A sección de Pensamento do Consello da Cultura Galega (CCG) organiza este xoves (25 de setembro, 18:00 horas), unha nova sesión do ciclo Pensarmos que leva por título “Dereitos humanos: o impacto da intelixencia artificial”. Nesta ocasión, o protagonista será o fiscal Carlos Varela García que intervirá en diálogo co avogado e analista político Xoán Antón Pérez Lema. A cita está coordinada por Celia Pereira Porto e emítese en directo desde o web institucional e a súa canle de YouTube.
24/09/2025
23/09/2025
A presidenta do Consello da Cultura Galega (CCG), Rosario Álvarez, recibiu na mañá deste martes a visita do alumnado de quinto de secundaria do colexio hispano arxentino Santiago Apóstol. Achegoulles o funcionamento da institución e as actividades desenvolvidas con especial atención aos recursos e materiais relativos a Arxentina. “Galicia é unha nación transterritorial que abrangue tamén á que chamamos a Galicia espallada” apuntou.
23/09/2025
Francisco Miguel Fernández Moratinos (A Coruña, 1897-1936) foi pintor, libreiro, ilustrador de revistas literarias do momento e unha promesa da plástica galega. Foi asasinado en 1936 e a súa figura ficou fondamente esquecida. Sobre a dimensión da súa obra reflexionarán Manuel Rivas, Carlos L. Bernárdez, Rosario Sarmiento, Ramón Rozas e Carmela Galego na xornada “Francisco Miguel. Tempo de facer xustiza”. A cita, que se insire no ciclo Revisando a nosa arte, terá lugar este mércores 24 de setembro (17:00 horas) e pode seguirse en directo a través do web e a canle de YouTube do CCG.
Francisco Miguel Fernández Moratinos (A Coruña, 1897-1936) foi pintor, libreiro, ilustrador de revistas literarias do momento e unha promesa da plástica galega. Foi asasinado en 1936 e a súa figura ficou fondamente esquecida. Sobre a dimensión da súa obra reflexionarán Manuel Rivas, Carlos L. Bernárdez, Rosario Sarmiento, Ramón Rozas e Carmela Galego na xornada “Francisco Miguel. Tempo de facer xustiza”. A cita, que se insire no ciclo Revisando a nosa arte, terá lugar este mércores 24 de setembro (17:00 horas) e pode seguirse en directo a través do web e a canle de YouTube do CCG.
22/09/2025
Unha nutrida representación do corpo consultar acreditado en Galicia reuniuse na mañá deste luns convocado polo Consello da Cultura Galega (CCG) para “crear un espazo de comunicación e de coñecemento mutuo entre a lingua e a cultura galega e as linguas e culturas dos países que están aquí representados” tal e como apuntou Rosario Álvarez, presidenta do CCG, na apertura da sesión. Baixo o título “Diplomacia e cultura” coñeceron as características da acción exterior do CCG e sentaron as bases de colaboración nun encontro que terá periodicidade anual.
20/09/2025
A Sección de Pensamento do Consello da Cultura Galega (CCG) organiza os días 26 e 27 de setembro a terceira edición do Festival de Filosofía de Galicia. Conferencias, recitais e espectáculos poñen o foco na relación entre sexo e filosofía, un territorio no que se entrecruzan corpo e pensamento, pracer e palabra, ética ee erotismo. O filósofo e ensaísta Carlos Fernández Liria, xunto coa xornalista e investigadora Elena Lázaro Real participan neste encontro de entrada libre previa inscrición.
19/09/2025
O Consello da Cultura Galega (CCG) colabora co Festival internacional outono de teatro de Carballo (FIOT) este mércores 24 de setembro (Pazo da Cultura de Carballo, 18:00 horas) coa mesa redonda “A arte do canto improvisado: tradición, ensino e perspectivas contemporáneas”. Domingo Blanco, Lupe Blanco, Manuel Maseda, e o director do Arquivo Sonoro de Galicia, Alejo Amoedo, participarán nesta sesión de análise e divulgación sobre a educación e a situación actual desta manifestación cultural.
