Os retratos que fixo no seu estudo permiten trazar a crónica dunha época das cidades de Lugo e de Vigo. Chámase Mary Quintero (Melide, 1931) e é unha das pioneiras da fotografía profesional en Galicia. O seu traballo e a súa traxectoria centran a xornada A luz que alumea a vida, que lle dedica a Comisión de Igualdade do Consello da Cultura Galega o vindeiro 29 de outubro. Profesionais dos medios de comunicación, da fotografía e do mundo da imaxe contextualizarán o seu traballo nunha sesión que servirá tamén de homenaxe. Un dos momentos máis destacados será o percorrido vital e profesional que Quintero realizará a través das súas obras nunha exposición montada para a ocasión. A inscrición é gratuíta e pódese facer a través da páxina web da institución.
02/10/2015
02/03/2015
Directoras, guionistas, produtoras, actrices…, en resumidas contas filmes feitos ou protagonizados por mulleres. Baixo esta premisa o Consello da Cultura Galega(CCG) e o Centro Galego de Artes da Imaxe (CGAI) organizan ao longo desta semana un ciclo de cine titulado “Olladas de mulleres no mundo (creadoras galegas de imaxe)”. Unha tentativa de amosar outras olladas e perspectivas para celebrar o Día da Muller Traballadora. Proxeccións e coloquios que permiten ver cinema feito tanto en Galicia como noutras partes do mundo.
02/12/2014
A Saia, Andaina e Festa da Palabra Silenciada son algunhas das revistas publicadas nos oitenta que permiten coñecer a traxectoria dos feminismos e das feministas en Galicia. Estas tres publicacións son as que inauguran o proxecto “Hemeroteca Feminista Galega A Saia”. Unha iniciativa que xorde da colaboración do Consello da Cultura Galega, a través da Comisión de Igualdade, e o Centre Dona i Literatura da Universitat de Barcelona. Arredor desta presentación terá lugar a xornada “Xénero e Documentación III”, que se desenvolve nese mesmo serán no Consello da Cultura Galega. Ademais, unha pequena exposición na sede da institución permitirá ver os exemplares destas publicacións.