero". Ademais impartirá dúas palestras noutros institutos da Universidade de Stanford: O día 16 de febreiro, sobre Galicia como país de emigración e inmigración, no Center for Latin American Studies, e o día 2 de marzo, no "Freeman Spogli Institute for International Studies", sobre os discursos soberanistas nos nacionalismos subestatais na Europa actual.).

O día 23 de febreiro intervirá, cun relatorio sobre política e lingua na Galicia do século XX, nun coloquio organizado pola Universidade de Santa Barbara (California), e o 24 e o 25 de marzo participará no congreso anual do Center for Basque Studies da Universidade de Reno (Nevada), cun relatorio sobre linguas e identidades no Estado español.

Completando o seu ciclo docente nos Estados Unidos, Xosé Manoel Núñez Seixas dará unha palestra o día 1 de abril na Universidade de York (Toronto) e entre o 4 e o 8 de abril impartirá o seminario "Exile and Migration during Francoism: A Historical Reassessment from a Galician Perspective", no Graduate Center da City University of New York. Finalmente o día 7 de abril impartirá unha palestra na New School for Social Research de Nova York.