19/09/2025
O Consello da Cultura Galega (CCG) acaba de incorporar aos seus fondos dixitais as traducións ao galego de obras clásicas da cultura francesa e textos medievais vencellados a Galicia feitas polo profesor e tradutor Henrique Harguindey Banet (Lugo, 1946- Cangas, 2024). Deste xeito garántase a custodia e difusión do esforzo filantrópico de tradución que xa foi difundido en vida polo propio autor no espazo web palabrasdesconseladas.gal.
19/09/2025
O Consello da Cultura Galega (CCG) organiza o vindeiro luns, 22 de setembro (sede do CCG, 10:30 horas), a xornada “Diplomacia e cultura” que reúne por primeira ao corpo consular acreditado en Galicia. O encontro supón unha oportunidade para afondar nos vencellos entre a diplomacia consular e a historia contemporánea do noso país ademais de abrir novas vías de colaboración de cara ao futuro. As persoas interesadas en asistir teñen que enviar un correo electrónico a exterior@consellodacultura.gal.
18/09/2025
A presidenta do Consello da Cultura Galega (CCG), Rosario Álvarez, participou esta mañá na sede da institución na inauguración da 22ª edición do simposio anual sobre o libro e a lectura que organiza a Asociación Galega de Editores (AGE). Alí destacou o apoio do CCG á entidade e ofreceu a “dispoñiblidade para desenvolver nos vindeiros meses calquera acción complementaria”. Canda ela estaban Anxo Lorenzo, Secretario xeral de Cultura, que incidiu na “colaboracion coa asociación a través do convenio que manteñen coa AGE e recordou a importancia da distribución e da exportación no sector do libro. Miguel Toval, que era o seu primeiro simposio como presidente da AGE, destacou a importancia da distribución nun momento que “aínsa que somos optimistas pola certa estabilidade, estamos nunha situación moi dificultosa”. O simposio titulado “A distribución do libro galego” analizou os modelos de distribución do libro galego e as liñas de apoio á exportación do libro.
18/09/2025
O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), incorpora este mes de setembro un lote de números do xornal Lugo: Órgano oficial del Centro Lucense de Buenos Aires. Nesta ocasión súbense noventa exemplares que se corresponden co período comprendido entre maio de 1943 e decembro de 1950.
17/09/2025
Francisco Miguel Fernández Díaz (A Coruña, 1897 – Bértoa, 1936) foi un destacado pintor e ilustrador. O seu legado ficou no esquecemento tras o seu asasinato en 1936. Os seus restos veñen de ser recuperados do cemiterio de Bértoa en Carballo enterraranse na Coruña o vindeiro 29 de setembro. Ao fío deste acontecemento, o Consello da Cultura Galega (CCG) incorpora hoxe ao Álbum de Galicia, colección de biografías dixitais, a entrada desta prometedora figura da arte plástica galega a cargo do crítico e comisario de arte Carlos L. Bernárdez. Ademais, o vindeiro día 24 na sede do CCG terá lugar a xornada Francisco Miguel. Tempo de facer xustiza que revisará a súa dimensión artística.
12/09/2025
O Consello da Cultura Galega (CCG) acolle estes días As XVI Jornades d’Intercanvi Cultural, organizadas organizadas pola Societat Verdaguer, a Societat Catalana de Llengua i Literatura e a Càtedra Verdaguer d’Estudis Literaris da Universitat de Vic – Universitat Central de Catalunya. Conferencias, mesas de debate, encontros arredor da tradución literaria galego-catalá e catalán-galego xunto con visitas a espazos emblemáticos da cultura galega enmarcan un programa de catro días que conta coa colaboración de diferentes entidades galegas.
11/09/2025
O Consello da Cultura Galega (CCG) acolleu esta mañá a presentación das XVIII Xornadas do Peregrino “Abrindo Camiño”, que poñen o foco na figura de Andrea López Chao (Mondoñedo, 1874 - A Habana, 1954), destacada mestra do galeguismo na emigración. Rosario Álvarez, presidenta do CCG, subliñou que “Andrea foi muller, docente, emigrante, militou no asociacionismo, feminista... constantes que nos convocan constantemente”. Pola súa parte, Isabel Martínez, subdirectora xeral de Relacións coas Comunidades Galegas da Xunta, puxo o énfase en que foi “un referente e unha pioneira no compromiso social coas mulleres”. Tamén interviñeron Alberto García, concelleiro de Cultura de Mondoñedo, e Luís Fernández Ansedes, membro da asociación Abrindo Camiño, quen destacaron a importancia das actividades que se desenvolverán o vindeiro día 15 en Mondoñedo. Ademais da presentación do documental sobre a súa figura, da man dos seus directores Violeta Ramos e Daniel Vázquez, estivo presente a bisneta da homenaxeada, Patricia Ares.
