Análise sobre a produción escrita en galego durante a Idade Moderna
3/7/2020
O Consello da Cultura Galega (CCG) presenta a publicación Calen barbas, falen cartas. A escrita en galego na Idade Moderna, na que se compilan e completan as achegas presentadas no simposio homónimo organizado polo Instituto da Lingua Galega e mais o CCG en novembro de 2017. No presente estudo, editado por Rosario Álvarez e Ernesto González, analízase a produción escrita en galego durante un período que a historiografía lingüística galega vén denominando “séculos escuros” polo decaemento no uso do galego nos ámbitos máis formais e a práctica ausencia de testemuños escritos, pero que, grazas á luz que ofrecen as novas pesquisas realizadas desde o ámbito da historia da lingua e da literatura, podemos deixar xa de alcumar como “escuros”. Podes completar esta información premendo aquí.
