A comunidade virtual "Orgullo Galego", que ten entre os seus obxectivos fomentar a creación de contidos en lingua galega en Internet, facilita temporalmente o acceso libre (con posibilidade de descarga en formato PDF) á súa colección de infografías cunha selección do léxico galego usado para denominar a nosa fauna e flora autóctonas. A intención é que estas infografías poidan usarse como material didáctico tanto nas escolas coma no ámbito familiar, contribuíndo así á difusión do noso léxico patrimonial entre os máis cativos/as.
23/04/2021. OUTRAS
19/04/2021. DINAMIZACIóN
O CEP Brea Segade de Taragoña e o Servizo de Normalización Lingüística do Concello de Rianxo poñen ao dispor da cidadanía o primeiro volume do Cancioneiro escolar urxente de Rianxo. Trátase dun proxecto educativo de recuperación do patrimonio cultural, musical e lingüístico, coordinado polo docente e investigador musical José Luís do Pico Orjais, que compila
cantigas, partituras e historias de diferentes composicións rianxeiras (prosas de Reis, cantigas de Entroido, cantos dos maios, arrolos, seráns, fiadas...). O obxectivo é ofrecer unha guía didáctica aos docentes de música e divulgadores culturais que traballan no concello. Na páxina web do SNL de Rianxo podes consultar o propio cancioneiro en formato PDF, así como outro material complementario relacionado co proxecto (unidades didácticas, propostas escolares, audios, vídeos...) .
cantigas, partituras e historias de diferentes composicións rianxeiras (prosas de Reis, cantigas de Entroido, cantos dos maios, arrolos, seráns, fiadas...). O obxectivo é ofrecer unha guía didáctica aos docentes de música e divulgadores culturais que traballan no concello. Na páxina web do SNL de Rianxo podes consultar o propio cancioneiro en formato PDF, así como outro material complementario relacionado co proxecto (unidades didácticas, propostas escolares, audios, vídeos...) .
19/04/2021. INVESTIGACIóN
O Consello da Cultura Galega presenta a publicación As Irmandades da Fala no seu tempo: perspectivas cruzadas, na que diferentes historiadores, politólogos e lingüistas analizan este movemento histórico desde diferentes ópticas: a peninsular, a europea e a americana da diáspora. A obra recolle unha selección dos relatorios presentados nos tres congresos que o CCG organizou, entre os anos 2016 e 2018, co gallo da celebración do centenario da fundación das Irmandades da Fala. Así mesmo, tamén está accesible en liña o volume The First World War and the Nationality Question in Europe Global Impact and Local Dynamics, editado en inglés pola editorial Brill, co obxectivo de difundir este coñecemento entre o público internacional. Podes acceder a estas dúas publicacións, así como a información sobre as figuras máis destacadas das Irmandades da Fala, neste especial web.
19/04/2021. EMPREGO
O Concello de Arzúa publica as bases que rexerán a convocatoria para a creación dunha bolsa de emprego destinada á provisión temporal da praza de normalizador/a lingüístico/a. O sistema de selección é o de oposición libre. Os/as aspirantes deben estar en posesión dalgunha das seguintes titulacións (ou equivalente): licenciatura en Filoloxía Galego-Portuguesa, licenciatura en Filoloxía Galega, licenciatura en Filoloxía Hispánica (subsección Galego-Portugués), grao en Lingua Galega, ou outras titulacións de grao/licenciatura sempre que estean en posesión do Celga 5. O prazo de presentación de solicitudes é de 10 días naturais, contados a partir do día seguinte ao da publicación da convocatoria. [Corrección de erros]
12/04/2021. DINAMIZACIóN
A Coordinadora de Traballadores/as de Normalización da Lingua acaba de facer pública toda a documentación asociada aos proxectos gañadores da segunda edición dos Premios Mil Primaveras, uns galardóns que teñen como obxectivo recoñecer e dar visibilidade ao traballo ben feito no ámbito da normalización lingüística. Accede a toda a información detallada no sitio web da iniciativa.
12/04/2021. OUTRAS
Xa podes visitar Agora.gal, un proxecto de agregación e distribución de contidos dixitais en galego, con aparencia de medio de comunicación. Neste momento, os internautas atoparán en Agora.gal os contidos de trinta blogs e medios asociados ao proxecto. A intención dos seus promotores é seguir agregando novos sitios web ata convertelo no portal de referencia para acceder á información e aos contidos en galego. No seu blog atoparás máis información sobre a iniciativa.