10/09/2025
“Foi un home dotado dun excepcional talento empresarial e comercial que puxo ao servizo da prosperidade de Galicia” asegura o historiador Xosé Luís Pastoriza sobre Fidel Isla Couto (Cambados, 1902-Vigo, 1989). O empresario incorpórase hoxe ao Álbum de Galicia, colección dixital de biografías do Consello da Cultura Galega (CCG).
07/09/2025
Os veciños e as veciñas de Veigas de Camba abandonaron en 1974 a aldea que, pouco despois, quedou asolagada baixo as augas do encoro das Portas. A memoria daquel acontecemento regresou na tarde deste domingo 7 de setembro á casa da Viúva na Gudiña da man dos antigos veciños e veciñas así como de diferentes especialistas. Foi no marco da xornada “A memoria asolagada: Veigas de Camba e a Lama no encoro das Portas” que organizou a sección de Patrimonio e Bens Culturais do Consello da Cultura Galega (CCG) baixo a coordinación de Nieves Amado. Rosario Álvarez, presidenta do CCG; Néstor Ogando, alcalde da Gudiña e Teresa Nieto, coordinadora da sección de Patrimonio e Bens Culturais inauguraron a xornada que foi gravada e subirase ao web do CCG.
06/09/2025
A sección de Patrimonio e Bens Culturais do Consello da Cultura Galega (CCG) organiza este domingo 7 de setembro na Casa da viúva na Gudiña a xornada “A memoria asolagada: Veigas de Camba e a Lama no encoro das Portas”. A cita, coordinada por Nieves Amado, pretende reflexionar sobre o territorio, a memoria e o patrimonio no val do río Camba, un lugar hoxe asolagado polas augas do encoro das Portas. A citá reunirá a investigadoras, veciñanza e representantes institucionais para reflexionar arredor das características técnicas da construción do encoro, dos elementos do patrimonio cultural que quedaron asolagados e dos procesos xudiciais que mantiveron as veciñas e veciños das vilas asolagadas coa empresa construtora e, sobre todo, para rescatar a súa memoria. A sesión non se emite en directo pero será gravada.
05/09/2025
O gasto en cultura dos concellos galegos non depende do seu tamaño nin da súa densidade de poboación, senón das prioridades que cada entidade lle concede a este ámbito. Así se desprende do estudo O gasto en cultura na Administración local en Galicia, elaborado polo Observatorio do Consello da Cultura Galega (OCG), servizo do Consello da Cultura Galega (CCG), coa colaboración metodolóxica e técnica do Instituto de Estudos e Desenvolvemento de Galicia (IDEGA) da Universidade de Santiago de Compostela. O informe constata que concellos de tamaño desigual poden ter o mesmo gasto por habitante en cultura. Este estudo, que analiza por primeira vez o gasto executado polas entidades municipais, foi presentado esta mañá pola presidenta do CCG, Rosario Álvarez, quen destacou a necesidade de “poñer números ao esforzo que fan os concellos en cultura”. Canda ela, o responsable do OCG, Håkan Casares, subliñou a importancia de contar cunha “imaxe precisa do gasto real en cultura que fai a administración local”. Pola súa parte, Melchor Fernández Fernández e Pedro Rey Araujo, integrantes do IDEGA, salientaron que o informe contribúe á necesaria reflexión sobre a relación que debe existir entre a actividade cultural e a fixación de poboación nos territorios despoboados.