09/04/2021. AXUDAS E PREMIOS
A Consellería de Cultura, Educación e Universidade da Xunta de Galicia publica as bases das subvencións ás entidades locais para o ano 2021 destinadas á creación, mantemento ou reforzamento dos seus servizos de normalización lingüística; así como ao desenvolvemento de programas de dinamización lingüística. Poderán optar a estas axudas os concellos ou agrupamentos de concellos con poboación igual ou superior aos 3.000 habitantes. O prazo de presentación de solicitudes é dun mes, contado a partir do día seguinte ao da publicación desta convocatoria.
09/04/2021. INVESTIGACIóN
A Real Academia Galega e a Asociación Galega de Onomástica presentan o volume Toponimia de Carballo, autoría de Fernando Cabeza Quiles, que se incorpora á colección Terra Nomeada, creada para compilar e estudar os nomes de lugar habitados e algúns dos principais accidentes xeográficos dos concellos de Galicia. Na mesma colección atoparás outros estudos sobre os topónimos dos concellos de Agolada, Ames, Begonte, A Estrada, Rábade e Trabada. Podes ampliar información premendo aquí.
08/04/2021. DINAMIZACIóN
Xa está accesible en liña O Mester, o videoxogo elaborado por Pablo García de los Salmones e Carlos Balado Sánchez, no que poderás derrotar os demos con duelos musicais, coma se foses un personaxe das ilustracións das Cantigas de Santa María. Este xogo foi o seleccionado como gañador no concurso organizado polo Consello da Cultura Galega e a Asociación Galega de Videoxogos, que se desenvolveu no marco da exposición "Afonso X e Galicia". Para ampliar información preme aquí.
06/04/2021. OUTRAS
A Real Academia Galega estrea "Xela Arias. A palabra esgazada", unha serie documental de seis capítulos sobre a vida e obra da autora homenaxeada no Día das Letras Galegas 2021. Xa está dispoñible na rede o primeiro capítulo, centrado nos primeiros anos de vida da autora, desde o seu nacemento en Sarria ata a súa chegada a Vigo con 7 anos. Os seguintes capítulos estrearanse semanalmente, cada martes, ata a semana previa á celebración do Día das Letras Galegas. Podes ampliar esta información premendo aquí.
05/04/2021. AXUDAS E PREMIOS
A Consellería de Cultura, Educación e Universidade da Xunta de Galicia publica a convocatoria de axudas para o libro galego, tanto no que se refire á tradución para outras linguas de obras publicadas orixinariamente en galego como á tradución para o galego de obras publicadas orixinariamente noutras linguas. O prazo de presentación de solicitudes é dun mes, contado a partir do día seguinte ao da publicación da convocatoria.
05/04/2021. LEXISLACIóN
O Comité de Expertos do Consello de Europa publica un documento avaliativo sobre as "medidas de acción inmediata" que recomendara en 2019, e que as autoridades deberían ter implementado co obxecto de cumprir os compromisos adquiridos polo Goberno español ao ratificar a Carta Europea para as Linguas Rexionais ou Minoritarias. No que respecta ao galego, o Comité de Expertos considera que as recomendacións feitas en 2019 non foron implementadas. Sinala que o marco legal existente en Galicia en materia educativa é contrario aos compromisos recollidos na Carta e que continúa habendo limitacións para o ensino no noso idioma. Así mesmo, lembra que tampouco foi modificada a Lei Orgánica do Poder Xudicial para garantir o uso do galego nos procesos xudiciais a pedimento dunha das partes, e que seguen a detectarse impedimentos para a tramitación de documentos en galego na Administración do Estado en Galicia. No referente ao galego estremeiro, solicítalle ao Goberno do Principado de Asturias que inclúa o galego-asturiano no seu Estatuto de Autonomía e recoméndalle ao Goberno de Castela e León tomar medidas efectivas para protexer o galego. Por último, tamén lle recomenda ao Goberno de Estremadura que promova "a fala" e a inclúa no seu Estatuto. Podes consultar todos os informes e documentos avaliativos sobre a aplicación da Carta en España premendo aquí.