03/09/2025
Tal día como hoxe, pero de 1950, arrincaba en Montevideo a primeira emisión do programa de radio Sempre en Galicia. Setenta e cinco anos despois daquel fito, o director Xan Leira presentou no Consello da Cultura Galega (CCG) o documental Sempre en Galicia, voz e pensamento galeguista na emigración que recupera a historia deste programa de radio que continúa en emisión. A presidenta do CCG, Rosario Álvarez; o secretario xeral da Lingua, Valentín García; máis catro dos participantes no filme: Mónica Rebolo, Manuel Suárez, Carlos Sixirei e Yolanda Díaz Gallego xunto co autor presentaron este proxecto que se estreará no vindeiro mes de outono tanto en Galicia como en Uruguay.
03/09/2025
O Consello da Cultura Galega (CCG) vén de incorporar ao seu Álbum de Galicia -colección biobibliográfica que visibiliza personalidades senlleiras da historia e cultura galegas- unha nova entrada dedicada ao empresario galeguista Ramiro Isla Couto (A Estrada-1896, Vigo, 1987). A biografía, elaborada polo historiador Xosé Luís Pastoriza, rescata unha vida marcada polo compromiso político, a emigración e o exilio, e a quen o intelectual galeguista Ramón Piñeiro definiu como “peleriño do galeguismo polo mundo galego”.
26/06/2025
A construción da casa escola da parroquia de Santa María de Vilacampa (no Valadouro), a de Bacoi máis a de Adelán así como numerosas achegas para o funcionamento de escolas de Moucide, Santo Tomé e Santa Cruz son algunhas das contribucións que realizou en Galicia a sociedade "EL Valle de Oro, Sociedad de instrucción, protección y recreo" constituída en 1907 en Cuba por un grupo de emigrantes naturais dos concellos lucense de O Valadouro e Alfoz. Libros de actas, estatutos, a contabilidade e folletos de numerosas actividades conforman a documentación desta sociedade que aínda está activa e que o Arquivo da Emigración Galega, centro do Consello da Cultura Galega (CCG), vén de subir á rede no marco do proxecto Memoria documental das sociedades da emigración galega. Unha iniciativa que permite visibilizar material procedente das entidades microterritoriais creadas na diáspora galega para axudar a coñecer mellor o fenómeno migratorio.
26/06/2025
Ver o galego como unha oportunidade comercial, avanzar na regulamentación do etiquetado do produto na nosa lingua e promover programas de xestión empresarial en galego son algunhas das medidas concretas que se abordaron no marco da xornada “Empresa, turismo e deporte”, coordinada por Jackson R. Soáres, profesor da Universidade da Coruña. É a quinta sesión de Un país coa súa lingua. Foro participativo que promove o Consello da Cultura Galega (CCG) e que pilota Dolores Vilavedra. Priorizar o galego nas accións turísticas e nas comunicacións públicas da actividade deportiva federada son outras das medidas que se apuntaron na sesión. A última xornada do foro terá lugar o vindeiro 8 de xullo coa celebración da mesa “Sociedade, crenzas e participación comunitaria” a cargo de Rosalía Fernández Rial.
25/06/2025
Carteis das manifestacións do Primeiro de maio cos seus diferentes lemas; da campaña en contra da integración de España na OTAN; un de 1976 co retrato do vigués Xosé Humberto Baena, fusilado con 24 anos en 1975, son algúns exemplos dos materiais que recolle o Fondo Miguel Gutiérrez. O Consello da Cultura Galega (CCG) e o Grupo de investigación HISPONA da Universidade de Santiago de Compostela (USC) acaban de poñer en rede máis de 3.500 carteis, pasquíns, pósteres e outros materiais de propaganda política relacionados con Galicia. “Un fondo valioso para coñecer a transición política española e o proceso de construción da democracia” tal e como apunta o historiador e membro de HISPONA, Emilio Grandío. “É fundamental que a cidadanía coñeza este patrimonio, que queda dispoñible para consulta” apuntou o coleccionista Miguel Gutiérrez, que facilitou a difusión do maior fondo de Galicia desta temática aberto e en acceso libre.
25/06/2025
José María Castroviejo (Santiago de Compostela, 1909 - Pontevedra, 1983) foi un escritor, poeta e xornalista, pioneiro da ecoloxía e da defensa da natureza. Formou parte do Seminario de Estudos Galegos e publicou varios traballos na revista Nós. A súa entrada, elaborada por María Castroviejo, vén de incorporarse ao Álbum de Galicia, colección de biografías do Consello da Cultura Galega.
25/06/2025
A Sección de Pensamento do Consello da Cultura Galega que coordina Celia Pereira, celebra este xoves (9:45 horas) a xornada titulada "Votar ao inimigo", unha proposta de análise e debate sobre os fenómenos sociais e culturais que están a favorecer o avance das posicións extremistas e autoritarias no marco democrático actual. Jesús Ceberio, ex director de EL País, Carme Adán, Leonor Parcero e Montse Fajardo participan neste encontro que afondará na polarización política, no papel da ultradereita nas aulas, a desinformación e o uso propagandístico da historia.
24/06/2025
O Consello da Cultura Galega (CCG) celebra mañá mércores, 25 de xuño (16:30 horas), a quinta mesa do proxecto Un país coa súa lingua. Foro Participativo, coordinado por Dolores Vilavedra e que pretende ofrecer medidas propositivas para recuperar o vigor do galego. A xornada titúlase “Economía, turismo e deporte”, está a cargo do profesor Jackson R. Soares, e reflexionará sobre a situación do idioma nestes tres eidos. A sesión ten abertas vías de participación da cidadanía e tamén se poderá seguir en liña. As mesas do foro rematan o martes 8 de xullo cunha análise á situación do galego na sociedade, crenzas e participación comunitaria coordinada por Rosalía Fernández Rial.
20/06/2025
O plenario da Real Academia Galega acordou esta mañá que Begoña Caamaño (1964-2014) fose a figura homenaxeada nas Letras Galegas 2026. Nada en Vigo e finada en Santiago de Compostela, narradora, xornalista, activista incansable foi unha voz imprescindible do feminismo galego. A súa biografía está dispoñible no Álbum de Galicia, colección de biobliografías do Consello da Cultura Galega, nunha entrada escrita por Amanda Álvarez.
20/06/2025
A presidenta do Consello da Cultura Galega, Rosario Álvarez, e o alcalde do concello de Ribeira, Luis Antonio Pérez Barral, asinaron este xoves un protocolo de colaboración para a realización de actividades conxuntas. Esta colaboración institucional facilitará a realización de actividades relacionadas co patrimonio marítimo e coa memoria democrática. No acto estiveron tamén estiveron presentes o tenente de alcalde Vicente Mariño de Bricio e o xerente do CCG, Marcelino Fernández.
19/06/2025
O Repertorio da prensa da emigración galega, proxecto que mantén o Arquivo da Emigración Galega (AEG) do Consello da Cultura Galega (CCG), incorpora este mes de maio do boletín oficial informativo do Consello de Galiza. Son cinco números que van de 1963 a 1967, que se corresponden co intento de refundación da entidade orixinal que fora creada en 1944 en Montevideo por Castelao.
18/06/2025
Co gallo da conmemoración do Día Internacional do Orgullo LGBTIQ+ que se celebra cada 28 de xuño, o Centro de Documentación en Igualdade e Feminismos (CDIF) do Consello da Cultura Galega celebra este xoves 19 (9:45 horas) unha nova xornada do ciclo Pensar con Orgullo. Co título “As violencias LGBTIfóbicas: armarios, biopoderes e formas de resistencia” expertas en filosofía, dereito, activismo, comunicación e creación artística debaterán nas eivas na lexislación e as dificultades para presentar as denuncias que sofren as persoas cando son obxecto dunha agresión. Ademais, ese mesmo día, a hemeroteca feminista A Saia, incorpora o fanzine Galicia Nazón Cuir á súa colección.
18/06/2025
O Álbum de Galicia, colección de biografías do Consello da Cultura Galega (CCG), incorpora hoxe a entrada de Manuela Cambronero (Lugo, 1821- Santiago de Compostela, 1853). Unha das primeiras mulleres dramaturgas en castelán, escritora tamén de prosa e poesía, adscrita á corrente literaria do romanticismo. Iris Iglesias Segade é a autora da entrada que está dispoñible no web do CCG.