30/03/2021. AXUDAS E PREMIOS
A Deputación da Coruña publica a resolución provisional das subvencións a concellos e entidades locais da provincia da Coruña para a creación, mantemento e reforzo dos servizos de normalización lingüística durante o ano 2021. A partir do día seguinte á publicación desta resolución, os solicitantes teñen un prazo de 10 días hábiles para comunicar, se fose o caso, a desistencia da solicitude. De non tramitar a desistencia no citado prazo, enténdese que aceptan a axuda. Para consultar o texto completo da resolución, preme aquí.
30/03/2021. DINAMIZACIóN
Entre os días 20 e 24 de abril de 2021 celebrarase no Forum Metropolitano da Coruña unha nova edición do festival de narración oral “Falando a Boca Chea”. Trátase dunha iniciativa, organizada desde 2017 pola empresa de xestión cultural Artestudio, coa colaboración do Concello da Coruña, que pretende achegar a todos os públicos a arte da narración oral en lingua galega. Podes consultar o programa completo ou obter información sobre as canles para conseguir as entradas e convites, premendo aquí.
29/03/2021. INVESTIGACIóN
O Seminario de Onomástica da Real Academia Galega presenta a publicación Estudos de Onomástica Galega V. Os nomes comerciais, que recolle os traballos presentados na V Xornada de Onomástica, celebrada en Pontevedra no pasado mes de novembro de 2020. O volume recolle nove achegas, de diferentes lingüistas ou representantes do sector comercial, nas que se reflexiona sobre as tendencias de nominación dos establecementos e produtos comerciais e sobre o seu papel no proceso de normalización lingüística.
29/03/2021. DINAMIZACIóN
O Servizo de Normalización Lingüística do Concello de Vigo presenta novos recursos en liña creados no marco do proxecto "Vigo arrólate", que ten como obxectivo fomentar a transmisión do galego no ámbito familiar. Na páxina web da iniciativa atoparás unha selección de arrolos en lingua galega para que os bebés prendan no sono. Así mesmo, da man do Fiadeiro poderás descubrir a orixe, a evolución e a temática habitual dos cantos de berce.
26/03/2021. DINAMIZACIóN
O Servizo de Normalización Lingüística do Concello de Teo vén de dar un paso máis na implementación do programa Apego no municipio, anunciando a creación do Bosque Apego, un espazo natural no que cada familia que teña un fillo/a terá a oportunidade de plantar unha árbore autóctona. Deste xeito, o apego pola lingua e cultura propias durante os primeiros anos de vida vincúlase tamén ao apego polo contorno natural no que se crían os/as nenos/as. As familias do Teo que desexen participar no programa deben poñerse en contacto co SNL municipal. Podes obter máis información sobre esta iniciativa premendo aquí.
26/03/2021. CURSOS E CONGRESOS
A Comisión de Normalización Lingüística da Facultade de Filosofía da USC organiza as xornadas "A lingua galega e a filosofía", que terán lugar os días 12 e o 19 de abril de 2021. A iniciativa está dirixida principalmente ao alumnado desta Facultade e, por mor das restricións sanitarias vixentes, as sesións desenvolveranse mediante videoconferencia a través de Zoom. O prazo de inscrición estará aberto ata o vindeiro 7 de abril. Para ampliar información preme aquí.
25/03/2021. DINAMIZACIóN
Os servizos de normalización lingüística dos concellos de Ames, Pontevedra, Rianxo, Santiago de Compostela e Teo convocan unha nova edición de Enreguéifate, un certame de regueifas en vídeo que ten como obxectivo difundir a regueifa como forma de improvisación oral e contribuír á promoción do galego. Os participantes deben presentar un vídeo en galego no que interactúen dúas persoas como mínimo, de temática libre e cunha duración máxima de 3 minutos. Establécense dúas categorías, unha para público xeral e outra para alumnado do ensino non universitario, e o xurado outorgará diferentes premios por cada categoría. O prazo de presentación dos vídeos esténdese desde o 29 de marzo ao 28 de maio de 2021. Para consultar as bases completas da convocatoria, preme aquí.
24/03/2021. AXUDAS E PREMIOS
O xurado dos II Premios Mil Primaveras seleccionou os proxectos gañadores desta segunda edición do certame, escollidos entre as 37 candidaturas presentadas. Estes premios están promovidos pola Coordinadora de Traballadores/as de Normalización da Lingua co obxectivo de recoñecer e difundir iniciativas, campañas ou proxectos destinados ao fomento do galego e ao incremento do seu uso e prestixio. Os proxectos galardoados nesta edición son: Enreguéifate e Regueifesta , na categoría de “mellor proxecto estabilizado”; Galeguiza-T, na categoría de “mellor proxecto novo”; Dígocho eu, na categoría de “mellor comunicación e impacto”; Plan de desconfinamento progresivo da lingua galega, na categoría de “proxecto máis innovador”; Projeto Educativo Semente, na categoría de “mellor proxecto de fomento de galego na infancia e/ou mocidade"; e Galegoempresas, na categoría de “mellor proxecto de fomento do galego nun ámbito sectorial”. A maiores, o xurado decidiu outorgar unha mención ao proxecto O galego, a miña lingua propia, por consideralo un modelo de calidade extrapolable a outras entidades.
24/03/2021. DINAMIZACIóN
A Xunta de Galicia, a Real Academia Galega, o Consello da Cultura Galega e a CRTVG, en colaboración con diferentes editoriais e empresas, presentan a programación institucional conxunta para homenaxear a Xela Arias, autora á que se lle dedica o Día das Letras Galegas 2021. O programa inclúe exposicións, iniciativas de participación social, edicións conmemorativas, propostas didácticas para o ensino, xornadas académicas, música, recursos audiovisuais e actividades nas bibliotecas. No que respecta ao Consello da Cultura Galega, os actos de homenaxe comezaron o pasado 21 de marzo, Día Mundial da Poesía, co diálogo literario “O equilibrio dos extremos”, e continuarán nos vindeiros meses con diferentes actividades que podes consultar no espazo web “Xela Arias. Día das Letras Galegas 2021”.
24/03/2021. AXUDAS E PREMIOS
A Axencia Galega das Industrias Culturais (Agadic) convoca axudas para o ano 2021 destinadas a fomentar a creación de obras audiovisuais con decidida vocación artística e cultural. En concreto, subvenciónase a escrita individual de guións en galego; as curtametraxes sobre proxecto en versión orixinal galega; as curtametraxes en construción, gravadas en versión orixinal galega; as longametraxes cinematográficas en versión orixinal galega; e os proxectos de webserie en versión orixinal galega. Enténdese por “versión orixinal galega” a rodaxe/gravación en lingua galega. O prazo para a presentación de solicitudes é dun mes, contado a partir do día seguinte ao da publicación desta convocatoria.
23/03/2021. AXUDAS E PREMIOS
O Parlamento de Galicia acolleu onte, 22 de marzo de 2021, o acto de entrega dos XXVII Premios de Publicidade en Galego, que outorga esta institución en colaboración coa Secretaría Xeral de Política Lingüística da Xunta de Galicia e o Foro Enrique Peinador. Nesta edición, na categoría de prensa escrita foi galardoado o anuncio Fillo do Atlántico, producido por &Rosás para as adegas Martín Códax. Na modalidade de radio, o traballo gañador foi H2ohhh!!!, da axencia Ecovigo Publicidad, para Aqualia. A peza Non é tabú, é a vida. Falamos?, creada por 100x100 Creatividade + Comunicación para o Colexio Oficial de Psicoloxía de Galicia, recibiu o premio na categoría de televisión. Na modalidade de Internet foi galardoada a campaña dixital Gústame ir ao súper, da axencia NEOZINK para o Grupo Cuevas. Na categoría de centros de ensino resultou premiado o IES Leixa de Ferrol, polo traballo Somos 60% auga. Por último, o xurado acordou entregar tamén unha mención honorífica ao Almanaque Agrícola ZZ. Para ampliar información, preme aquí.
22/03/2021. DINAMIZACIóN
O proxecto Apego pon ao dispor do público as pezas editadas coas cancións e contos do Festival do Apego 2020, que se celebrou o pasado 27 de decembro no Auditorio de Galicia, en Santiago de Compostela. Na sección "Recursos" da páxina web do proxecto atoparás agora, ademais dos vídeos didácticos que xa contiña, as actuacións de Magín Blanco, Golfiños, Pablísimo, Xarope Tulú, Pablo Díaz, Aldaolado, Pakolas e Mamá Cabra.
22/03/2021. CURSOS E CONGRESOS
A Deputación de Pontevedra convoca cursos de formación para o seu persoal e mais para o dos concellos da provincia adheridos ao Plan agrupado de formación continua. O programa formativo inclúe os seguintes cursos de contidos lingüísticos: “Linguaxe administrativa galega. Nivel medio” e “Linguaxe administrativa non sexista e imaxe igualitaria na práctica da xestión pública”. O prazo de inscrición comezará a partir do día seguinte ao da publicación das bases no Boletín Oficial da Provincia de Pontevedra e rematará 20 días antes do comezo da acción formativa.
22/03/2021. DINAMIZACIóN
A Comisión de Normalización Lingüística da Facultade de Xeografía e Historia convoca o "I Concurso de terminoloxía da xeografía, a historia e a arte a través de imaxes en Twitter, FOTO-termos", co obxectivo de divulgar a terminoloxía en galego das disciplinas que se imparten nesta facultade e, ao mesmo tempo, crear un banco de imaxes asociadas aos diferentes termos. O certame está dirixido ao alumnado matriculado na USC durante o curso 2020-2021. Para participar cómpre responder con fotografías a cada un dos termos que a Facultade de Xeografía e Historia emita a través da súa conta de Twitter, identificados co cancelo #TerminoloxíaEnImaxes. O xurado outorgará tres premios de 200, 150 e 100 euros, en cada unha das dúas categorías do concurso: "imaxes de autoría propia" e "imaxes con lincenza Creative Commons". Podes consultar as bases completas premendo aquí.
18/03/2021. CURSOS E CONGRESOS
A Secretaría Xera de Política Lingüística presenta a versión actualizada do curso Celga 1 en liña, que agora inclúe dúas modalidades: unha titorizada para os/as inscritos/as en convocatorias de formación, e outra de acceso libre destinada á autoaprendizaxe. Este curso, que se corresponde co nivel A2 do Marco europeo común de referencia para as linguas, inclúe 12 unidades divididas en catro bloques: comprender; explorar e reflectir; practicar e comunicar; e viaxar. A maiores, as unidades 1 e 2 están adaptadas á Lectura Fácil para facilitarlles a aprendizaxe a aquelas persoas con dificultades lectoras e/ou de comprensión. Para ampliar información, preme aquí.
17/03/2021. OUTRAS
Secretaría Xeral de Política Lingüística da Xunta de Galicia convoca probas para a obtención dos certificados de lingua galega (niveis Celga 1, 2, 3 e 4). As probas realizaranse en Santiago de Compostela e en Ponferrada nos meses de maio e/ou xuño de 2021, sempre que a evolución da crise sanitaria ocasionada pola COVID-19 o permita. O prazo de presentación de solicitudes é de 15 días, contados a partir do día seguinte ao da publicación desta convocatoria.
17/03/2021. DINAMIZACIóN
A Comisión de Normalización Lingüística da Facultade de Química da USC, coa colaboración do Servizo de Normalización Lingüística, convoca o "I Concurso de vídeos divulgativos en galego de química sostible", dirixido a todos os membros da comunidade educativa da USC. O obxectivo principal da iniciativa é divulgar en galego as achegas da química sostible na resolución de problemas nos ámbitos da saúde, o ambiente e a industria, polo que os/as participantes deben presentar un vídeo con esta temática, dun máximo de tres minutos de duración. O prazo de presentación dos traballos remata o 24 de abril de 2021. O xurado outorgará tres premios de carácter económico (de 400, 300 e 200 euros) e mais un diploma acreditativo.
12/03/2021. LEXISLACIóN
O Congreso dos Deputados aprobou parcialmente a Proposición non de lei (PNL) que recollía parte do manifesto "Igualdade lingüística: liberdade, pluralismo e democracia", promovido por diferentes entidades sociais de defensa das linguas do Estado, entre elas A Mesa pola Normalización Lingüística. No que respecta ao galego, a emenda aprobada recoñece a necesidade da oficialización do galego en territorios pertencentes a Asturias e Castela-León, acepta permitir a validez recíproca de documentos escritos en galego e portugués, así como a reciprocidade na recepción de radio e televisión entre Galicia e Portugal, e demanda un "respecto real" baseado no dereito de uso e no deber de coñecemento. Podes ampliar información premendo aquí.